ഇന്ത്യയും മലേഷ്യയും തമ്മിലുള്ള ബന്ധം ശക്തിപ്പെടുത്തുന്നതിനായി ഇൻഡിഗോയും മലേഷ്യൻ എയർലൈൻസും കോഡ് ഷെയർ പങ്കാളിത്തത്തിൽ ഏർപ്പെടുന്നു. ഇത് ഇന്ത്യയിലെയും മലേഷ്യയിലെയും പ്രധാന നഗരങ്ങൾ തമ്മിലുള്ള കണക്റ്റിവിറ്റി വർദ്ധിപ്പിക്കുകയും യാത്രാനുഭവം മെച്ചപ്പെടുത്തുകയും ചെയ്യുകയാണ്. കൂടാതെ, ഇന്ത്യ-മലേഷ്യ രാജ്യങ്ങൾ തമ്മിലുള്ള സാമ്പത്തിക, സാംസ്കാരിക ബന്ധങ്ങൾ ശക്തിപ്പെടുത്തുകയും ടൂറിസം വരുമാനം ഉയർത്തുകയും ചെയ്യാനാണ് ഈ സഹകരണം ലക്ഷ്യമിടുന്നത്.
ഇരു രാജ്യങ്ങളും തമ്മിൽ ടൂറിസ്റ്റുകൾക്കായി അടുത്തിടെ വിസ റദ്ദാക്കിയിരുന്നു. ഇതിലൂടെ ഓരോ സന്ദർശനത്തിനും 30 ദിവസം വരെ താമസിക്കാൻ കൂടുതൽ അവസരങ്ങൾ ലഭ്യമാകുന്നു. കോഡ് ഷെയർ പങ്കാളിത്തം ഈ വർഷം ആദ്യം ഒപ്പുവച്ച ധാരണാപത്രത്തിന്റെ (എംഒയു) ഭാഗമാണ്. ഇതിലൂടെ ഇരുകമ്പനികളും ഉപഭോക്താക്കൾക്ക് മെച്ചപ്പെട്ട സേവനങ്ങളും കൂടുതൽ ഡെസ്റ്റിനേഷനുകളിലേക്ക് പ്രവേശനവും ഉറപ്പാക്കുകയാണ്.
മലേഷ്യൻ എയർലൈൻസിന്റെ MH കോഡ് ഇന്ത്യയിലെ ഏഴ് ആഭ്യന്തര ലക്ഷ്യസ്ഥാനങ്ങളിൽ ഉൾപ്പെടും, ഇതിലൂടെ ഗോവ, തിരുച്ചിറപ്പള്ളി, വിശാഖപട്ടണം, വാരണാസി, കൊൽക്കത്ത, പട്ന, ഭുവനേശ്വർ തുടങ്ങിയ സ്ഥലങ്ങളിൽ മലേഷ്യൻ എയർലൈൻസിന്റെ യാത്രക്കാർക്ക് യാത്ര ചെയ്യാനാകും.
അതേ സമയം, ഇൻഡിഗോയുടെ 6E കോഡ്, മലേഷ്യൻ എയർലൈൻസ് ഫ്ലൈറ്റുകൾക്ക് ക്വാലാലംപൂർ ഇന്റർനാഷണൽ എയർപോർട്ടിൽ നിന്ന് രാജ്യത്തെ വിവിധ ആഭ്യന്തര ലക്ഷ്യസ്ഥാനങ്ങളിലേക്ക് ബന്ധിപ്പിക്കും. ഇതിലൂടെ പെനാങ്, ലങ്കാവി, കോട്ട കിനാബാലു, ജോഹർ ബഹ്റു, കുച്ചിംഗ് തുടങ്ങിയ മലേഷ്യൻ നഗരങ്ങളിലേക്ക് ഇൻഡിഗോ ഉപഭോക്താക്കൾക്ക് സഞ്ചരിക്കാൻ സാധിക്കും.
ഇന്ത്യയിലെ ന്യൂഡൽഹി, മുംബൈ, ബംഗളൂരു, ചെന്നൈ, ഹൈദരാബാദ്, കൊച്ചി, കൊൽക്കത്ത തുടങ്ങിയ പ്രധാന നഗരങ്ങളിലേക്ക് മലേഷ്യൻ എയർലൈൻസ് നേരിട്ട് സർവീസ് നടത്തിവരുന്നു. ഇൻഡിഗോയും നിലവിൽ ക്വാലാലംപൂരിലേക്ക് നേരിട്ടുള്ള വിമാന സർവീസ് നടത്തുന്നുണ്ട്.
ഇന്ത്യയും മലേഷ്യയും തമ്മിലുള്ള ഈ സഖ്യം ഏറ്റവും പ്രശസ്തമായ രണ്ട് ടൂറിസ്റ്റ് കേന്ദ്രങ്ങളെ പരസ്പരം കൂടുതൽ അടുപ്പത്തിലാക്കും. കൂടാതെ, ഇരുരാജ്യങ്ങളിലെ യാത്രക്കാർക്ക് മെച്ചപ്പെട്ട കണക്റ്റിവിറ്റിയും സൗകര്യവും നൽകാൻ ഈ സഖ്യം സഹായിക്കും.
