കാസർകോട്: വാഹന പരിശോധന നടത്തുകയായിരുന്ന പോലീസ് സബ് ഇൻസ്പെക്ടറെയും സംഘത്തെയും വാഹനമിടിച്ച് കൊലപ്പെടുത്താൻ ശ്രമം. വ്യാഴാഴ്ച രാത്രി ബന്തടുക്ക- കുറ്റിക്കോൽ സംസ്ഥാന പാതയിലാണ് അജ്ഞാത സംഘത്തിൻ്റെ അക്രമങ്ങൾ നടന്നത്. സംഭവത്തിൽ ബേഡകം പോലീസ് സ്റ്റേഷനിലെ സിപിഒ രാകേഷിന് പരിക്കേൽക്കുകയും KL 01 CN 4130 രജിസ്ട്രേഷൻ നമ്പർ പോലീസ് വാഹനത്തിന് സരമായ തകരാർ സംഭവിക്കുകയും ചെയ്തു.
KL 14 Q 1178 രജിസ്ട്രേഷൻ നമ്പർ മാരുതി ആൾട്ടോ കാറിൽ ഉണ്ടായിരുന്നവർ ആണ് അക്രമ സംഭവ കേസിലെ പ്രതികൾ. സംഭവ സ്ഥലത്ത് നിന്നും ഉടൻ രക്ഷപ്പെട്ട ഇവരെ കുറിച്ച് വ്യക്തമായ വിവരങ്ങൾ ലഭ്യമായിട്ടില്ല. സബ് ഇൻസ്പെക്ടർ മനോജിൻ്റെ നേതൃത്വത്തിൽ പ്രതികളെ സംശയ സാഹചര്യത്തിൽ നിരീക്ഷിക്കുക ആയിരുന്നു. കുറ്റിക്കോൽ, ബന്തടുക്ക, പള്ളത്തിങ്കാൽ എന്നീ സ്ഥലങ്ങളിൽ നാലുതവണ പ്രതികൾ വാഹനം കൊണ്ട് പോലീസ് വാഹനത്തെ ഇടിച്ചുവെന്നാണ് പോലീസ് പറയുന്നത്.
പരിക്കേറ്റ രാകേഷ് ബേഡകം ഗവൺമെൻറ് താലൂക്ക് ആശുപത്രിയിൽ ചികിത്സ തേടി. പ്രതികൾക്കെതിരെ വധശ്രമം, പൊതുമുതൽ നശിപ്പിക്കൽ, കൃത്യനിർവഹണം തടസപ്പെടുത്തൽ എന്നീ കുറ്റങ്ങൾ പ്രകാരം കേസെടുത്ത് പോലീസ് അന്വേഷണം ആരംഭിച്ചു.
