കാസർകോട് ഡിസിസി ഓഫീസിലെ തമ്മിലടിയും സംഘർഷവും ദൃശ്യങ്ങൾ ഫോണിൽ പകർത്തിയ കോൺഗ്രസ് നേതാവിനെതിരെ അച്ചടക്ക നടപടി. കാസകോട് ബ്ലോക്ക് കോൺഗ്രസ് കമ്മിറ്റി സെക്രട്ടറി സഫ്വാൻ കുന്നിലിനെ ആണ് പാർട്ടിയിൽ നിന്നും സസ്പെൻഡ് ചെയ്തത്. സീറ്റ് വിഭജന തര്ക്കത്തെ തുടർന്നാണ് കാസർകോട് ഡിസിസി ഓഫീസില് കയ്യാങ്കളി ഉണ്ടായത്.
ഡിസിസി വൈസ് പ്രസിഡന്റ് ജയിംസ് പന്തമാക്കനും ഡികെടിഎഫ് ജില്ലാ പ്രസിഡന്റ് വാസുദേവനും ആണ് ഡിസിസി ഓഫീസിനുളളില് ഏറ്റുമുട്ടിയത്. പിന്നാലെ ഇതിൻ്റെ ദൃശ്യങ്ങള് പുറത്തുവന്നു.
സംഘടനാ വിരുദ്ധ പ്രവർത്തനം നടത്തിയവർക്ക് എതിരെ ഉറപ്പായും നടപടി ഉണ്ടാകുമെന്ന് ജില്ലയുടെ ചുമതലയുള്ള കെപിസിസി വൈസ് പ്രസിഡന്റ് എം.ലിജു പറഞ്ഞിരുന്നു. ലിജുവിൻ്റെ നേതൃത്വത്തിൽ ചർച്ച നടക്കുന്നതിനിടെ ആണ് ഹാളിന് പുറത്ത് നേതാക്കൾ ഏറ്റുമുട്ടിയത്.
ഈസ്റ്റ് എളേരി പഞ്ചായത്തിലെ സീറ്റ് വിഭജനവുമായി ബന്ധപ്പെട്ട തർക്കമാണ് അടിപിടിയിൽ കലാശിച്ചത്. എന്നാൽ ഇരുനേതാക്കളും തമ്മിലുള്ള വ്യക്തിപരമായ പ്രശ്നമാണെന്നായിരുന്നു പ്രസിഡന്റിൻ്റെ വിശദീകരണം.
