| എമ്മെസ് ഷൈജു
ചിലർ കണ്ടറിയും. ചിലർ കൊണ്ടേ അറിയൂ. എന്നാൽ ഇവിടെ അന്ധമായ സി പി എം വിരോധം തലക്ക് പിടിച്ചവർക്ക് എത്ര കൊണ്ടിട്ടും കൊണ്ടതായി പോലും അറിയുന്നില്ല! അവരാണ് ഇപ്പോഴും ഗവർണർ ആരിഫ് മുഹമ്മദ് ഖാനെ വാഴ്ത്തിയും താങ്ങിയും നടക്കുന്നത്.
സംഘ് പരിവാറല്ലാത്ത ഇടത് പക്ഷ വിരോധികൾ ഒരു കാര്യം എപ്പോഴും ഓർക്കണം. നിങ്ങൾക്ക് സി പി എമ്മിനോടും ഇടത് പക്ഷത്തോടുമുള്ള വിരോധം തീർക്കേണ്ടത് സംഘ്പരിവാർ വെട്ടിയിടുന്ന വഴികളിലൂടെ നടന്നു കൊണ്ടാകരുത്. നിങ്ങളുടെ വിയോജിപ്പിൻ്റെ മാനദണ്ഡങ്ങളല്ല സംഘപരിവാറിൻ്റേത്. അവരുടെ വിയോജിപ്പിൻ്റെ പ്രായോജകരായി നിങ്ങൾ മാറുമ്പോൾ അവരുടെ പ്രത്യയശാസ്ത്രത്തെയാണ് ഫലത്തിൽ നിങ്ങൾ കൂടി എൻ്റോഴ്സ് ചെയ്യുന്നത്.
ഇടത് പക്ഷത്തോടും സി പി എമ്മിനോടുമുള്ള രാഷ്ട്രീയ വിരോധം കൊണ്ട് ഗവർണർക്ക് പിന്തുണയും വിസിബിലിറ്റിയും കൊടുത്തിരുന്നവർക്ക് ഒരു തിരിച്ചറിവുണ്ടായാൽ നല്ലത്. ഇപ്പൊ മീഡിയാ വണ്ണിന് സംഭവിച്ചത് അതാണ്. നേരത്തെ കൈരളി ചാനലിനോട് മാത്രമായിരുന്നു ഗവർണർക്ക് അയിത്തം. അതിപ്പോ മീഡിയാ വണ്ണിനെയും തേടിയെത്തി. ഇനി മറ്റുള്ളവരെയും തേടിയെത്തും. കാരണം സംഘപരിവാറിന് അവരല്ലാത്ത മുഴുവൻ പേരും ശത്രുക്കളാണ്.
ഓർഡറിൽ ചെറിയ വ്യത്യാസങ്ങളൊക്കെ കാണുമെന്ന് മാത്രം. അഴിമതി വിരുദ്ധത എന്ന പുറം തോലിനുള്ളിൽ പൊതിഞ്ഞ് പിടിച്ചിരിക്കുന്ന ഒന്നാന്തരം സംഘി പ്രത്യയ ശാസ്ത്രമാണ് ഇപ്പൊ രാജ്ഭവനിൽ നിന്ന് പ്രക്ഷേപണം ചെയ്ത് കൊണ്ടിരിക്കുന്നത്. സംഘ്പരിവാർ വിരുദ്ധരായ മുഴുവൻ പേരും ഒന്നിച്ച് ഒന്നായി എതിർക്കേണ്ട ഒരു രാഷ്ട്രീയ ശത്രുവായി കേരള ഗവർണർ മാറിക്കൊണ്ടിരിക്കുകയാണ്.
അവിടെ നിന്ന് ഉന്നം വെക്കുന്നത് കേരളത്തിൻ്റെ മതേതര സാമൂഹ്യഘടനയെയാണ്. അത് വഴി അടുത്ത ലോക് സഭാ തെരഞ്ഞെടുപ്പും നിയമസഭാ തെരഞ്ഞെടുപ്പുമാണ്. ഇതൊന്നും അറിഞ്ഞിട്ടും അറിയാത്ത മട്ടിൽ രാജ്ഭവന് വേണ്ടി കുഴലൂത്ത് നടത്തുന്നവർ രാഷ്ട്രീയക്കാരിലോ മാധ്യമ പ്രവർത്തകരിലോ ഉണ്ടെങ്കിൽ എഴുതി വെച്ചോളൂ അവർ ഉള്ളിൽ പേറുന്നത് സംഘിസമാണ്.
