വിജയ് ഹസാരെ ട്രോഫിയിൽ ത്രിപുരയ്ക്കെതിരായ മത്സരത്തിൽ അവിശ്വസനീയ പ്രകടനവുമായി മലയാളി താരം വിഘ്നേഷ് പുത്തൂർ ക്രിക്കറ്റ് ചരിത്രത്തിൽ ഇടം നേടി. ലിസ്റ്റ് എ ക്രിക്കറ്റിൽ ഒരു ഇന്നിങ്സിൽ ആറ് ക്യാച്ചുകൾ സ്വന്തമാക്കുന്ന ആദ്യ താരമെന്ന അപൂർവ്വ റെക്കോർഡാണ് വിഘ്നേഷ് കുറിച്ചത്. മുൻപ് 21 താരങ്ങൾ അഞ്ച് ക്യാച്ചുകൾ നേടിയിരുന്നെങ്കിലും, ആറ് ക്യാച്ചുകൾ എന്ന നാഴികക്കല്ല് ആദ്യമായി സ്വന്തമാക്കിയത് വിഘ്നേഷാണ്.
ദിയൻ ബോസ്, ശ്രീദം പോൾ, സ്വപ്നിൽ സിംഗ്, സൗരഭ് ദാസ്, അഭിജിത് കെ സർക്കാർ, വിക്കി സാഹ എന്നിവരെ ക്യാച്ചിലൂടെ പുറത്താക്കി വിഘ്നേഷ് ത്രിപുരയുടെ ബാറ്റിംഗ് നിര തകർത്തെറിഞ്ഞു. മത്സരത്തിൽ കേരളം 145 റൺസിന്റെ തകർപ്പൻ ജയം സ്വന്തമാക്കി. ആദ്യം ബാറ്റ് ചെയ്ത കേരളം എട്ട് വിക്കറ്റ് നഷ്ടത്തിൽ 348 റൺസെന്ന വലിയ സ്കോർ നേടി. മറുപടി ബാറ്റിംഗിനിറങ്ങിയ ത്രിപുര 36.5 ഓവറിൽ 203 റൺസിന് പുറത്തായി.
24-കാരനായ വിഘ്നേഷ് 2025-ൽ മുംബൈ ഇന്ത്യൻസിനായി ഐപിഎൽ കളിച്ചിരുന്നു. 2026-ലെ ഐപിഎല്ലിൽ രാജസ്ഥാൻ റോയൽസിന് വേണ്ടിയാണ് അദ്ദേഹം കളത്തിലിറങ്ങുക. ആഭ്യന്തര ക്രിക്കറ്റിലെ ഈ റെക്കോർഡ് നേട്ടം താരത്തിന്റെ കരിയറിലെ പ്രധാന നാഴികക്കല്ലായാണ് വിലയിരുത്തപ്പെടുന്നത്.
