| ശ്യാം സോർബ
ഈസ്റ്റ് കോസ്റ്റ് വിജയൻ സംവിധാനം ചെയ്ത് തിയേറ്ററുകളിൽ പ്രദർശനത്തിനെത്തിയ സിനിമയാണ് ചിത്തിനി. വനത്തോട് ചേർന്ന് കിടക്കുന്ന ഒരു പ്രദേശവും, അവിടുത്തെ ചിത്തിനി എന്ന പ്രേതവും, ആ പ്രേതത്തിന്റെ ഭൂതകാലവും പകയും, അതിനെ ചുറ്റിപറ്റിയുമാണ് സിനിമ മുന്നോട്ട് പോകുന്നത്.
അമിത്ത് ചക്കലക്കൽ, വിനയ് ഫോർട്ട്, മോക്ഷ, എനാക്ഷി ഗാംഗുലി, ആരതി നായർ, ജോണി ആന്റണി, സുധീഷ്, ശ്രീകാന്ത് മുരളി, ജോയ് മാത്യു, പോളി വില്സൺ എന്നിങ്ങനെ വലിയ താരനിരയെ തന്നെ അണിനിരത്തിക്കൊണ്ടാണ് ഈസ്റ്റ് കോസ്റ്റ് വിജയൻ ചിത്തിനി എന്ന സിനിമ അണിയിച്ചൊരുക്കിയിരിക്കുന്നത്.
ഹൊറർ, ക്രൈം ത്രില്ലെർ, ഫാമിലി എന്റർടൈൻമെന്റ് കാറ്റഗറി വിഭാഗത്തിലേക്ക് ആണ് ചിത്തിനി എന്ന സിനിമയെ ചേർത്ത് വെച്ചിരിക്കുന്നത്. കഥയിലും മേക്കിങ്ങിലും പുതുമകൾ ഒന്നും അവകാശപ്പെടാൻ ഇല്ലാത്ത സിനിമയാണ് ചിത്തിനി എന്ന് പറയാം.
പൊതുവെ പ്രേത സിനിമകളിൽ എല്ലാം തന്നെ കണ്ട് വരുന്ന രീതിയിൽ ഒരു നാട്, അവിടുത്തെ നാട്ടുകാരുടെ സമാധാനം നശിപ്പിക്കുന്ന പ്രേതം, ആ പ്രേതത്തിന്റെ ഭൂതകാലം അന്വേഷിച്ചു കണ്ടെത്തുന്ന നായക സംഘം, ഒടുവിൽ പ്രേതത്തിന്റെ പകരം വീട്ടൽ എന്നിങ്ങനെ വികസിപ്പിച്ചെടുത്ത, മലയാള സിനിമ പ്രേക്ഷകർ കാലങ്ങളായി കണ്ട് മടുത്ത പ്രേത സിനിമകളുടെ സ്ഥിരം ശൈലി തന്നെയാണ് ചിത്തിനിയിലും.
സാങ്കേതികതയിൽ സിനിമറ്റോഗ്രാഫിയുടെ സാധ്യതകളെ പരമാവധി ഉപയോഗിച്ചുകൊണ്ട് ഒരു ഹൊറർ ഫീൽ ഉണ്ടാക്കിയെടുക്കാൻ സിനിമട്ടോഗ്രാഫർ ആയ രതീഷ് റാം ശ്രമിച്ചിട്ടുണ്ട്. വന്നതിന്റെ ഭംഗി, നിഗൂഢത, തുടങ്ങിയ ദൃശ്യങ്ങളെ പരമാവധി ഭംഗി ആക്കുവാൻ ഡ്രോൺ ക്യാമറ ഷോട്ടുകളുടെ ഒരു അതിപ്രസരം തന്നെ സിനിമയിൽ കാണാം. ഒപ്പം എഡിറ്റർ ആയ ജോണി കുട്ടിയും കൂടെ ചേരുമ്പോൾ എവിടെയൊക്കെയോ അൽപ്പമെങ്കിലും ഒരു ഹൊറർ ഫീൽ ഉണ്ടാക്കിയെടുക്കാൻ സിനിമയ്ക്ക് സാധിക്കുന്നുണ്ട്. രഞ്ജിൻ രാജിന്റെ സംഗീതവും കൂടെ ചേർത്ത് സാങ്കേതികതയിൽ വളരെ റിച്ച് ആയ ഒരു അനുഭൂതി സിനിമ നിർമ്മിച്ചെടുക്കുന്നു.
അസാമാന്യ അഭിനയം കാഴ്ച്ചവെച്ചു എന്ന് പറയാൻ മാത്രമുള്ള ഒരു അവതരണം ആരിൽ നിന്നും ഉണ്ടായിട്ടില്ല എങ്കിലും എല്ലാ അഭിനേതാക്കളും തങ്ങൾക്ക് കിട്ടിയ കഥാപാത്രത്തെ പരമാവധി നന്നാക്കാൻ ശ്രമിച്ചിട്ടുണ്ട്. കള്ളനും ഭഗവതിയും എന്ന സിനിമയിലൂടെ ഈസ്റ്റ് കോസ്റ്റ് വിജയൻ തന്നെ മലയാളികൾക്ക് പരിചയപ്പെടുത്തിയ ബംഗാളി നായിക മോക്ഷയ്ക്ക് ഒപ്പം ബംഗാളിൽ നിന്നും മറ്റൊരു പുതുമുഖത്തെ കൂടെ ഈ സിനിമയിലൂടെ അദ്ദേഹം മലയാളികൾക്ക് പരിചയപ്പെടുത്തുന്നു. സിനിമയുടെ ടൈറ്റിൽ റോൾ ആയ ചിത്തിനിയിലൂടെ എനക്ഷി ഗാംഗുലി മലയാള സിനിമയിലേക്ക് പ്രവേശിക്കുന്നു.
സിനിമയിലെ നല്ലതും പോരായ്മകളും പറയുന്ന കൂട്ടത്തിൽ എടുത്തു പറയേണ്ട ഒരു പോരായ്മയെ അടയാളപ്പെടുത്താതെ വയ്യ, അത് ഡബ്ബിങ്, ലിപ് സിങ്കിങ് എന്നിവയാണ്. പല അവസരങ്ങളിലും മലയാളികൾ ആയ അഭിനേതാക്കളുടെ ഉൾപ്പെടെ ലിപ് സിങ്ക് നഷ്ടമായ അവസരങ്ങൾ ഉണ്ട്, അത് ആസ്വാധനത്തിൽ ഒരു വലിയ കല്ലുകടിയാണ്.
അഭിനേതാക്കളിൽ മോക്ഷ എന്ന നായികയുടെ ഫിസിക്കൽ ഫ്ലെക്സിബിലിറ്റി എടുത്തു പറയേണ്ടതാണ്. ഡാൻസ്, മാർഷിയൽ ആർട്ട് എന്നിവ കൂട്ടി ചേർത്ത് ഒരുക്കിയ ചില കോരിയൊഗ്രാഫി രംഗങ്ങൾ വളരെ അനായാസമാണ് മോക്ഷ കൈകാര്യം ചെയ്തിരിക്കുന്നത്.
ചിത്തിനി മലയാളത്തിൽ പുതുമകൾ ഒന്നും അവകാശപ്പെടാൻ ഇല്ലാത്ത, എന്നാൽ രംഗാവിഷ്ക്കാരങ്ങളിലെ റിച്ച് ഫീൽ കൊണ്ടും അടയാളപ്പെടുത്തും.
