വിവാദ ചിത്രമായ കേരള സ്റ്റോറിക്ക് എ സർട്ടിഫിക്കറ്റോടെ പ്രദർശനാനുമതി . ചിത്രത്തിലെ പത്ത് രംഗങ്ങൾ ഒഴിവാക്കാനാണ് കേന്ദ്ര സീസർബോർഡ് നിർദ്ദേശം നൽകിയിട്ടുള്ളത്. നിർമ്മാതാവ് വിപുൽ അമൃത്ലാൽ ഷായാണ് വിവരം പുറത്തുവിട്ടത്. പാകിസ്ഥാൻ വഴിയാണ് അമേരിക്ക ഭീകരർക്ക് സാമ്പത്തിക സഹായം നൽകുന്നത്, കമ്മ്യൂണിസ്റ്റ് പാർട്ടി ഹിന്ദുക്കളെ അവരുടെ ആചാരങ്ങൾ അനുഷ്ഠിക്കാൻ അനുവദിക്കുന്നില്ല തുടങ്ങിയ ഡയലോഗുകൾ നീക്കം ചെയ്യാൻ ബോർഡ് നിർദ്ദേശിച്ചിട്ടുണ്ട്.
കമ്മ്യൂണിസ്റ്റ് പാർട്ടിയെ ഇന്ത്യയിൽ നിന്ന് പുറത്താക്കണമെന്നും ഇത് ആവശ്യപ്പെടുന്നു. തീവ്രവാദം പരാമർശിക്കുന്ന കേരളാ മുൻ മുഖ്യമന്ത്രിയുടെ അഭിമുഖം നീക്കം ചെയ്യണമെന്ന് സെൻസർ ബോർഡ് നിർദേശിച്ചു. സിനിമയിൽ നിന്ന് നീക്കം ചെയ്യാൻ ആവശ്യപ്പെട്ട ഏറ്റവും ദൈർഘ്യമേറിയ ഭാഗമാണിത്.
കേരളത്തിൽ നിന്ന് കാണാതായ സ്ത്രീകളെ മതം മാറ്റി രാജ്യത്തിനകത്തും പുറത്തുമുള്ള തീവ്രവാദ പ്രവർത്തനങ്ങൾക്ക് ഉപയോഗിക്കുന്നതാണ് ചിത്രത്തിന്റെ ഇതിവൃത്തം. കേരളത്തിലുൾപ്പെടെ നിരവധി വിമർശനങ്ങളാണ് ചിത്രത്തിനെതിരെ ഉയരുന്നത്. കേരളത്തെ മോശമായി ചിത്രീകരിക്കാനുള്ള സംഘപരിവാർ ഭാഗമാണ് ചിത്രമെന്നാണ് പ്രധാന വിമർശനം.
ഈ സിനിമ കേരളത്തിൽ റിലീസ് ചെയ്യാൻ പാടില്ലെന്ന അഭിപ്രായവുമുണ്ട്. ഇതിനെതിരെ മുഖ്യമന്ത്രി, പ്രതിപക്ഷ നേതാവ് ഉൾപ്പെടെയുള്ളവർ രംഗത്തെത്തിയിട്ടുണ്ട്. കേരളത്തിനെതിരെ വിദ്വേഷം പരത്തുന്നു എന്നാരോപിച്ച് ചെന്നൈയിലെ ഒരു തമിഴ് മാധ്യമപ്രവർത്തകൻ ചിത്രത്തിനെതിരെ മുഖ്യമന്ത്രിക്ക് പരാതി നൽകിയിരുന്നു.
കേരളത്തിലെ തിരഞ്ഞെടുപ്പ് രാഷ്ട്രീയത്തിൽ നേട്ടമുണ്ടാക്കാൻ സംഘപരിവാർ നടത്തുന്ന പലതരത്തിലുള്ള ശ്രമങ്ങളുടെ പശ്ചാത്തലത്തിൽ പ്രചരണ സിനിമകളും മുസ്ലീങ്ങളെ അകറ്റുന്നതും കാണണമെന്ന് മുഖ്യമന്ത്രി പിണറായി വിജയൻ കഴിഞ്ഞ ദിവസം പറഞ്ഞിരുന്നു. അന്വേഷണ ഏജൻസികളും കോടതിയും കേന്ദ്ര ആഭ്യന്തര മന്ത്രാലയവും വരെ തള്ളിക്കളഞ്ഞ ലൗ ജിഹാദ് ആരോപണങ്ങൾ കെട്ടിച്ചമയ്ക്കാനുള്ള ആസൂത്രിത നീക്കത്തിന്റെ ഭാഗമാണിതെന്നും അദ്ദേഹം കൂട്ടിച്ചേർത്തു.
