അന്താരാഷ്ട്ര ഫുട്ബോളിലെ ഭാവിയെക്കുറിച്ചുള്ള അഭ്യൂഹങ്ങൾക്ക് വിരാമമിട്ട് ക്രിസ്റ്റ്യാനോ റൊണാൾഡോ. വരാനിരിക്കുന്ന യുവേഫ നേഷൻസ് ലീഗ് മത്സരങ്ങൾക്കുള്ള പോർച്ചുഗൽ ടീമിൽ റൊണാൾഡോ ഇടം നേടി. പുതിയ പരിശീലകൻ ജോർജ് ജീസസിന്റെ കീഴിലെ ആദ്യ പോർച്ചുഗൽ ടീമിലേക്കാണ് 41കാരനായ സൂപ്പർതാരം തിരഞ്ഞെടുക്കപ്പെട്ടത്.
2026 ഫിഫ ലോകകപ്പിന്റെ റൗണ്ട് ഓഫ് 16ൽ നിലവിലെ ചാമ്പ്യന്മാരായ സ്പെയിനിനോട് പോർച്ചുഗൽ പുറത്തായതിന് പിന്നാലെ ദേശീയ ടീമിനായി ഇനിയും കളിക്കുമോയെന്ന കാര്യത്തിൽ റൊണാൾഡോ വ്യക്തമായ മറുപടി നൽകിയിരുന്നില്ല. ലോകകപ്പ് തന്റെ അവസാന ലോകകപ്പായിരിക്കുമെന്ന് സൂചിപ്പിച്ചിരുന്നെങ്കിലും അന്താരാഷ്ട്ര ഫുട്ബോളിൽ നിന്ന് വിരമിക്കുന്നതായി അദ്ദേഹം പ്രഖ്യാപിച്ചിരുന്നില്ല.
റൊണാൾഡോയെ ടീമിൽ ഉൾപ്പെടുത്തിയതോടെ പുതിയ പരിശീലകന്റെ കീഴിലും പോർച്ചുഗൽ ജേഴ്സിയിൽ താരത്തിന്റെ സേവനം തുടരുമെന്ന് വ്യക്തമായി. ലോകകപ്പ് പുറത്താകലിന് പിന്നാലെ റോബർട്ടോ മാർട്ടിനെസിന് പകരക്കാരനായാണ് ജോർജ് ജീസസിനെ പരിശീലകനായി നിയമിച്ചത്.
സൗദി അറേബ്യൻ ക്ലബ്ബായ അൽ-നാസറിന്റെ പരിശീലകനായിരുന്ന സമയത്ത് റൊണാൾഡോയുമായി അടുത്ത് പ്രവർത്തിച്ചിട്ടുള്ള വ്യക്തിയാണ് ജീസസ്. കഴിഞ്ഞ സീസണിൽ റൊണാൾഡോയ്ക്കൊപ്പം അൽ-നാസറിനെ ലീഗ് കിരീടത്തിലേക്ക് നയിച്ച ജീസസിന് പോർച്ചുഗീസ് നായകന്റെ കളിശൈലിയെക്കുറിച്ച് വ്യക്തമായ ധാരണയുമുണ്ട്.
എന്നാൽ ദേശീയ ടീമിൽ റൊണാൾഡോയ്ക്ക് പ്രത്യേക പരിഗണനയുണ്ടാകില്ലെന്ന് ജീസസ് വ്യക്തമാക്കി. ടീമിൽ ഉൾപ്പെട്ട മറ്റെല്ലാ താരങ്ങളെയും പോലെ പ്രകടനത്തിന്റെ അടിസ്ഥാനത്തിലായിരിക്കും റൊണാൾഡോയുടെ സ്ഥാനമെന്നും പരിശീലകൻ പറഞ്ഞു.
“വിളിക്കപ്പെട്ട എല്ലാ കളിക്കാരും എന്റെ കൈയിലുണ്ട്. അവൻ നന്നായി കളിച്ചാൽ കളിക്കും. നന്നായി കളിച്ചില്ലെങ്കിൽ കളിക്കില്ല. എല്ലാവരോടും ഞാൻ പെരുമാറുന്നത് അങ്ങനെയാണ്,” ജീസസ് മാധ്യമപ്രവർത്തകരോട് പറഞ്ഞു.
പുരുഷ അന്താരാഷ്ട്ര ഫുട്ബോളിൽ 146 ഗോളുകളുമായി ഏറ്റവും കൂടുതൽ ഗോൾ നേടിയ താരമെന്ന റെക്കോർഡ് ഇപ്പോഴും റൊണാൾഡോയുടെ പേരിലാണ്. കരിയറിൽ 1,000 ഗോളുകൾ എന്ന ചരിത്രനാഴികക്കല്ലിലേക്കും താരം അടുക്കുകയാണ്. ക്ലബ് ഫുട്ബോളിലും അന്താരാഷ്ട്ര മത്സരങ്ങളിലുമായി നിലവിൽ 979 ഗോളുകളാണ് റൊണാൾഡോയുടെ സമ്പാദ്യം.
അൽ-നാസറിനായി കളിക്കുമ്പോഴായിരിക്കും റൊണാൾഡോ 1,000-ാം ഗോൾ നേടാൻ കൂടുതൽ സാധ്യതയെന്നും ജീസസ് അഭിപ്രായപ്പെട്ടു. “പോർച്ചുഗീസ് ദേശീയ ടീമിനേക്കാൾ അൽ-നാസറിനായി അദ്ദേഹം തന്റെ ആയിരാമത്തെ ഗോൾ നേടാനുള്ള സാധ്യത കൂടുതലാണെന്ന് ഞാൻ കരുതുന്നു,” ജീസസ് പറഞ്ഞു.
സെപ്റ്റംബർ 24ന് വെയിൽസിനെതിരെയാണ് പോർച്ചുഗലിന്റെ നേഷൻസ് ലീഗ് പോരാട്ടങ്ങൾക്ക് തുടക്കമാകുന്നത്. മൂന്ന് ദിവസത്തിന് ശേഷം നോർവേയെ നേരിടും. ഒക്ടോബർ 1ന് ഡെൻമാർക്കിനെതിരെയും ഒക്ടോബർ 4ന് നോർവേയ്ക്കെതിരെയും പോർച്ചുഗൽ മത്സരത്തിനിറങ്ങും.
പോർച്ചുഗൽ ടീം
ഗോൾകീപ്പർമാർ: ഡിയോഗോ കോസ്റ്റ, റൂയി സിൽവ, സാമുവൽ സോറസ്.
ഡിഫൻഡർമാർ: ഗോൺകാലോ ഇനാസിയോ, റെനാറ്റോ വീഗ, റൂബൻ ഡയസ്, ടോമാസ് അരൗജോ, ജോവോ കാൻസലോ, ഡിയോഗോ ദലോട്ട്, നുനോ തവാരസ്, നുനോ മെൻഡസ്.
മിഡ്ഫീൽഡർമാർ: ബ്രൂണോ ഫെർണാണ്ടസ്, ജോവോ പാൽഹിൻഹ, റൂബൻ നെവ്സ്, ജോവോ നെവ്സ്, വിറ്റിൻഹ, ബെർണാഡോ സിൽവ.
ഫോർവേഡുകൾ: ക്രിസ്റ്റ്യാനോ റൊണാൾഡോ, ഫാബിയോ സിൽവ, ട്രിൻകാവോ, ഫ്രാൻസിസ്കോ കോൺസെക്കാവോ, ഗോങ്കലോ റാമോസ്, ജോവോ ഫെലിക്സ്, പെഡ്രോ നെറ്റോ, റാഫേൽ ലിയോ.
