ന്യൂഡൽഹി: കഴിഞ്ഞ മാസം ഓപ്പറേഷൻ സിന്ദൂരിനിടെ പാക് അധിനിവേശ കാശ്മീരിലെ (പിഒകെ) രണ്ട് പ്രധാന ഭീകര പരിശീലന ക്യാമ്പുകൾക്ക് എതിരെ ഇന്ത്യ നടത്തിയ കൃത്യതയാർന്ന ആക്രമണങ്ങളുടെ ആഘാതം പുതിയ ഉയർന്ന റെസല്യൂഷൻ ഉപഗ്രഹ ചിത്രങ്ങൾ എൻഡിടിവി വാർത്തയിലൂടെ പുറത്തുവിട്ടു. ആക്രമണത്തിൽ ഉപയോഗിച്ച ആയുധങ്ങൾ സായുധസേന തിരിച്ചറിഞ്ഞിട്ടില്ലെങ്കിലും രണ്ടും ലക്ഷ്യമിട്ടത് ഡ്രോണുകൾ ഉപയോഗിച്ചാണെന്ന് വിശ്വസിക്കപ്പെടുന്നു.
മുസാഫറാബാദിലെ സയ്യിദ്ന ബിലാൽ ക്യാമ്പിൽ നടന്ന ആക്രമണത്തിൻ്റെ ഈ മാക്സർ ഉപഗ്രഹ ചിത്രങ്ങൾ, ജർമ്മൻ വാർത്താ ഏജൻസിയായ TRT Deutsch പ്രസിദ്ധീകരിച്ച ആക്രമണത്തിൻ്റെ ഓൺ- ഗ്രൗണ്ട് ഫോട്ടോകളെ പിന്തുണയ്ക്കുന്നു.
കാശ്മീരിലെ തങ്ധറിൽ നിന്ന് 36 കിലോമീറ്റർ പടിഞ്ഞാറുള്ള മുസാഫറാബാദിലെ സയ്യിദ്ന ബിലാൽ ക്യാമ്പ് ജമ്മുവിലെ രജൗരിക്ക് 40 കിലോമീറ്റർ പടിഞ്ഞാറുള്ള കോട്ലി ഗുൽപൂർ ക്യാമ്പ് എന്നീ രണ്ട് ക്യാമ്പുകളുടേതാണ് ചിത്രങ്ങൾ. മെയ് എഴിന് പുലർച്ചെയാണ് രണ്ടും ആക്രമിക്കപ്പെട്ടത്.
ഏപ്രിൽ 22ന് പഹൽഗാമിൽ നടന്ന ഭീകരാക്രമണത്തിൽ 26 സാധാരണക്കാർ കൊല്ലപ്പെട്ടതിനെ തുടർന്ന് ഇന്ത്യ പാകിസ്ഥാനിലെയും പാക് അധീന കാശ്മീരിലെയും ഒന്നിലധികം തീവ്രവാദ അടിസ്ഥാന സൗകര്യ കേന്ദ്രങ്ങൾ ലക്ഷ്യമിട്ടായിരുന്നു ആക്രമണം.
2000 മാർച്ചിൽ 36 സിഖുകാർ കൊല്ലപ്പെട്ട ഛത്തിസിങ്പോറ കൂട്ടക്കൊലക്ക് ശേഷം ജമ്മു കാശ്മീരിലുണ്ടായ ഏറ്റവും വലിയ ഭീകര ആക്രമണമായിരുന്നു ഇത്.
സയ്യിദ്ന ബിലാൽ
പാക് അധിനിവേശ കാശ്മീരിൻ്റെ തലസ്ഥാനമായ മുസാഫറാബാദിലെ സയ്യിദ്ന ബിലാൽ ക്യാമ്പ്, ജെയ്ഷെ മുഹമ്മദുമായി ബന്ധമുള്ള തീവ്രവാദികളുടെ ഒരു പ്രധാന താവളമായിരുന്നു. ആയുധങ്ങൾ കൈകാര്യം ചെയ്യൽ, കാട്ടിൽ അതിജീവനം, സ്ഫോടക വസ്തുക്കൾ, ആയുധങ്ങൾ എന്നിവയിൽ തീവ്രവാദികളെ പരിശീലിപ്പിക്കുന്നതിനും ഈ ക്യാമ്പ് സഹായിച്ചിരുന്നു.
ആക്രമണത്തിന് മുമ്പും ശേഷവുമുള്ള ചിത്രങ്ങൾ, പരസ്പരം ബന്ധിപ്പിച്ചിരിക്കുന്ന ഒരു കൂട്ടം കെട്ടിടങ്ങൾ (81 x 92 അടി) ഡ്രോൺ ആക്രമണത്തിൽ തകർന്നതായി കാണിക്കുന്നു. പ്രദേശത്ത് യാതൊരു നാശനഷ്ടവുമില്ല.
സൈനിക വൃത്തങ്ങൾ പറയുന്നതനുസരിച്ച് 2023 ജൂണിൽ പ്രത്യേക പരിശീലനത്തിനായി സയ്യിദ്ന ബിലാലിലേക്ക് റിക്രൂട്ട്മെന്റുകൾ അയച്ചിരുന്നു. കതുവക്കും റംബാനും ഇടയിലുള്ള റെയിൽവേ പാലം ലക്ഷ്യമിട്ട് ഉറി, കേരൻ സെക്ടറുകളിലെ നിയന്ത്രണ രേഖക്ക് കുറുകെ വിക്ഷേപിക്കാൻ അവരെ തയ്യാറാക്കുക ആയിരുന്നു.
പരിശീലനത്തിന് ശേഷം, ഈ തീവ്രവാദികളെ പാകിസ്ഥാനിലെ പഞ്ചാബിലെ സ്റ്റേജിംഗ് ക്യാമ്പുകളിലേക്കും ലോഞ്ച് പാഡുകളിലേക്കും കൊണ്ടുപോയി. അവിടെ അവർക്ക് പ്രത്യേക ആശയ വിനിമയ പരിശീലനം നൽകി.
പരിശീലനത്തിന് ശേഷം, അവരെ നാല് മുതൽ എട്ട് വരെ തീവ്രവാദികളുടെ ഗ്രൂപ്പുകളായി തിരിഞ്ഞു. 2024 മാർച്ച് മുതൽ മെയ് വരെ അന്താരാഷ്ട്ര അതിർത്തി വഴി ഇന്ത്യയിലേക്ക് നുഴഞ്ഞുകയറി. കഴിഞ്ഞ വർഷം ജമ്മുവിൽ നടന്ന ഭീകര ആക്രമണങ്ങളിൽ ഭൂരിഭാഗവും നടത്തിയത് ഈ തീവ്രവാദികളാണ്.
മുഫ്തി അസ്ഗർ ഖാൻ കാശ്മീരി, അമീർ ജെഎം, അബ്ദുല്ല ജിഹാദി, ആഷിഖ് നെഗ്രൂ എന്നിവരുൾപ്പെടെയുള്ള ഉന്നത ജെയ്ഷെ ഇഎം ഭീകരർ പതിവായി ക്യാമ്പ് സന്ദർശിച്ചിരുന്നു. മുസാഫറാബാദ് സന്ദർശിക്കുന്ന മുതിർന്ന ജെയ്ഷെ മുഹമ്മദ് കമാൻഡർമാർക്കായി ക്യാമ്പിന് സമീപം അതിഥി മന്ദിരങ്ങളും നിർമ്മിച്ചു.
ഈ ക്യാമ്പുകൾക്ക് പാകിസ്ഥാൻ ഇൻ്റെലിജൻസ്, പ്രത്യേകിച്ച് ഇൻ്റെർ സർവീസസ് ഇൻ്റെലിജൻസ് (ഐഎസ്ഐ) പിന്തുണയും സംരക്ഷണവും നൽകുന്നുണ്ടെന്ന് സൈനിക വൃത്തങ്ങൾ അറിയിച്ചു. ജമ്മു കാശ്മീരിലേക്ക് തീവ്രവാദികൾക്ക് പരിശീലനം, ആയുധങ്ങൾ, സുരക്ഷിതമായ വഴിത്തിരിവ് എന്നിവ ഈ ഏജൻസിയാണ് നൽകുന്നത്.
”കോട്ലിയിലെയും മുസഫറാബാദിലെയും ഭീകര ക്യാമ്പുകളിൽ യാതൊരു നാശനഷ്ടവുമില്ലാതെ നടത്തിയ കൃത്യതയുള്ള ആക്രമണങ്ങളുടെ ഈ ചിത്രങ്ങൾ ഇന്ത്യയുടെ കഴിവിൻ്റെ വ്യക്തമായ പ്രകടനമാണ്,” കാശ്മീർ താഴ്വരയിലെ സൈനിക പ്രവർത്തനങ്ങൾക്ക് ഉത്തരവാദിയായ ശ്രീനഗർ ആസ്ഥാനമായുള്ള 15 കോർപ്സിൻ്റെ കമാൻഡറായിരുന്ന ലെഫ്റ്റനന്റ് ജനറൽ സതീഷ് ദുവ (റിട്ടയേർഡ്) പറഞ്ഞു.
”പതിറ്റാണ്ടുകളായി ഭീകര ക്യാമ്പുകളുടെ കൃത്യമായ സ്ഥലങ്ങൾ അറിയാമായിരുന്നിട്ടും ആണവ പശ്ചാത്തലത്തിൽ സ്വയം ഏർപ്പെടുത്തിയ നിയന്ത്രണങ്ങൾ കാരണം അവയിൽ ആക്രമണം നടത്താൻ കഴിയാത്തതിൽ ഞങ്ങൾ നിസഹായരായിരുന്നു. എന്നാൽ പഹൽഗാം അതെല്ലാം മാറ്റിമറിച്ചു,” -അദ്ദേഹം കൂട്ടിച്ചേർത്തു.
കോട്ലി
രണ്ടാമത്തെ സെറ്റ് ചിത്രങ്ങൾ കോട്ലിയിലെ ഗുൽപൂർ ക്യാമ്പിനെ കേന്ദ്രീകരിക്കുന്നു. ജമ്മുവിലെ രജൗരി-പൂഞ്ച് മേഖലയിൽ ആക്രമണങ്ങളിൽ ഉൾപ്പെട്ട ലഷ്കർ- ഇ- തൊയ്ബ ഭീകര സംഘടനയുടെ ബേസ് ക്യാമ്പാണെന്ന് കരുതപ്പെടുന്ന കെട്ടിടങ്ങളാണ് ഇതിൽ കാണിക്കുന്നത്.
110 x 30 അടി വലിപ്പമുള്ള ഒരു ഘടന മധ്യഭാഗത്ത് നിന്ന് താഴേക്ക് പിളർന്നിരിക്കുന്നതായി ഉപഗ്രഹ ചിത്രങ്ങൾ കാണിക്കുന്നു. ഈ കെട്ടിടത്തിന് തൊട്ടടുത്തുള്ള ഒരു ചെറിയ ഘടനയുടെ മേൽക്കൂരക്കും സാരമായ കേടുപാടുകൾ സംഭവിച്ചു.
പരിശീലനം ലഭിച്ച ഭീകരർ 2023ൽ പൂഞ്ചിലും കഴിഞ്ഞ വർഷം തീർത്ഥാടകരുടെ ബസിലും ആക്രമണം നടത്തിയിട്ടുണ്ടെന്ന് സർക്കാർ വിശ്വസിക്കുന്നു.
സൈനിക വൃത്തങ്ങൾ പറയുന്നതനുസരിച്ച് പരിശീലന കേന്ദ്രം സുസ്ഥിരമായ ഒരുലഷ്കർ- ഇ- തൊയ്ബ പരിശീലന കേന്ദ്രമായിരുന്നു, അവിടെ ചാവേർ ബോംബർമാർ ഉൾപ്പെടെ നിരവധി തീവ്രവാദികൾ വിപുലമായ യുദ്ധ പരിശീലനം നേടിയിരുന്നു.
താമസ സൗകര്യങ്ങളും ഉണ്ടായിരുന്ന ഈ സ്ഥലത്ത് 30- 50 തീവ്രവാദികളെയും അവരുടെ പരിശീലകരെയും പാർപ്പിച്ചിരുന്നു. പൂഞ്ച്, രജൗരി മേഖലകളിൽ സമീപ വർഷങ്ങളിൽ ഭീകരത പുനരുജ്ജീവിപ്പിക്കാൻ ശ്രമിക്കുന്ന തീവ്രവാദികൾ ഇത് ഉപയോഗിച്ചിരുന്നു. ഒന്നിലധികം തീവ്രവാദ ഗ്രൂപ്പുകൾ പരിശീലന കേന്ദ്രം സജീവമായി ഉപയോഗിച്ചിരുന്നതായി സൈനിക വൃത്തങ്ങൾ അറിയിച്ചു.
പാകിസ്ഥാൻ ഭീകര സംഘടനകൾക്ക് ഗറില്ലാ യുദ്ധം, അതിജീവന പരിശീലനം, ആയുധ പരിശീലനം എന്നിവക്കുള്ള അറിയപ്പെടുന്ന കേന്ദ്രമായിരുന്നു അത്.
2019ൽ നടത്തിയ ബാലകോട്ട് ആക്രമണത്തിന് ശേഷം ക്യാമ്പ് താൽക്കാലികമായി അടച്ചുപൂട്ടി. എന്നാൽ 2020ൽ തീവ്രവാദികൾക്കുള്ള പരിശീലന പ്രവർത്തനങ്ങൾ പുനരാരംഭിച്ചതായി പറയപ്പെടുന്നു.
“ഓപ്പറേഷൻ സിന്ദൂരിനിടെ ഞങ്ങളുടെ ശ്രദ്ധ പ്രധാനമായും കേന്ദ്രീകരിച്ചത് ബഹാവൽപൂരിലെ മുരിദ്കെയിലെയും പാകിസ്ഥാൻ വ്യോമ താവളങ്ങളിലെയും ആക്രമണങ്ങളിൽ ആയിരുന്നു. എന്നിരുന്നാലും, പാക് അധീന കാശ്മീരിലെ ഭീകര ക്യാമ്പുകളിൽ നടത്തിയ ആക്രമണങ്ങളും ഒരുപോലെ പ്രധാനമാണ്,” -2016ൽ പാകിസ്ഥാൻ പ്രദേശത്തേക്ക് സൈന്യം ‘സർജിക്കൽ സ്ട്രൈക്കുകൾ’ നടത്തിയപ്പോൾ ഇന്ത്യയുടെ വടക്കൻ കരസേന കമാൻഡറായിരുന്ന ലെഫ്റ്റനന്റ് ജനറൽ ഡിഎസ് ഹൂഡ (വിരമിച്ച) പറഞ്ഞു.
”ഈ ക്യാമ്പുകളിൽ നിന്നാണ് തീവ്രവാദികൾ നുഴഞ്ഞുകയറ്റ വഴികൾ സൂക്ഷ്മമായി നിരീക്ഷിക്കുന്നതും, ഇന്ത്യൻ പ്രദേശത്തേക്ക് കടക്കുന്നതിന് മുമ്പ് അന്തിമ പരിശീലനവും ആസൂത്രണവും നടത്തുന്നത്. ഈ അടിസ്ഥാന സൗകര്യങ്ങളുടെ നാശം തീവ്രവാദികളുടെ മനോവീര്യത്തെയും ജമ്മു കാശ്മീർ മേഖലകളിൽ ആക്രമണം നടത്താനുള്ള അവരുടെ കഴിവിനെയും ഉടനടി ബാധിക്കും,” -അദ്ദേഹം പറഞ്ഞു.
ഓപ്പറേഷൻ സിന്ദൂർ
മെയ് എഴിന് ഇന്ത്യ ഓപ്പറേഷൻ സിന്ദൂർ ആരംഭിക്കുകയും ലഷ്കർ- ഇ- തൊയ്ബ, ജെയ്ഷ്- ഇ- മുഹമ്മദ്, ഹിസ്ബുൾ മുജാഹിദീൻ തുടങ്ങിയ ഗ്രൂപ്പുകളുമായി ബന്ധപ്പെട്ട ഒമ്പത് അടിസ്ഥാന സൗകര്യ കേന്ദ്രങ്ങൾ ആക്രമിക്കുകയും ചെയ്തു.
നാല് ലക്ഷ്യങ്ങൾ പാകിസ്ഥാനിലായിരുന്നു. ബഹാവൽപൂർ, മുറിദ്കെ, സിയാൽകോട്ട്, ഷക്കർ ഗഢിനടുത്തുള്ള ഒരു ഗ്രാമം, അഞ്ച് ലക്ഷ്യങ്ങൾ പാക് അധീന കാശ്മീരിലായിരുന്നു. മുസാഫറാബാദ്, കോട്ലി, ഭീംബർ, റാവലകോട്ട്, ചക്സ്വാരി. ഈ ആക്രമണങ്ങളിൽ എല്ലാം നൂറിലധികം ഭീകരർ കൊല്ലപ്പെട്ടതായി കരുതപ്പെടുന്നു.
Courtesy: NDTV
വാർത്തകൾക്ക് ഗ്രൂപ്പിൽ ചേരാം:
