പികെ സുരേഷ് കുമാർ
കേരളത്തിൽ അധിക മഴയും പ്രളയവും ഉണ്ടാകുന്നത് ഗാഡ്ഗിൽ റിപ്പോർട്ട് നടപ്പാക്കത്തതു കൊണ്ട്… അപ്പോൾ ഉത്തരാഖണ്ഡിൽ മിന്നൽ പ്രളയം ഉണ്ടാകുന്നത് ഏത് റിപ്പോർട്ട് നടപ്പാക്കാത്തതു കൊണ്ടാണ് ? മഹാരാഷ്ട്രയിൽ ഈ വർഷം പ്രളയം ഉണ്ടായത് ഏത് റിപ്പോർട്ട് നടപ്പാക്കാത്തതു കൊണ്ടാണ് ? ആഗോള കാലാവസ്ഥ വ്യതിയാനത്തിന്റെ ഭാഗമായിട്ടാണ് ക്രമം തെറ്റിയ മഴയും , അധിക മഴയും മേഘ വിസ്ഫോടനങ്ങളും മിന്നൽ പ്രളയങ്ങളും ഉണ്ടാകുന്നത് എന്ന് മിനിമം ഒരു തിരിച്ചറിവ് എങ്കിലും ഉണ്ടാകണം.
മാധവ ഗാട്ഗിലും കസ്തൂരിരംഗനും ജനിക്കുന്നതിനും മുൻപ് 1924 ൽ ഇടുക്കിയിൽ ഒരു പേമാരിയും വെള്ളപ്പൊക്കവും ഉണ്ടായി. അന്ന് ആരും മരം വെട്ടിയിട്ടില്ല ,കരിങ്കൽ ക്വറി ഉണ്ടായിട്ടില്ല ,താന്നാണ്ട് കൃഷി ആരും ചെയ്തു തുടങ്ങിയിട്ടേയില്ല. എന്നിട്ടും മഴ പെയ്തു , വെള്ളം പൊങ്ങി …. ഇടുക്കിയിലെ ആദ്യ റെയിൽവേ തകർന്നു.ആലുവയിൽ നിന്ന് തട്ടേക്കാട് – കുട്ടമ്പുഴ – പൂയംകുട്ടി – കുഞ്ചിയാർ – മാങ്കുളം വഴി മൂന്നാറിലേക്ക് ഉണ്ടായിരുന്ന റോഡ് തകർന്നു.
അക്കാലത്ത് മുല്ലപ്പെരിയാർ അല്ലാതെ ഒരു അണക്കെട്ട് പോലും കേരളത്തിൽ ഉണ്ടായിരുന്നില്ല. പഴമക്കാർ പറയുന്ന 99 ലെ വെള്ളപ്പൊക്കം എന്ന 1924 ലെ പ്രളയത്തിന് ഇടയാക്കിയ മഴയുടെ ഇരട്ടിയോളം 2018 ൽ ഒറ്റയടിക്ക് പെയ്തിറങ്ങിയതാണ് പെരിയാറിലെ പ്രളയത്തിന് കാരണമായത്. 1924 ലെ പ്രളയത്തിന്റെ ഭാഗമായി ഉണ്ടായതാണ് കൊച്ചി വെല്ലിങ്ങ്ടൺ ഐലന്റ്. ( കൊച്ചി തുറമുഖവും സതേൺ നേവൽ കമാന്റും സ്ഥിതി ചെയ്യുന്ന ഐലന്റ് തന്നെ… )
അതിനും നൂറ്റാണ്ടുകൾക്ക് മുമ്പ് 1341 ൽ ഉണ്ടായ മഹാപ്രളയത്തിലാണ് മുസിരിസ് പട്ടണവും തുറമുഖം അടക്കമുള്ള പ്രദേശങ്ങൾ തകർന്ന് മണ്ണിനടിയിൽ ആയത്. ആ പ്രളയത്തിന്റെ ഭാഗമായി ഉണ്ടായതാണ് വൈപ്പിൻ ദ്വീപ്. എടവനക്കാട്, എളങ്കുന്നപ്പുഴ, കുഴുപ്പിള്ളി, നായരമ്പലം, ഞാറയ്ക്കൽ, പള്ളിപ്പുറം എന്നീ പഞ്ചായത്തുകളാണ് വൈപ്പിൻ ദ്വീപിൽ ഉള്ളത്.
ഈ പേമാരിയും വെള്ളപ്പൊക്കവും ഉണ്ടാകുന്നതിനു കൃത്യമായ കാരണങ്ങൾ ഉണ്ട് ..അത് ചർച്ച ചെയ്യണം, പഠിക്കണം.അല്ലാതെ കുടിയേറ്റക്കാരുടെ നെഞ്ചത്തേക്ക് കയറുകയല്ല വേണ്ടത്.