പോളണ്ടിൽ സമീപകാലത്തായി 45-ലധികം പൂച്ചകൾ അജ്ഞാത ലക്ഷണങ്ങളോടെ ചത്ത സംഭവത്തിന് പിന്നിൽ പക്ഷിപ്പനിയാണെന്ന് ലോകാരോഗ്യ സംഘടന (ഡബ്ല്യുഎച്ച്ഒ) സ്ഥിരീകരിച്ചു. ഇതുവരെയുള്ള ചരിത്രത്തിൽ ലോകത്ത് ഇതാദ്യമായാണ് ഒരു പ്രദേശത്ത് ഒരേ സമയം ഇത്രയും പൂച്ചകളിൽ പക്ഷിപ്പനി സ്ഥിരീകരിക്കുന്നത്.
എന്നാൽ ഈ രോഗം മനുഷ്യരിലേക്ക് പടരാനുള്ള സാധ്യത കുറവാണ്. പോളണ്ടിലെ വിവിധങ്ങളായ 13 പ്രദേശങ്ങളിൽ പൂച്ചകളുടെ അസ്വാഭാവിക മരണത്തെക്കുറിച്ച് കഴിഞ്ഞ മാസം അവസാനം പോളിഷ് അധികൃതർ ലോകാരോഗ്യ സംഘടനയെ അറിയിച്ചു. പിന്നാലെ നടത്തിയ അന്വേഷണത്തിൽ, പരിശോധിച്ച 46 പൂച്ചകളിൽ 29 എണ്ണം പക്ഷിപ്പനിയുടെ H5N1 സ്‌ട്രെയിന് പോസിറ്റീവ് ആയിരുന്നു. ഇവയിൽ മുക്കാൽ ഭാഗവും വളർത്തു പൂച്ചകളാണ്. ഇതിൽ 14 പേരെ ദയാവധം ചെയ്തു. 11 പേർ മരിച്ചു.
പക്ഷിപ്പനി ബാധിച്ച് പൂച്ചയുടെ മരണം ജൂൺ 30-നാണ് അവസാനമായി രേഖപ്പെടുത്തിയിരിക്കുന്നത്. ഈ പൂച്ചകളുമായി സമ്പർക്കം പുലർത്തിയ മനുഷ്യർക്ക് ഇതുവരെ ഒരു പ്രശ്‌നവും ഉണ്ടായിട്ടില്ല. അതേസമയത്ത്, എങ്ങനെയാണ് പൂച്ചകളിലേക്ക് വൈറസ് പടർന്നതെന്ന് വ്യക്തമല്ല. 2021 മുതൽ യൂറോപ്പിൽ പക്ഷിപ്പനി കേസുകൾ വർധിച്ചുവരികയാണ്. ലക്ഷക്കണക്കിന് നാടൻ കോഴികളെയും മറ്റും കൊല്ലേണ്ടി വന്നു. മിക്ക കേസുകളിലും H5N1 വേരിയന്റ് കണ്ടെത്തി. 1996-ലാണ് ഈ വകഭേദം ആദ്യമായി തിരിച്ചറിഞ്ഞത്.
പൂച്ചകളിൽ പക്ഷിപ്പനി മുമ്പ് റിപ്പോർട്ട് ചെയ്യപ്പെട്ടിട്ടുണ്ട്, എന്നാൽ ഒരു രാജ്യത്തിനുള്ളിലെ ഒരു വലിയ പ്രദേശത്ത് ഇത്രയധികം കേസുകൾ കണ്ടെത്തിയത് ഗവേഷകർക്കിടയിൽ ആശങ്കയുണ്ടാക്കുന്നു. 2020 മുതൽ, WHO മനുഷ്യരിൽ 12 H5N1 കേസുകൾ റിപ്പോർട്ട് ചെയ്തിട്ടുണ്ട്. ഇതിൽ നാല് പേരുടെ നില അതീവ ഗുരുതരമാണ്. കോവിഡ് -19 പകർച്ചവ്യാധിയുടെ പശ്ചാത്തലത്തിൽ, മനുഷ്യരിലേക്ക് പടരാൻ സാധ്യതയുള്ള മൃഗങ്ങളിലൂടെ പകരുന്ന രോഗങ്ങളെ ആരോഗ്യ വിദഗ്ധർ സൂക്ഷ്മമായി നിരീക്ഷിച്ചുവരികയാണ്.
ലോകമെമ്പാടുമുള്ള കാട്ടുപക്ഷികളിലും വളർത്തുപക്ഷികളിലും സസ്തനികളിലും കണ്ടുവരുന്ന H5N1 പക്ഷിപ്പനി അടുത്ത കാലത്തായി പടരുന്ന സാഹചര്യത്തിൽ മനുഷ്യർ ജാഗ്രത പാലിക്കണമെന്ന് ലോകാരോഗ്യ സംഘടന മുന്നറിയിപ്പ് നൽകിയിട്ടുണ്ട്. H5N1 കൂടാതെ H7N9, H5N8, കൂടാതെ H10N3 തരം പക്ഷിപ്പനി മനുഷ്യരിലും സ്ഥിരീകരിച്ചിട്ടുണ്ട്. നിലവിൽ, പക്ഷികളിൽ നിന്ന് മനുഷ്യരിലേക്കും മനുഷ്യരിൽ നിന്ന് മനുഷ്യരിലേക്കും H5N1 പകരാനുള്ള സാധ്യത വളരെ വിരളമാണ്. എന്നാൽ ജനിതകമാറ്റം സ്ഥിതിഗതികൾ വിപരീതമാക്കുമോ എന്നത് പ്രവചനാതീതമാണ്.
