കേന്ദ്രഭരണ പ്രദേശമായ ലഡാക്കിൽ ഇന്ന് കേന്ദ്രം അഞ്ച് പുതിയ ജില്ലകൾ സൃഷ്ടിച്ചു. നിലവിൽ സംസ്ഥാനത്തെ ആകെ ജില്ലകളുടെ എണ്ണം ഏഴായി. സൻസ്കർ, ദ്രാസ്, ഷാം, നുബ്ര, ചാങ്താങ് എന്നിവയാണ് പുതുതായി സൃഷ്ടിച്ച അഞ്ച് ജില്ലകൾ.
കേന്ദ്ര ഭരണ പ്രദേശത്തിൻ്റെ നിലവിലുള്ള രണ്ട് ജില്ലകൾ ലേയും കാർഗിലും ആണ്. സോഷ്യൽ മീഡിയയിൽ എക്സ് പോസ്റ്റിലൂടെയാണ് കേന്ദ്ര ആഭ്യന്തര മന്ത്രി അമിത് ഷാ കേന്ദ്രത്തിൻ്റെ തീരുമാനം അറിയിച്ചത്.
“വികസിതവും സമൃദ്ധവുമായ ലഡാക്ക് കെട്ടിപ്പടുക്കാനുള്ള പ്രധാനമന്ത്രി നരേന്ദ്രമോദിയുടെ കാഴ്ചപ്പാട് പിന്തുടരുന്നതിനായി, കേന്ദ്രഭരണപ്രദേശത്ത് അഞ്ച് പുതിയ ജില്ലകൾ സൃഷ്ടിക്കാൻ എംഎച്ച്എ തീരുമാനിച്ചു. പുതിയ ജില്ലകളായ സൻസ്കാർ, ദ്രാസ്, ഷാം, നുബ്ര, ചാങ്താങ് എന്നിവ എല്ലാ മുക്കിലും മൂലയിലും ഭരണം ശക്തിപ്പെടുത്തി ജനങ്ങൾക്ക് വേണ്ടിയുള്ള ആനുകൂല്യങ്ങൾ അവരുടെ വീട്ടുപടിക്കൽ എത്തിക്കും, ”- അമിത് ഷാ പോസ്റ്റിൽ പറഞ്ഞു.
ലഡാക്കിലെ ജനങ്ങൾക്ക് ധാരാളം അവസരങ്ങൾ സൃഷ്ടിക്കാൻ മോദി സർക്കാർ പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു.
