സ്മാർട്ട്ഫോൺ വിപണിയിലെ മികച്ച ബ്രാൻഡായ സാംസങ് ഫിറ്റ്നസ് വിയറബിള് ഡിവൈസായ സാംസങ് ഗ്യാലക്സി റിങ് ഇന്ത്യൻ വിപണിയിൽ അവതരിപ്പിക്കാൻ ഒരുങ്ങുന്നു. ഉറക്കം, ഹൃദയമിടിപ്പ്, നടത്തം, ഓട്ടം, ആർത്തവചക്രം തുടങ്ങിയവ അറിയാൻ സഹായിക്കുന്ന ഈ സ്മാർട്ട് മോതിരം സാംസങ് എഐ ഉപയോഗിച്ച് കൂടുതൽ നിർവ്വചനങ്ങൾ നടത്താനാകുമെന്നാണ് കമ്പനി അവകാശപ്പെടുന്നത്.
ഗ്യാലക്സി റിങിന്റെ പ്രീ-ബുക്കിംഗ് ഇന്ത്യയിൽ ഇപ്പോൾ ആരംഭിച്ചിരിക്കുകയാണ്. 1,999 രൂപ ടോക്കൺ തുക നൽകിയാണ് ഇത് ബുക്ക് ചെയ്യേണ്ടത്. സാംസങ് വെബ്സൈറ്റിലൂടെയോ, ആമസോൺ, ഫ്ലിപ്പ്കാർട്ട് പോലുള്ള ഇ-കൊമേഴ്സ് പ്ലാറ്റ് ഫോമുകളിലൂടെയോ ഈ മോതിരം പ്രീ-ബുക്ക് ചെയ്യാം. ഒക്ടോബർ 15 വരെയാണ് ബുക്കിംഗിന് അവസരം. പ്രീ-ബുക്ക് ചെയ്യുന്നവർക്കായി വയർലെസ് ചാർജറും കമ്പനി നൽകുന്നുണ്ട്.
വിരലിൽ നിന്നുള്ള കൃത്യമായ ആരോഗ്യ നിരീക്ഷണം
ദിവസം മുഴുവനും ധരിക്കാവുന്ന ഭാരം കുറഞ്ഞ സ്മാർട്ട് മോതിരമാണിത്. 2.3 മുതൽ 3.0 ഗ്രാം വരെ മാത്രമാണ് ഇത് ഭാരം. ടൈറ്റാനിയത്തിൽ നിർമ്മിച്ച ഈ മോതിരം മൂന്ന് സ്ക്രാച്ച് റെസിസ്റ്റൻറ് ഫിനിഷുകളിൽ ലഭ്യമാകും. ബയോആക്ടീവ് സെൻസർ, ആസ്സെലെറോമീറ്റർ, ഇൻഫ്രാറെഡ് സെൻസർ എന്നിവ ഉപയോഗിച്ച് ഹൃദയമിടിപ്പും, നടത്തവും, താപനിലയും സൃഷ്ടിക്കുന്ന വിവരങ്ങൾ ഗ്യാലക്സി ഹെൽത്ത് ആപ്പിലൂടെ ഉപയോഗിക്കുന്നവർക്ക് ലഭ്യമാകും.
8 എംബി മെമ്മറി, വെള്ളം പ്രതിരോധിക്കാനുള്ള കഴിവ്, ആർത്തവചക്രം ട്രാക്ക് ചെയ്യൽ, ഏഴ് ദിവസത്തേക്ക് ഒരൊറ്റ ചാർജിൽ പ്രവർത്തിക്കാനുള്ള ശേഷി തുടങ്ങിയവ ഈ സ്മാർട്ട് മോതിരത്തിന്റെ സവിശേഷതകളാണ്. 9 വ്യത്യസ്ത സൈസുകളിൽ ഗ്യാലക്സി റിങ് ലഭ്യമാകുമെന്ന് സാംസങ് വ്യക്തമാക്കുന്നു.
