മമ്മൂട്ടി, ശ്വേതാ മേനോൻ എന്നിവർക്ക് മികച്ച അഭിനേതാക്കൾക്കുള്ള സംസ്ഥാന പുരസ്കാരം നേടിക്കൊടുത്ത സിനിമയായ ‘പാലേരി മാണിക്യം: ഒരു പാതിര കൊലപാതകത്തിന്റെ കഥ’. 2009 ഡിസംബറിൽ ആണ് ആദ്യം റിലീസ് ചെയ്യുന്നത് . പിന്നാലെ വർഷങ്ങൾക്ക് ശേഷം 4 കെ ദൃശ്യമികവോടെ തിയേറ്ററുകളിൽ കഴിഞ്ഞ ദിവസമാണ് റീ റിലീസ് ചെയ്തത്. പക്ഷെ, ആദ്യമായല്ല പാലേരി മാണിക്യം റീ റിലീസ് ചെയ്യുന്നത് എന്നതാണ് വാസ്തവം .
മോഹൻലാൽ നായകനായ മണിച്ചിത്രത്താഴ്, ദേവദൂതൻ, സ്ഫടികം പോലുള്ള ചിത്രങ്ങൾ റീ റിലീസ് ചെയ്തതിലൂടെ മികച്ച കളക്ഷൻ സ്വന്തമാക്കിയതിന് പിന്നാലെയാണ് ‘പാലേരി മാണിക്യം: ഒരു പാതിര കൊലപാതകത്തിന്റെ കഥ’ റീ റിലീസ് തീരുമാനിച്ചത്. ശരിക്കും 2010 ലാണ് ‘പാലേരി മാണിക്യം: ഒരു പാതിരകൊലപാതകത്തിന്റെ കഥ’ ആദ്യം റീ റിലീസ് ചെയ്യുന്നത് .
സംസ്ഥാന വ്യാപകമായി മുപ്പതോളം തിയേറ്ററുകളിലായിരുന്നു അപ്പോൾ റീ റിലീസ് ചെയ്തത്. 2010 ഏപ്രിൽ 14 നായിരുന്നു ഈ റീ റിലീസ്. സിനിമയ്ക്ക് മൂന്ന് പ്രധാന സംസ്ഥാന പുരസ്കാരങ്ങൾ ലഭിച്ചതാണ് റീ റിലീസിന് കാരണമെന്ന് സംവിധായകൻ രഞ്ജിത്ത് പറഞ്ഞിരുന്നു.
ഇപ്പോഴിതാ, പതിനാല് വർഷങ്ങൾക്ക് ശേഷമാണ് ഈ സിനിമ വീണ്ടും തിയേറ്ററുകളിൽ റിലീസ് ചെയ്തത്. ഒക്ടോബർ 4 നാണ് ചിത്രം റീ റിലീസ് ചെയ്തത്. പക്ഷെ നല്ല രീതിയിലുള്ള പ്രോമോഷൻ ഇല്ലാതിരുന്നതിനാൽ ചിത്രത്തിന് ബുക്കിങ് കുറവായിരുന്നു.