ഐസിസിയുടെ ടെസ്റ്റ് റാങ്കിംഗിൽ ന്യൂസിലാണ്ടിനെ പിന്തള്ളി ഒന്നാം സ്ഥാനം കരസ്ഥമാക്കി ഇന്ത്യ. മുംബൈ ടെസ്റ്റിൽ സ്വന്തമാക്കിയ വൻ വിജയത്തോടെ പരമ്പര സ്വന്തമാക്കിയ ഇന്ത്യയ്ക്ക് ഇപ്പോള് 124 പോയിന്റാണുള്ളത്. നിലവിൽ ന്യൂസിലാണ്ടിന് 3 പോയിന്റ് നഷ്ടമായി, 121 പോയിന്റുമായി രണ്ടാം സ്ഥാനത്തേക്ക് പിന്തള്ളപ്പെട്ടു.
കാന്പൂരിൽ നടന്ന ആദ്യ ടെസ്റ്റിൽ ഇന്ത്യയ്ക്ക് വിജയം നിഷേധിക്കുവാന് ന്യൂസിലാണ്ടിന് സാധിച്ചുവെങ്കിലും പിന്നീടുള്ള രണ്ടാം ടെസ്റ്റിൽ കനത്ത പരാജയം ആണ് ടീം നേരിട്ടത്. ഇതോടൊപ്പം അന്താരാഷ്ട്ര ക്രിക്കറ്റിൽ വിരാട് കോഹ്ലി തിങ്കളാഴ്ച മറ്റൊരു നാഴികക്കല്ല് കൂടി പിന്നിടുകയുണ്ടായി. ന്യൂസിലൻഡിനെതിരെ ഇന്ത്യ 372 റൺസിന്റെ വൻ വിജയം നേടിയപ്പോൾ അത് കോഹ്ലിയെ ക്രിക്കറ്റിലെ എല്ലാ ഫോർമാറ്റിലും ചുരുങ്ങിയത് 50 മത്സരങ്ങൾ എങ്കിലും വിജയിക്കുന്ന ആദ്യ ക്രിക്കറ്റ് താരമായിമാറുന്ന നേട്ടത്തിൽ എത്തിച്ചു.
ടെസ്റ്റ് ക്രിക്കറ്റിൽ കോഹ്ലിയുടെ 50ആം വിജയമായിരുന്നു ഇത്. ഏകദിന മത്സരങ്ങളിൽ 153 വിജയങ്ങളും ടി20യിൽ 59 വിജയങ്ങൾ ഇന്ത്യൻ ജേഴ്സിയിൽ കോഹ്ലി സ്വന്തമാക്കിയിട്ടുണ്ട്.
