| എമ്മെസ് ഷൈജു
രാഹുൽ ഗാന്ധി ഒരിക്കൽ കോൺഗ്രസിൻ്റെ പ്രസിഡൻ്റായിരുന്നു. പക്ഷേ ആ പദവിയിൽ ഇരുന്ന് കൊണ്ട് കോൺഗ്രസ് എന്ന പ്രസ്ഥാനത്തെ രാഷ്ട്രീയമായി മുന്നോട്ട് നയിക്കുന്നതിൽ അദ്ദേഹം ഒരു വലിയ പരാജയമായിരുന്നു. അതിൻ്റെ കാരണം കോൺഗ്രസ് പോലെ അടിപടലം അധികാര പ്രമത്തരും രാഷ്ട്രീയമായി കുപഥചരൻമാരുമായ ഒരു സംഘത്തെ സമകാലിക രാഷ്ട്രീയ സാഹചര്യങ്ങളിൽ മുന്നോട്ട് നയിക്കാനുള്ള മനോഘടനയുള്ള ഒരു മനുഷ്യനല്ല രാഹുൽ ഗാന്ധി എന്നത് തന്നെയാണ്.
പക്ഷേ, അപ്പോഴും രാഹുൽ ഗാന്ധി ഒരു വലിയ പ്രതീക്ഷയാണ്. കോൺഗ്രസിന് മാത്രമല്ല, ഇന്നത്തെ സാഹചര്യത്തിൽ മതേതര ഇന്ത്യക്ക് പ്രതീക്ഷ പുലർത്താൻ കഴിയുന്ന ഒരു നേതാവിൻ്റെ പേര് പറയാൻ പറഞ്ഞാൽ ഒന്നാമതായി പറയാൻ കഴിയുന്ന ഒരു പേര് ഇപ്പോഴും രാഹുൽ ഗാന്ധിയുടേത് മാത്രമാണ്. ദേശീയ രാഷ്ട്രീയത്തിൽ അയാൾക്കുള്ളത് വ്യത്യസ്തവും വൈകാരികവുമായ ഒരു സ്ഥാനമാണ്. സൗമ്യവും സത്യസന്ധവുമായ അയാളുടെ ഭാഷക്കും പ്രവർത്തനങ്ങൾക്കും ഒരു രാഷ്ട്രീയ ശക്തിയുണ്ട്.
കന്യാകുമാരി മുതൽ കശ്മീർ വരെയുള്ള ഇന്ത്യൻ ജനതയെ ഏതെങ്കിലും തരത്തിൽ ഫാഷിസത്തിനെതിരായ മുന്നേറ്റത്തിൽ യാഥാർത്ഥ്യ ബോധത്തോടെ ചേർത്ത് നിർത്താൻ സാധിക്കുന്ന ഒരു പൊളിറ്റിക്കൽ കരിസ്മ ഇവിടെ നിലനിൽക്കുന്നുണ്ടെങ്കിൽ അത് രാഹുൽ ഗാന്ധി എന്ന മനുഷ്യനാണ്.
പക്ഷേ ആ മനുഷ്യനെ സ്വാർത്ഥവും തുച്ഛവുമായ രാഷ്ട്രീയ ലാഭങ്ങൾക്ക് വേണ്ടി മാത്രമാണ് കോൺഗ്രസ് എന്ന പാർട്ടി ഉപയോഗിക്കുന്നത് എന്നതാണ് രാഹുൽ ഗാന്ധി ഇന്ന് നേരിട്ട് കൊണ്ടിരിക്കുന്ന ഏറ്റവും വലിയ പ്രതിബന്ധം.
രാജ്യം ഗ്രസിക്കപ്പെട്ടിരിക്കുന്ന വർഗീയത എന്ന മഹാ ലഹരിയിൽ നിന്നും, ആ ലഹരിയുടെ ആലസ്യത്തിൽ ഇന്ത്യൻ ജനതയിലെ ഒരു വലിയ വിഭാഗം പുലർത്തുന്ന രാഷ്ട്രീയ നിസംഗതയിൽ നിന്നും ഒരു മോചനം വേണമെങ്കിൽ അതിനേക്കാൾ വലിയ ലഹരിയുണ്ടാക്കുന്ന രാഷ്ട്രീയാഘാതങ്ങൾ ഇവിടെ സംഭവിക്കണം.
ഇവിടെ നടക്കുന്ന രാഷ്ട്രീയ വിനാശങ്ങളെ കണ്ണ് തുറന്ന് കാണാൻ പാകത്തിന് ജനങ്ങൾ ഉണരണം. ക്രമേണ അവർ സമര സജ്ജരാകണം.
ലോകത്തിൻ്റെ രാഷ്ട്രീയ ചരിത്രങ്ങളിൽ ഇങ്ങനെയുള്ള വലിയ ഓളങ്ങൾ ഉണ്ടായിട്ടാണ് പലയിടങ്ങളിലും വലിയ രാഷ്ട്രീയ മാറ്റങ്ങൾ സംഭവിച്ചിട്ടുള്ളത് . അങ്ങനെ അടിസ്ഥാന ജനതയിൽ ഒരോളമുണ്ടാക്കൻ രാഹുൽ ഗാന്ധിക്ക് സാധിക്കണമെങ്കിൽ സ്വാർത്ഥംഭരികളും അധികാര പ്രമത്തരുമായ കുപഥചാരികളുടെ വലയം വിട്ട് രാഹുൽ ഗാന്ധി പുറത്തേക്ക് വരണം.
ഇപ്പോഴത്തെ വിധിക്കെതിരെ ഒരപ്പീലും കൊടുക്കാതെ രാഹുൽ ജയിലിൽ പോകണം. ഒരു മനുഷ്യൻ ജയിലിൽ പോകുന്നത് കാണുമ്പോൾ സന്തോഷമുണ്ടാകുന്നത് കൊണ്ടല്ല ഇങ്ങനെ കരുതുന്നതും പറയുന്നതും. മറിച്ച് അത് ഇന്ത്യയെന്ന രാജ്യത്ത് ഉണ്ടാക്കാൻ പോകുന്ന രാഷ്ട്രീയ ആഘാതം വളരെ വലുതായിരിക്കും എന്നത് കൊണ്ടാണ്.
അതോടെ കശ്മീർ മുതൽ കന്യാകുമാരി വരെയുള്ള ഇന്ത്യയുടെ മതേതര ചേരി ജ്വലിച്ചുയരും. രാഹുൽ ജയിലിൽ കഴിയുന്ന ഓരോ ദിനവും രാജ്യത്തിൻ്റെ വീണ്ടെടുപ്പിനുള്ള അടിത്തറയെ രൂപപ്പെടുത്തും. ലോകത്തെ എല്ലാ ഏകാധിപത്യ, വർഗീയ ഭരണകൂടങ്ങളും തകരുന്നതിന് ഓരോ കാരണമുണ്ടാുയിട്ടുണ്ട്. അങ്ങനെ ഒരു കാരണമാകാൻ യോഗമുണ്ടാകുന്നെങ്കിൽ അതാകും രാഹുൽ ഗാന്ധി എന്ന മനുഷ്യൻ്റെ രാഷ്ട്രീയമായ ദൗത്യം.
അല്ലാതെ വയനാട്ടിൽ മൽസരിച്ച് ഇടത് പക്ഷ സ്ഥാനാർത്ഥിയെ പരാജയപ്പെടുത്തുക എന്നതാണ് രാഹുൽ ഗാന്ധിയുടെ രാഷ്ട്രീയ ദൗത്യം എന്ന് കരുതുന്ന കോൺഗ്രസ് നേതാക്കളുടെ കളിപ്പാവ പോലെ നിൽക്കുന്ന ഒരു രാഹുൽ ഗാന്ധിയിൽ ഈ രാജ്യത്തിന് ഒരു പ്രതീക്ഷയും ഉണ്ടാകില്ല. അത് അദ്ദേഹം തിരിച്ചറിയട്ടെ.
