ജപ്പാനിൽ ജനനനിരക്ക് കുത്തനെ ഇടിഞ്ഞു. തുടർച്ചയായ ഒമ്പതാം വർഷവും ജനനനിരക്ക് കുത്തനെ കുറഞ്ഞതോടെ ആശങ്കയിലാണ് ജപ്പാനിലെ ജനത. സർക്കാർ പുറത്തുവിട്ട കണക്ക് പ്രകാരം 2024ൽ 6.86 ലക്ഷം കുട്ടികളാണ് ജനിച്ചത്. 2023-നെ അപേക്ഷിച്ച് 5.7 ശതമാനത്തിൻ്റെ ഇടിവ് ആണ് കണക്കിൽ രേഖപ്പെടുത്തുന്നത്.
1899 ൽ റെക്കോർഡ് സൂക്ഷിക്കൽ ആരംഭിച്ചതിന് ശേഷം ഈ കണക്ക് 700,000 ൽ താഴെയാകുന്നത് ഇതാദ്യമാണെന്ന് ബുധനാഴ്ചത്തെ ആരോഗ്യ മന്ത്രാലയ പ്രഖ്യാപനം പറയുന്നു. മുൻ വർഷത്തെ അപേക്ഷിച്ച് ജനനങ്ങൾ 41,227 അഥവാ 5.7 ശതമാനം കുറഞ്ഞു. രണ്ട് വർഷം മുമ്പ്, 2022ൽ മാത്രമാണ് ഈ കണക്ക് 800,000 ജനന പരിധിക്ക് താഴെയായത്.
ഭാവിയിലെ ജനന പ്രവണതകളെ സ്വാധീനിക്കുന്ന ഒരു പ്രധാന ഘടകമായ വിവാഹങ്ങളുടെ എണ്ണത്തിൽ രാജ്യത്ത് നേരിയ തിരിച്ചുവരവ് ഉണ്ടായി. കഴിഞ്ഞ വർഷം 485,063 ദമ്പതികൾ വിവാഹിതരായി, 2023-നെ അപേക്ഷിച്ച് 2.2 ശതമാനം വർധനവ്. അതേസമയം വിവാഹ മോചനങ്ങൾ 1.1 ശതമാനം ഉയർന്ന് 185,000ൽ അധികം കേസുകളായി.
ജപ്പാനിലെ നിരവധി യുവാക്കൾ വിവിധ കാരണങ്ങളാൽ വിവാഹവും പ്രസവവും വൈകിപ്പിക്കുന്നു. ദുർബലമായ തൊഴിൽ സുരക്ഷ മുതൽ വിവാഹത്തിന് പ്രാധാന്യം നൽകാത്ത സാമൂഹിക മൂല്യങ്ങൾ മാറുന്നത് വരെ ഇതിന് കാരണമാണ്.
ജനസംഖ്യാപരമായ ഇടിവ് പരിഹരിക്കുന്നതിനായി യുവാക്കളുടെ വേതനം വർദ്ധിപ്പിക്കുക, ശിശു സംരക്ഷണ സഹായ പരിപാടികൾ വികസിപ്പിക്കുക, ശിശു അലവൻസ്, സൗജന്യ ഹൈസ്കൂൾ വിദ്യാഭ്യാസം, ദമ്പതിമാർ ഒരേസമയം പേരന്റ് ലീവ് എടുക്കുമ്പോൾ മുഴുവൻ ശമ്പളവും ലഭിക്കുമെന്ന ഉറപ്പ് എന്നിവയുൾപ്പെടെ നിരവധി പ്രതിരോധ നടപടികൾ സർക്കാർ നടപ്പിലാക്കിയിട്ടുണ്ട്.
2070-ഓടെ ജപ്പാൻ്റെ ജനസംഖ്യ 30 ശതമാനം ഇടിഞ്ഞ് 8.7 കോടിയിലെത്തുമെന്ന് നാഷണൽ ഇൻസ്റ്റിറ്റ്യൂട്ട് ഓഫ് പോപ്പുലേഷൻ ആൻഡ് സോഷ്യൽ സെക്യൂരിറ്റി റിസർച്ചിൻ്റെ പഠനം നേരത്തെ പുറത്തു വന്നിരുന്നു.
