ചരിത്രം സൃഷ്ടിച്ച ചൈനയുടെ പലസ്തീൻ അനുരഞ്ജന ചർച്ച

| രഞ്ജിത്ത് പി തങ്കപ്പൻ

നിങ്ങൾ മുഖ്യധാരാ മാധ്യമങ്ങളിൽ ഈ വാർത്ത കാണില്ല. കാരണം ഇത്തരം ലോക വാർത്തകൾ സൃഷ്ടിക്കുന്ന ഒരു സ്വാധീനം ഉണ്ട്. അതവർ ഇഷ്ടപ്പെടുന്നില്ല. 2024 ജൂലൈ 23 നു ചൈനയിൽ വച്ച് പലസ്തീനിലെ വിഘടിത ഗ്രൂപ്പുകളെ എല്ലാം ഒരു മേശക്കു ചുറ്റും വരുത്തി സമാധാനത്തിലേക്കും പലസ്തീൻ ജനതയുടെ ദുരിതങ്ങൾക്കുള്ള മോചനത്തിനുമായി ഒരു ചരിത്ര ഉടമ്പടി ഉണ്ടാക്കിയിരിക്കയാണ് കമ്മ്യൂണിസ്റ്റ് ചൈന.

അങ്ങനെ PLO, FATAH , HAMAS അടക്കമുള്ള 14 പലസ്തീൻ ഗ്രൂപ്പുകളും ഒപ്പം ഈജിപ്റ്റ് , അൾജീരിയ, ഖത്തർ, സൗദി അറേബിയ, ജോർദ്ദാൻ, സിറിയ, ലെബനൻ, റഷ്യ, തുർക്കി തുടങ്ങിയ രാഷ്ട്ര പ്രതിനിധികളും പങ്കെടുത്ത ഈ ചരിത്രപരമായ ഉടമ്പടിയിൽ. പലസ്തീൻ എന്ന മാതൃ രാജ്യത്തിൻറെ മോചനത്തിനും വികസനത്തിനുമായി ഒരുമിച്ചു പ്രവർത്തിക്കാനും, ഒപ്പം Palestine Liberation Organization (PLO) യെ തങ്ങൾക്കായുള്ള ഏക അന്താരാഷ്ട്ര ശബ്ദമായി അംഗീകരിക്കുവാനും തീരുമാനിച്ചു.

അതായതു വിവിധ ഗ്രൂപ്പുകളെ തമ്മിൽത്തല്ലിച്ചുകൊണ്ടുള്ള അമേരിക്കൻ ഇസ്രായേൽ കളികൾ ഇനി നടക്കാൻ പോകുന്നില്ല എന്ന് ചുരുക്കം. തങ്ങളിൽ ആരെയെങ്കിലും വിളിച്ചു ചർച്ചകൾ നടത്തേണ്ടതില്ല ഇനി മുതൽ പി എൽ ഓ ആണ് തങ്ങളുടെ അന്താരാഷ്ട്ര ചർച്ചയ്ക്കുള്ള പ്രതിനിധി സംഘടന എന്നവർ ഒരുമിച്ചു വിളിച്ചുപറഞ്ഞു. ലോകത്തു സമാധാനമാണ് വേണ്ടത്. സമാധാനമാണ് പുരോഗതിയിലേക്കും വികസനത്തിലേക്കുമുള്ള പാത എന്ന ചൈനീസ് സമീപനം ആണ് അവർ ഉയർത്തിപിടിച്ചതും.

ഈ ചർച്ചകൾ നടക്കുന്ന അതേസമയത്തുതന്നെ ഉക്രൈൻ വിദേശകാര്യ മന്ത്രി ദിമിത്രി കുലേബയും റഷ്യ ഉക്രൈൻ സംഘർഷം അവസാനിപ്പിക്കാനുള്ള ചൈനീസ് മധ്യസ്ഥതയിൽ ചർച്ചകൾക്കായി ചൈനയിൽ എത്തിയതും എന്നതും ശ്രദ്ധേയമാണ്. അതെ..കമ്മ്യൂണിസ്റ്റ് ചൈന ലോകത്തിന്റെ പ്രതീക്ഷയാവുകയാണ്.. അവർ എപ്പോഴും പറയുന്നത് നമുക്ക്, മുഴുവൻ ലോകത്തിനും ഒരുമിച്ചു മുന്നേറാം എന്നാണ് .അല്ലാതെ ഏതെങ്കിലും കുറച്ചുപേർക്ക് മാത്രമായി വികസിക്കും എന്നല്ല.

വിഭജിക്കുകയും തമ്മിൽ തല്ലിക്കുകയും ചെയ്യുന്ന അമേരിക്കൻ സാമ്രാജ്യത്വത്തിനെതിരായ ഏറ്റവും ഫലപ്രദമായ നടപടികൾക്ക് തന്നെയാണ് ചൈന തുടക്കം കുറിച്ചിരിക്കുന്നതും. ഇതാവട്ടെ ഒരു സുപ്രഭാതത്തിൽ ആരംഭിച്ചതും അല്ല . വർഷങ്ങളായുള്ള ചർച്ചകളാണ് ഇവക്കൊക്കെ റിസൾട്ടുകൾ ഉണ്ടാക്കുന്നതും. പതിറ്റാണ്ടുകളായി നിലനിന്ന സൗദി അറേബിയ- ഇറാൻ സംഘർഷം അവസാനിപ്പിച്ചുകൊണ്ട് വികസനത്തിലേക്കു ഒരുമിച്ചു മുന്നേറാൻ ചൈനയുടെ മധ്യസ്ഥതയിൽ സൗദിയും, ഇറാനും കൈകൊടുത്തപ്പോൾ ഞെട്ടിയ സാമ്രാജ്യത്വം ഇനിയും ഞെട്ടുകതന്നെ ചെയ്യും.