സാധാരണ ഗതിയിൽ ഒരു സംസ്ഥാന ഗവർണർ ആ സംസ്ഥാനത്തെ സർവ്വകലാശാലകളുടെ എക്സ്-ഓഫീഷ്യോ ചാൻസലറാണ്. ഔദ്യോഗികമായി ചാൻസലർ എന്ന നിലയിൽ ഗവർണറുടെ അധികാരങ്ങളും പ്രവർത്തനങ്ങളും ഒരു പ്രത്യേക സംസ്ഥാന സർക്കാരിന് കീഴിലുള്ള സർവ്വകലാശാലകളെ നിയന്ത്രിക്കുന്ന ചട്ടങ്ങളിൽ പ്രതിപാദിക്കുന്നു.
മിക്കപ്പോഴും വൈസ് ചാൻസലർമാരെ നിയമിക്കുന്നതിലെ അവരുടെ പങ്ക് പലപ്പോഴും രാഷ്ട്രീയ ഭരണ നിർവഹണ നേതൃത്വവുമായുള്ള തർക്കങ്ങൾക്ക് കാരണമായി മാറിയിട്ടുമുണ്ട്. ഇവിടെ കേരളത്തിൽ ഗവർണറുടെ ഔദ്യോഗിക വെബ് പോർട്ടലിൽ പറയുന്നത് “ഗവർണർ എന്ന നിലയിൽ മന്ത്രിമാരുടെ ഉപദേശവും സഹായവും നേടിയാണ് പ്രവർത്തിക്കുന്നത്,” എന്നാണ്.
അതേസമയം, സർവകലാശാലകളുടെ “ചാൻസലർ എന്ന നിലയിൽ അദ്ദേഹം മന്ത്രിസഭയിൽ നിന്ന് സ്വതന്ത്രമായി പ്രവർത്തിക്കുകയും എല്ലാ സർവകലാശാലാ കാര്യങ്ങളിലും സ്വന്തം തീരുമാനങ്ങൾ എടുക്കുകയും ചെയ്യുന്നു,” എന്നും പറയുന്നു. എന്നാൽ ഇതിനെല്ലാം വിപരീതമായി, രാജസ്ഥാനിലെ രാജ്ഭവന്റെ വെബ്സൈറ്റിൽ “ഗവർണർ വൈസ് ചാൻസലറെ നിയമിക്കുന്നത് സംസ്ഥാന സർക്കാരുമായി കൂടിയാലോചിച്ചാണ്,” എന്നാണ് പറയുന്നത്.
2009-ലിറങ്ങിയ കേന്ദ്ര സർവ്വകലാശാലാ നിയമ പ്രകാരം, രാജ്യത്തിന്റെ രാഷ്ട്രപതി കേന്ദ്ര സർവ്വകലാശാലയുടെ വിസിറ്ററായിരിക്കും. കേന്ദ്ര സർവ്വകലാശാലകളിലെ ചാൻസലർമാർ പേരിന് അവിടത്തെ മേധാവികളാണ്. കോൺവൊക്കേഷനുകളുടെ അധ്യക്ഷത ഉൾപ്പെടെയുള്ള കാര്യങ്ങളിലായി അവരുടെ പങ്ക് ചുരുങ്ങുന്നു. അതേപോലെ തന്നെ വിസിറ്റർ എന്ന നിലയിൽ രാഷ്ട്രപതിയാണ് അവരെ നിയമിക്കുന്നത്.
കേന്ദ്ര സർക്കാർ രൂപീകരിച്ച സെർച്ച്, സെലക്ഷൻ കമ്മിറ്റികൾ തിരഞ്ഞെടുത്ത പേരുകളുടെ പാനലുകളിൽ നിന്നാണ് വിസിമാരെ വിസിറ്റർ നിയമിക്കുക. ഇതോടൊപ്പം തന്നെ വിസിറ്റർ എന്ന നിലയിൽ, സർവകലാശാലകളുടെ അക്കാദമിക്, നോൺ-അക്കാദമിക് വശങ്ങളുടെ പരിശോധനകൾക്ക് അംഗീകാരം നൽകാനും അന്വേഷണങ്ങൾക്ക് അംഗീകാരം നൽകാനും രാഷ്ട്രപതിക്ക് അവകാശമുണ്ടെന്ന് നിയമം കൂട്ടിച്ചേർക്കുന്നു.
2019ൽ പശ്ചിമ ബംഗാളിൽ മമതയുടെ കീഴിലെ തൃണമൂൽ കോൺഗ്രസ് സർക്കാർ സർവകലാശാലകളിൽ വിസിമാരെ നിയമിക്കുന്നതിലും അവർക്കെതിരെ നടപടിയെടുക്കുന്നതിലും ഗവർണറുടെ അധികാരം വെട്ടിക്കുറച്ചിരുന്നു.
