ഇന്ത്യയിലെ ആദ്യ അന്താരാഷ്ട്ര വാർത്താ ചാനലെന്ന വിശേഷണവുമായി റിപ്പോർട്ടർ നെറ്റ്‌വർക്കിന്റെ പുതിയ സംരംഭമായ ‘റിപ്പോർട്ടർ വേൾഡ്’ ഡിജിറ്റൽ രംഗത്ത് പ്രവർത്തനം ആരംഭിച്ചു. ഔദ്യോഗിക വെബ്‌സൈറ്റിനും വിവിധ സാമൂഹിക മാധ്യമ പ്ലാറ്റ്‌ഫോമുകൾക്കുമാണ് തുടക്കമായത്. ആഗോള കാഴ്ചപ്പാടിലൂടെ ഇന്ത്യയിലെയും ലോകത്തിന്റെ വിവിധ ഭാഗങ്ങളിലെയും പ്രേക്ഷകരിലേക്ക് വാർത്തകളും വിശകലനങ്ങളും എത്തിക്കുകയാണ് ലക്ഷ്യം.
വാർത്താ വിതരണ രംഗത്ത് ഇംഗ്ലീഷ് ഭാഷയിൽ പുതിയൊരു ഇടം കണ്ടെത്താനുള്ള റിപ്പോർട്ടർ നെറ്റ്‌വർക്കിന്റെ സുപ്രധാന ചുവടുവെപ്പാണിത്. ഔദ്യോഗിക വെബ്‌സൈറ്റിന് പുറമെ ഫേസ്ബുക്ക്, യൂട്യൂബ്, ഇൻസ്റ്റഗ്രാം, എക്സ്, വാട്‌സ്ആപ്പ് ചാനലുകളിലൂടെയും റിപ്പോർട്ടർ വേൾഡ് പ്രേക്ഷകരിലേക്ക് എത്തും. വിവിധ ഡിജിറ്റൽ മാധ്യമങ്ങളെ ഏകോപിപ്പിച്ച് വാർത്തകളും വീഡിയോ റിപ്പോർട്ടുകളും മറ്റ് മൾട്ടിമീഡിയ ഉള്ളടക്കങ്ങളും ലഭ്യമാക്കാനാണ് പദ്ധതി.
ദേശീയ-അന്തർദേശീയ വാർത്തകൾക്കൊപ്പം രാഷ്ട്രീയം, ബിസിനസ്, കായികം, സംസ്കാരം, വിനോദം, ജീവിതശൈലി തുടങ്ങി വിവിധ മേഖലകളിലെ സംഭവവികാസങ്ങൾക്കും റിപ്പോർട്ടർ വേൾഡ് പ്രാധാന്യം നൽകും. നേരിട്ട് തയ്യാറാക്കുന്ന വാർത്താ റിപ്പോർട്ടുകൾ, പ്രത്യേക ഫീച്ചറുകൾ, ഗവേഷണാധിഷ്ഠിത വിശദീകരണങ്ങൾ, ദൃശ്യ-ശ്രാവ്യ ഉള്ളടക്കങ്ങൾ എന്നിവയും പ്ലാറ്റ്‌ഫോമിൽ ഉൾപ്പെടുത്തിയിട്ടുണ്ട്. ഇന്ത്യയിലെ വാർത്തകൾക്ക് ആഗോള പശ്ചാത്തലവും ലോകസംഭവങ്ങൾക്ക് ഇന്ത്യൻ കാഴ്ചപ്പാടും നൽകുന്ന ഉള്ളടക്കങ്ങൾ അവതരിപ്പിക്കുകയാണ് ലക്ഷ്യമിടുന്നത്.
വെബ്‌സൈറ്റിൽ Explained, Exclusives എന്നീ വിഭാഗങ്ങൾക്കാണ് പ്രത്യേക പ്രാധാന്യം. സങ്കീർണമായ ദേശീയ-അന്തർദേശീയ വിഷയങ്ങൾ വിശദമായ പഠനത്തിന്റെയും ഗവേഷണത്തിന്റെയും അടിസ്ഥാനത്തിൽ ലളിതമായി അവതരിപ്പിക്കുകയാണ് Explained വിഭാഗത്തിന്റെ ലക്ഷ്യം. പ്രധാനപ്പെട്ട വിഷയങ്ങളുടെ പശ്ചാത്തലം, കാരണങ്ങൾ, പ്രത്യാഘാതങ്ങൾ എന്നിവ വായനക്കാർക്ക് വ്യക്തമായി മനസ്സിലാക്കാൻ സഹായിക്കുന്ന വിശദീകരണങ്ങളും ഇവിടെ ലഭ്യമാകും.
പ്രത്യേക വാർത്തകൾക്കും പ്രേക്ഷകർക്ക് പുതുമയുള്ള വിവരങ്ങൾ നൽകുന്ന ഉള്ളടക്കങ്ങൾക്കുമായി Exclusives വിഭാഗവും ഒരുക്കിയിട്ടുണ്ട്. ഇതിനുപുറമെ വിനോദം, ജീവിതശൈലി, ഭക്ഷണം, യാത്ര തുടങ്ങിയ മേഖലകളിലെ വാർത്തകളും വിശേഷങ്ങളും ഉൾക്കൊള്ളുന്ന Culture വിഭാഗവും വെബ്‌സൈറ്റിലുണ്ട്. വിവിധ വിഷയങ്ങളിലുള്ള വീഡിയോകളും മറ്റ് ഡിജിറ്റൽ ഉള്ളടക്കങ്ങളും പ്ലാറ്റ്‌ഫോമിലൂടെ ലഭ്യമാകും.
ഡിജിറ്റൽ വാർത്താ ഉപഭോഗം അതിവേഗം മാറുന്ന സാഹചര്യത്തിൽ, വിശ്വാസ്യതയും ആഴത്തിലുള്ള വാർത്താ വിശകലനവും ആഗോള കാഴ്ചപ്പാടും മുൻനിർത്തിയാണ് റിപ്പോർട്ടർ വേൾഡ് രംഗത്തെത്തുന്നത്. ഇന്ത്യയുടെ അതിർത്തികൾക്കപ്പുറമുള്ള വാർത്തകളും സംഭവവികാസങ്ങളും മലയാളികൾ ഉൾപ്പെടെയുള്ള ഇന്ത്യൻ പ്രേക്ഷകർക്ക് മാത്രമല്ല, ലോകമെമ്പാടുമുള്ള ഇംഗ്ലീഷ് വായനക്കാർക്കും പ്രേക്ഷകർക്കും മുന്നിലെത്തിക്കുകയാണ് പുതിയ സംരംഭത്തിന്റെ ലക്ഷ്യം.
റിപ്പോർട്ടർ വേൾഡ് യൂട്യൂബ് ചാനൽ: https://www.youtube.com/@Reporterworldofficial
