‘ഗുഡ് ബാഡ് അഗ്ലി’ തമിഴ് സൂപ്പർ താരം തല അജിത് നായകനായി എത്തുന്ന ചിത്രമാണ്. ആദിക് രവിചന്ദ്രൻ സംവിധാനം നിർവഹിക്കുന്ന ചിത്രത്തിനായി കാത്തിരിപ്പിലാണ് അജിത് ആരാധകർ. ചിത്രത്തിൻ്റെതായി പുറത്തുവരുന്ന അപ്ഡേറ്റുകൾക്കെല്ലാം വലിയതോതിലുള്ള സ്വീകാര്യത പ്രേക്ഷകർക്കിടയിൽ ലഭിക്കുന്നുണ്ട്. സിനിമയുടെ ഫസ്റ്റ് ലുക്ക്, സെക്കന്റ് ലുക്ക് എന്നിവ ഉൾപ്പടെയുള്ള എല്ലാ അപ്ഡേറ്റുകളും ഹൈപ്പ് കൂട്ടുന്നവയായിരുന്നു.
ഇപ്പോഴിതാ, ചിത്രത്തിൻ്റെ ഏറ്റവും പുതിയ അപ്ഡേറ്റ് പങ്കുവെച്ചിരിക്കുകയാണ് അണിയറ പ്രവർത്തകർ. അജിത്തിൻ്റെ കലക്കൻ പോസ്റ്റർ പങ്കുവെച്ച് നിർമാതാക്കളായ മൈത്രി മൂവീസ് ചിത്രത്തിൻ്റെ റീലീസ് പ്രഖ്യാപിച്ചിട്ടുണ്ട്. ‘ഗുഡ് ബാഡ് അഗ്ലി’ അടുത്ത വർഷം പൊങ്കൽ റിലീസായി തീയേറ്ററുകളിൽ എത്തും.
മാര്ക്ക് ആൻ്റെണിയുടെ വിജയത്തിന് ശേഷം ആദിക് രവിചന്ദ്രൻ്റെ സംവിധാനത്തില് എത്തുന്ന ചിത്രമാണിത്. ദേവിശ്രീ പ്രസാദ് സംഗീത സംവിധാനം നിര്വ്വഹിക്കുന്ന ചിത്രത്തിന്റെ ഛായാഗ്രഹണം അഭിനന്ദന് രാമാനുജമാണ്. സുനിൽ, പ്രസന്ന, തൃഷ എന്നിവരാണ് ചിത്രത്തിലെ മറ്റു അഭിനേതാക്കൾ.
‘വിടാമുയര്ച്ചി’യെന്ന മറ്റൊരു ചിത്രം കൂടി അജിത്ത് കുമാറിന്റേതായി പുറത്തെത്താനുണ്ട്. മങ്കാത്ത എന്ന ബ്ലോക്ക്ബസ്റ്റർ ചിത്രത്തിന് ശേഷം, അജിത്- അർജുൻ- തൃഷ കൂട്ടുകെട്ട് വീണ്ടും വെള്ളിത്തിരയിൽ ഒന്നിക്കുന്നു എന്നതാണ് വിടാമുയർച്ചിയുടെ ഏറ്റവും വലിയ ഹൈലൈറ്റ്.
