Warning: Cannot modify header information - headers already sent in /home1/nalamida/public_html/wp-content/plugins/gtranslate/gtranslate.php on line 90
ഷക്‌സ്ഗാം താഴ്‌വരയിലെ ചൈനീസ് കടന്നുകയറ്റവും ഇന്ത്യയുടെ കടുത്ത വെല്ലുവിളിയും | Nalamidam
14 November 2026
Home News National ഷക്‌സ്ഗാം താഴ്‌വരയിലെ ചൈനീസ് കടന്നുകയറ്റവും ഇന്ത്യയുടെ കടുത്ത വെല്ലുവിളിയും

ഷക്‌സ്ഗാം താഴ്‌വരയിലെ ചൈനീസ് കടന്നുകയറ്റവും ഇന്ത്യയുടെ കടുത്ത വെല്ലുവിളിയും

ഏകദേശം 5,000 ചതുരശ്ര കിലോമീറ്റർ വിസ്തൃതിയുള്ള ഷക്‌സ്ഗാം താഴ്‌വരയിൽ ചൈന 75 കിലോമീറ്റർ നീളമുള്ള, എല്ലാ കാലാവസ്ഥയിലും ഉപയോഗിക്കാവുന്ന റോഡ് നിർമ്മാണം പൂർത്തിയാക്കിയിരിക്കുകയാണ്. കിഴക്കൻ ലഡാക്കിലെ സൈനിക പിന്മാറ്റത്തിന് പിന്നാലെ ഈ പ്രദേശം പുതിയൊരു സംഘർഷ മേഖലയായി മാറിയിരിക്കുന്നു.

309

| വാമിക

ഹിമാലയത്തിന്റെ മഞ്ഞുമൂടിയ നിശബ്ദതയെ ഭേദിച്ചുകൊണ്ട് ഏഷ്യയിലെ രണ്ട് വൻശക്തികൾക്കിടയിൽ പുതിയൊരു നയതന്ത്ര യുദ്ധത്തിന് കളമൊരുങ്ങുകയാണ്. സിയാച്ചിൻ ഗ്ലേസിയറിന് വടക്കുള്ള നിഗൂഢമായ ഷക്‌സ്ഗാം താഴ്‌വര (Shaksgam Valley) ഇന്ന് ലോകശ്രദ്ധയുടെ കേന്ദ്രബിന്ദുവായി മാറിയിരിക്കുന്നു. ചൈന ഇവിടെ നിർമ്മിച്ച അത്യാധുനികമായ ഒരു റോഡ് കേവലം കല്ലും സിമന്റും കൊണ്ടുള്ള ഒന്നല്ല, മറിച്ച് ദക്ഷിണേഷ്യയിലെ അധികാര സന്തുലിതാവസ്ഥയെ അട്ടിമറിക്കാനുള്ള ഒരു തന്ത്രപ്രധാനമായ നീക്കമാണ്.

റോഡ് നിർമ്മാണവും ഭൗമരാഷ്ട്രീയ പ്രാധാന്യവും

ഏകദേശം 5,000 ചതുരശ്ര കിലോമീറ്റർ വിസ്തൃതിയുള്ള ഷക്‌സ്ഗാം താഴ്‌വരയിൽ ചൈന 75 കിലോമീറ്റർ നീളമുള്ള, എല്ലാ കാലാവസ്ഥയിലും ഉപയോഗിക്കാവുന്ന റോഡ് നിർമ്മാണം പൂർത്തിയാക്കിയിരിക്കുകയാണ്. കിഴക്കൻ ലഡാക്കിലെ സൈനിക പിന്മാറ്റത്തിന് പിന്നാലെ ഈ പ്രദേശം പുതിയൊരു സംഘർഷ മേഖലയായി മാറിയിരിക്കുന്നു. ഇന്ത്യയെ സംബന്ധിച്ചിടത്തോളം ഈ പ്രദേശം അതീവ പ്രാധാന്യമർഹിക്കുന്ന ഒന്നാണ്. സിയാച്ചിൻ ഗ്ലേസിയറിൽ പാകിസ്താൻ നടത്തുന്ന നീക്കങ്ങൾ സൂക്ഷ്മമായി നിരീക്ഷിക്കാൻ ഷക്‌സ്ഗാം താഴ്‌വരയിലെ നിയന്ത്രണം നിർണ്ണായകമാണ്.

1963-ലെ ‘ചതി’യുടെ ചരിത്രം

നിയമപരമായി നോക്കിയാൽ ഷക്‌സ്ഗാം താഴ്‌വര ഇന്ത്യയുടെ അഭിഭാജ്യ ഭാഗമാണ്. 1947 ഒക്ടോബറിൽ ജമ്മു കശ്മീർ ഇന്ത്യൻ യൂണിയനിൽ ചേർന്നതോടെ ഈ പ്രദേശം നിയമപരമായി ഭാരതത്തിന്റേതായി മാറി. എന്നാൽ, പാകിസ്താൻ നടത്തിയ അധിനിവേശത്തിലൂടെ ഈ പ്രദേശം അവരുടെ കൈവശമെത്തുകയും, പിന്നീട് 1963-ൽ ഇന്ത്യയുടെ കടുത്ത പ്രതിഷേധം അവഗണിച്ച് പാകിസ്താൻ ഇത് ചൈനയ്ക്ക് വിട്ടുകൊടുക്കുകയും ചെയ്തു.

അന്നത്തെ കരാർ പ്രകാരം കശ്മീർ തർക്കം പരിഹരിക്കപ്പെടുമ്പോൾ ഈ അതിർത്തി വീണ്ടും ചർച്ച ചെയ്യാം എന്നൊരു വ്യവസ്ഥയുണ്ടെങ്കിലും, ഇന്ത്യ ഈ കരാറിനെ ഇന്നുവരെ അംഗീകരിച്ചിട്ടില്ല.

സിപിഇസിയും (CPEC) ചൈനയുടെ തന്ത്രവും

ചൈന-പാകിസ്താൻ സാമ്പത്തിക ഇടനാഴിയുടെ (CPEC) ഭാഗമായാണ് ഈ റോഡ് നിർമ്മാണം നടക്കുന്നത്. കാരക്കോറം മലനിരകളിൽ നിന്നുള്ള കണക്റ്റിവിറ്റി വർദ്ധിപ്പിക്കാനും പാക് അധീന പ്രദേശങ്ങളിലേക്ക് കൂടുതൽ എളുപ്പത്തിൽ പ്രവേശനം നേടാനും ഈ പാത ചൈനയെ സഹായിക്കും. എന്നാൽ ചൈന ഇതിനെ ന്യായീകരിക്കുന്നത് മറ്റൊന്നായിട്ടാണ്. ഇത് തങ്ങളുടെ മണ്ണാണെന്നും അവിടെ നിർമ്മാണം നടത്താൻ തങ്ങൾക്ക് അവകാശമുണ്ടെന്നും ചൈന അവകാശപ്പെടുന്നു. പ്രാദേശികമായ സാമൂഹിക-സാമ്പത്തിക വികസനത്തിനും ജനങ്ങളുടെ ഉപജീവനമാർഗ്ഗം മെച്ചപ്പെടുത്തുന്നതിനുമുള്ള ഒരു ‘സാമ്പത്തിക സഹകരണ പദ്ധതി’ മാത്രമാണിതെന്നാണ് ചൈനീസ് വിദേശകാര്യ മന്ത്രാലയ വക്താവ് മാവോ നിംഗ് പറയുന്നത്.

ഇന്ത്യയുടെ ഉറച്ച നിലപാട്

ഇന്ത്യൻ വിദേശകാര്യ മന്ത്രാലയവും സൈന്യവും ഈ നീക്കത്തെ അതീവ ഗൗരവത്തോടെയാണ് കാണുന്നത്. ഷക്‌സ്ഗാം താഴ്‌വര ഇന്ത്യൻ ഭൂപ്രദേശമാണെന്നും 1963-ലെ ചൈന-പാകിസ്താൻ കരാർ നിയമവിരുദ്ധവും അസാധുവുമാണെന്നും ഇന്ത്യ ആവർത്തിച്ച് വ്യക്തമാക്കിയിട്ടുണ്ട്. ‘പാകിസ്താൻ അനധികൃതമായി കൈവശപ്പെടുത്തിയ ഇന്ത്യൻ ഭൂമിയിലൂടെ കടന്നുപോകുന്ന ചൈന-പാകിസ്താൻ സാമ്പത്തിക ഇടനാഴിയെ ഇന്ത്യ ഒരിക്കലും അംഗീകരിക്കില്ല’ എന്ന് വിദേശകാര്യ മന്ത്രാലയ വക്താവ് രൺധീർ ജയ്സ്വാൾ വ്യക്തമാക്കി. ഇന്ത്യൻ കരസേനാ മേധാവി ജനറൽ ഉപേന്ദ്ര ദ്വിവേദിയും ചൈനയുടെ ഈ പ്രവർത്തനങ്ങളെ ശക്തമായി എതിർത്തു.