മാഫിയകളുടെ സമഗ്രാധിപത്യം ബിജെപിയുടെ കാൽച്ചുവട്ടിലാക്കുന്ന യോഗി

| സുധീഷ് സുധാകരൻ

ആതിഖ് അഹമ്മദിനെ വെടിവെച്ചു കൊലപ്പെടുത്തിയതുപോലുള്ള സംഭവങ്ങൾ ഉത്തർ പ്രദേശിന് പുതുമയൊന്നുമല്ല. യുപിയിലെ ഗുണ്ടാ മാഫിയാ രാഷ്ട്രീയം തുടങ്ങിവെച്ചത് ബിജെപിയുമല്ല. സമാജ്‌വാദി പാർട്ടിയാണ് (ആയിരുന്നു?) ഇന്ത്യയിലെ തന്നെ ഏറ്റവും വലിയ ഗുണ്ടാ/ക്രിമിനൽ പാർട്ടിയെന്ന് പറയാം‌‌. യുപിയുടെ രാഷ്ട്രീയം തന്നെ ഗൂണ്ടാരാജാണ്. യോഗി ആദിത്യനാഥ് ഇപ്പോൾ ചെയ്യുന്നത് സമാജ് വാദി പാർട്ടിയുടെ പ്രതാപകാലത്തുണ്ടായിരുന്ന് മുസ്ലീം ആയ ഗുണ്ടകളെ തെരെഞ്ഞുപിടിച്ച് ഇല്ലാതാക്കുകയാണ്.

ഗുണ്ടകളെയോ ക്രിമിനലുകളെയോ ഗുണ്ടായിസത്തെയോ ഇല്ലാതാക്കുകയല്ല മറിച്ച് അതിലെ മുസ്ലീം ആയവരെ ഇല്ലാതാക്കി മാഫിയകളുടെ സമഗ്രാധിപത്യം ബിജെപിയുടെ കാൽച്ചുവട്ടിലാക്കുക എന്നതാണ്. അങ്ങനെയല്ല എന്നഭിപ്രായമുള്ള സംഘികൾ “സാക്ഷി മഹാരാജ്” എന്നൊന്ന് ഗൂഗിൾ ചെയ്ത് നോക്കുക.

സമാജ്‌വാദി പാർട്ടി നേതാവും പാർലമെന്റേറിയനുമായിരുന്ന സാക്ഷി മഹാരാജെന്ന സ്വാമി സച്ചിദാനന്ദ ഹരി യുപി വനിതാ കമ്മീഷൻ അധ്യക്ഷയായ സുജാത വെർമയെ വെടിവെച്ചുകൊന്നതടക്കം 35ഓളം കേസുകളിൽ പ്രതിയാണ്. ഇദ്ദേഹത്തിന്റെ പേരിലുള്ള കേസുകളിൽ കൊലയും കൊള്ളയും ബലാൽസംഗവുമെല്ലാം ഉണ്ട്. പക്ഷേ സാക്ഷി മഹാരാജിപ്പോൾ ബിജെപി എംപിയാണ്.

യോഗി അധികാരത്തിലെത്തിയ ശേഷം യുപിയിൽ നടന്ന 10713 പൊലീസ് എൻകൗണ്ടറുകളിലായി കൊല്ലപ്പെട്ടത് 63 പേരാണ്. കേസുകളിൽ അറസ്റ്റിലാകുന്നവരുടെ വീടുകൾ ഇല്ലീഗൽ കൺസ്ട്രക്ഷൻ ആണെന്ന് നോട്ടീസ് കൊടുത്ത് ബുൾഡോസർ കൊണ്ട് തകർക്കുന്ന “ബുൾഡോസർ രാഷ്ട്രീയം” രാജ്യത്തിന് സംഭാവന ചെയ്തതും യോഗി സർക്കാർ ആണ്. ഇത് ഒരു രോഗം പോലെ രാജ്യത്ത് ബിജെപി ഭരിക്കുന്ന സംസ്ഥാനങ്ങളിലേയ്ക്ക് പടർന്നിട്ടുണ്ട്.

ഉത്തർ പ്രദേശിൽ ബുൾഡോസർ ഒരു ട്രെൻഡിങ് ഓബ്ജക്ട് ആയിട്ടുണ്ട്. വിവാഹപ്പാർട്ടികൾക്ക് വരൻ ബുൾഡോസറിൽ വരിക, സ്ത്രീധനമായി ബുൾഡോസർ കൊടുക്കുക തുടങ്ങിയ ആചാരങ്ങൾ ഈ ട്രെൻഡിന്റെ ഭാഗമാണ്. ഒരു നാഷണൽ ലെവൽ ഹൈപ്പർ ലോക്കൽ ന്യൂസ് സംവിധാനത്തിന്റെ ഭാഗമായതുകൊണ്ടുതന്നെ ഇത്തരം ട്രെൻഡുകൾ ഗ്രൗണ്ട് ലെവലിൽ എങ്ങനെയാണ് വർക്ക് ചെയ്യുന്നതെന്ന് മനസിലാക്കാൻ കഴിയുന്നുണ്ട്.

ആതിഖ് അഹമ്മദിന്റെ കൊലപാതകം ട്വിറ്ററിൽ ട്രെൻഡിങ് ആകുന്നതെങ്ങനെയെന്ന് നോക്കുക. “യോഗി കിങ്ങ് ഓഫ് നോർത്ത്” എന്നതായിരുന്നു ഇന്നലെ രാത്രി ട്വിറ്ററിലെ ട്രെൻഡിങ് കീവേർഡ്. അപകടകരമായ രാഷ്ട്രീയത്തിലേയ്ക്കാണ് ഇത് വിരൽ ചൂണ്ടുന്നത്. ആതിഖിന്റെ കൊലപാതകത്തെയല്ല, മറിച്ച് അത് ആഘോഷിക്കപ്പെടുന്നതിന്റെ രാഷ്ട്രീയത്തെയാണ് നാം ആശങ്കയോടെ നോക്കിക്കാണേണ്ടത്.

( കടപ്പാട്- ഫേസ്ബുക്ക് പോസ്റ്റ് )