രാജ്യത്തെ വായു മലിനീകരണവും അതിന്റെ ആരോഗ്യ പ്രശ്നങ്ങളും കുറയ്ക്കുന്നതിന് വാഹനങ്ങൾക്ക് സ്റ്റാർ റേറ്റിംഗ് സംവിധാനം നടപ്പിലാക്കണമെന്ന് ആവശ്യപ്പെട്ടുള്ള പൊതുതാൽപ്പര്യ ഹർജി (പിഐഎൽ) പരിഗണിക്കാൻ സുപ്രീം കോടതി വിസമ്മതിച്ചു. വിഷയം പൂർണ്ണമായും സർക്കാരിന്റെ പരിധിയിലുള്ളതാണെന്നും ഇത് ഒരു നയപരമായ തീരുമാനമാണെന്നും അതിനാൽ ഇടപെടാൻ കഴിയില്ലെന്നും സുപ്രീം കോടതി വ്യക്തമാക്കി.
ചീഫ് ജസ്റ്റിസ് ഓഫ് ഇന്ത്യ (സിജെഐ) ജസ്റ്റിസ് ബി.ആർ. ഗവായി, ജസ്റ്റിസ് കെ. വിനോദ് ചന്ദ്രൻ എന്നിവരടങ്ങിയ ബെഞ്ച് ആണ് ഹർജി പരിഗണിച്ചത് . ഹർജിക്കാരന് തന്റെ വാദങ്ങൾ ഒരു മെമ്മോറാണ്ടത്തിന്റെ രൂപത്തിൽ കേന്ദ്ര സർക്കാരിന് നേരിട്ട് സമർപ്പിക്കാമെന്നും, അതിന്റെ മെറിറ്റ് അനുസരിച്ച് സർക്കാർ അത് പരിഗണിക്കുമെന്നും നിർദ്ദേശിച്ചു. “ഇത് സർക്കാരിന്റെ പരിധിയിലുള്ള വിഷയമായതിനാൽ, ഞങ്ങൾ ഇടപെടാൻ തയ്യാറല്ല,” ബെഞ്ച് ഉത്തരവിൽ പറഞ്ഞു.
ഡോ. സഞ്ജയ് കുൽശ്രേഷ്ഠയാണ് പൊതുതാൽപ്പര്യ ഹർജി സമർപ്പിച്ചത് . പല വികസിത രാജ്യങ്ങളിലെയും പോലെ വാഹനങ്ങളുടെ മലിനീകരണ തോത് അടിസ്ഥാനമാക്കി ഒരു സ്റ്റാർ റേറ്റിംഗ് സംവിധാനം ഏർപ്പെടുത്തുന്നത് ഉപഭോക്താക്കൾക്ക് പരിസ്ഥിതി സൗഹൃദ വാഹനങ്ങൾ തിരഞ്ഞെടുക്കാൻ അനുവദിക്കുമെന്ന് അദ്ദേഹം വാദിച്ചു. ഇത് വാഹന മലിനീകരണം തടയുമെന്ന് അദ്ദേഹം പറഞ്ഞു.
“ഇന്ത്യയിൽ റഫ്രിജറേറ്ററുകൾ, എസികൾ തുടങ്ങിയ വീട്ടുപകരണങ്ങൾക്ക് ഇതിനകം തന്നെ എനർജി സ്റ്റാർ റേറ്റിംഗ് സംവിധാനം ഉണ്ട്. റോഡുകളിൽ ഓടുന്നതും മറ്റുള്ളവരുടെ ആരോഗ്യത്തെ ഗുരുതരമായി ബാധിക്കുന്നതുമായ വാഹനങ്ങൾക്ക് എന്തുകൊണ്ട് അങ്ങനെയായിക്കൂടാ? നമ്മുടെ ആഡംബരം മറ്റുള്ളവർക്ക് ഒരു പ്രശ്നമായി മാറരുത്,” ഹർജിയിൽ പറയുന്നു. പരിസ്ഥിതിക്ക് ഗുണം ചെയ്യുന്ന കാറുകൾ വാങ്ങാൻ ഈ റേറ്റിംഗ് സംവിധാനം ആളുകളെ പ്രോത്സാഹിപ്പിക്കുമെന്ന് അദ്ദേഹം വിശ്വസിച്ചു.
2021 ൽ ഇന്ത്യയിൽ വായു മലിനീകരണം മൂലം 21 ലക്ഷം മരണങ്ങൾ സംഭവിച്ചു, അതിൽ 60 ശതമാനവും വാഹനങ്ങളിൽ നിന്ന് പുറന്തള്ളുന്ന PM2.5 കണികകൾ മൂലമാണെന്ന് ഹർജിയിൽ വിശദീകരിച്ചു. പ്രമുഖ മെഡിക്കൽ ജേണലായ ‘ദി ലാൻസെറ്റ്’ നടത്തിയ പഠനത്തെ ഉദ്ധരിച്ച്, ഡൽഹി, ബെംഗളൂരു, മുംബൈ തുടങ്ങിയ പ്രധാന നഗരങ്ങളിൽ PM2.5 മലിനീകരണം മൂലം പ്രതിവർഷം ഏകദേശം 33,000 പേർക്ക് ജീവൻ നഷ്ടപ്പെടുന്നുണ്ടെന്ന് അദ്ദേഹം കോടതിയുടെ ശ്രദ്ധയിൽപ്പെടുത്തി. എന്നിരുന്നാലും, ഈ വാദങ്ങൾ പരിഗണിച്ചിട്ടും, സുപ്രീം കോടതി ഹർജി തള്ളി, അത് സർക്കാർ നയത്തിന്റെ വിഷയമാണെന്ന് പറഞ്ഞു.
