കേരളത്തിൻ്റെ ശുചിത്വസേനയായ ഹരിത കർമസേന പുത്തൻ സംരംഭങ്ങൾ ആരംഭിക്കുന്നു. തുണിസഞ്ചി, ജൈവവളം, ചവിട്ടി, ഇനോകുലം തുടങ്ങിയവയുടെ ഉത്പാദന യൂണിറ്റുകൾ, സ്ക്രാപ്പ് വ്യാപാരം, സാനിട്ടറി വേസ്റ്റ് ശേഖരണ യൂണിറ്റ് എന്നിങ്ങനെ വിവിധ സംരംഭങ്ങളാണ് ഹരിതകർമ്മ സേനയുടെ നേതൃത്വത്തിൽ ആരംഭിക്കുന്നത് എന്ന് മന്ത്രി എംബി രാജേഷ് പങ്കുവെച്ച ഫേസ്ബുക്ക് പോസ്റ്റിൽ അറിയിച്ചു.
ഫേസ്ബുക്ക് പോസ്റ്റ് പൂർണരൂപം:
കേരളത്തിൻ്റെ ശുചിത്വസേന പുത്തൻ സംരംഭങ്ങളിലേക്ക് ഹരിതകർമ്മ സേന ഇതാ പുത്തൻ സ്വയം തൊഴിൽ സംരംഭങ്ങളും ആരംഭിക്കുകയാണ്. തുണിസഞ്ചി, ജൈവവളം, ചവിട്ടി, ഇനോകുലം തുടങ്ങിയവയുടെ ഉത്പാദനയൂണിറ്റുകൾ, സ്ക്രാപ്പ് വ്യാപാരം, സാനിട്ടറി വേസ്റ്റ് ശേഖരണ യൂണിറ്റ് എന്നിങ്ങനെ വിവിധ സംരംഭങ്ങളാണ് ഹരിതകർമ്മ സേനയുടെ നേതൃത്വത്തിൽ ആരംഭിക്കുന്നത്.
കേരളത്തിലെ 93 നഗരസഭകളിലെ 2800 ഓളം വരുന്ന ഹരിതകർമ്മ സേനാംഗങ്ങളും പദ്ധതിയുടെ ഗുണഭോക്താക്കളാകും. കേരള ഖര മാലിന്യ പരിപാലന പദ്ധതിയുടെ ഭാഗമായി ഹരിത കർമ്മ സേനയുടെ സംരംഭക പ്രവർത്തനങ്ങൾക്കായി 23 കോടി രൂപ നീക്കി വെച്ചിട്ടുണ്ട്.
അധിക വരുമാനത്തിലൂടെ ഹരിതകർമ്മ സേനയെ സ്വയം പര്യാപ്തരാക്കാനും അവരുടെ ജീവിത നിലവാരം ഉയർത്താനുമാണ് പദ്ധതിയിലൂടെ ലക്ഷ്യമിടുന്നത്. പദ്ധതിയുടെ സംസ്ഥാനതല ഉദ്ഘാടനം ആഗസ്റ്റ് 14ന് ആന്തൂർ നഗരസഭയിൽ നടക്കും.
