ഡോളർ യുഗത്തിന് അന്ത്യമാകുമോ?; ലോകസാമ്പത്തിക ക്രമം മാറ്റിക്കുറിക്കാൻ ബ്രിക്‌സ് ഡിജിറ്റൽ കറൻസി വരുന്നു

| വാമിക

ആഗോള സാമ്പത്തിക രംഗത്തെ ‘അമേരിക്കൻ കുത്തക’ അവസാനിക്കുമോ? ദശാബ്ദങ്ങളായി ലോകവ്യാപാരത്തെ നിയന്ത്രിക്കുന്ന യു.എസ്. ഡോളറിന്റെ സിംഹാസനം ഇളകുന്നതിന്റെ സൂചനകളാണ് ഇപ്പോൾ പുറത്തുവരുന്നത്. അതിർത്തി കടന്നുള്ള ഇടപാടുകൾക്കായി ബ്രിക്‌സ് (BRICS) രാജ്യങ്ങൾ സ്വന്തം ഡിജിറ്റൽ കറൻസികളെ പരസ്പരം ബന്ധിപ്പിക്കാൻ ഒരുങ്ങുകയാണ്.

എന്താണ് ബ്രിക്‌സ് ഡിജിറ്റൽ കറൻസി സംയോജനം?

ബ്രിക്‌സ് രാജ്യങ്ങൾ (ബ്രസീൽ, റഷ്യ, ഇന്ത്യ, ചൈന, ദക്ഷിണാഫ്രിക്ക തുടങ്ങിയവ) തങ്ങളുടെ ഔദ്യോഗിക ഡിജിറ്റൽ കറൻസികൾ ഉപയോഗിച്ച് നേരിട്ട് വ്യാപാരവും ടൂറിസം ഇടപാടുകളും നടത്തുന്ന രീതിയാണിത്. യൂറോ പോലെയുള്ള ഒരൊറ്റ കറൻസിക്ക് പകരം, ഡിജിറ്റൽ രൂപത്തിലോ കമ്മോഡിറ്റി പിന്തുണയുള്ള അക്കൗണ്ട് യൂണിറ്റായോ ആയിരിക്കും ഈ സംവിധാനം പ്രവർത്തിക്കുക.

റിസർവ് ബാങ്കിന്റെ (RBI) നിർണ്ണായക നീക്കം

ബ്രിക്‌സ് രാജ്യങ്ങൾക്കിടയിൽ വ്യാപാരം സുഗമമാക്കുന്നതിനായി ഡിജിറ്റൽ കറൻസികളെ ബന്ധിപ്പിക്കണമെന്ന ശുപാർശ റിസർവ് ബാങ്ക് ഓഫ് ഇന്ത്യ കേന്ദ്ര സർക്കാരിന് മുന്നിൽ വെച്ചിട്ടുണ്ട്. വാണിജ്യ ഇടപാടുകളും ടൂറിസവും എളുപ്പമാക്കുകയാണ് ലക്ഷ്യം. 2026-ലെ ബ്രിക്‌സ് ഉച്ചകോടിയിൽ ഈ വിഷയം ഔദ്യോഗികമായി ഉന്നയിക്കാനാണ് ആർബിഐ നിർദ്ദേശിച്ചിരിക്കുന്നത്. ഇന്ത്യയുടെ ഇ-റുപ്പിയിൽ (e-Rupee) നിലവിൽ ഏകദേശം 8.3 മില്യൺ ഉപയോക്താക്കളുണ്ട്, ഇത് പുതിയ നീക്കത്തിന് കരുത്തേകുമെന്നാണ് പ്രതീക്ഷ.

എന്തുകൊണ്ട് ‘ഡീ-ഡോളറൈസേഷൻ’? (De-dollarization)

ആഗോള വ്യാപാരത്തിന്റെ 85 ശതമാനത്തിലധികവും ബാങ്ക് കരുതൽ ശേഖരത്തിന്റെ 60 ശതമാനത്തിലധികവും നിലവിൽ ഡോളറിലാണ് നടക്കുന്നത്. ഈ ആധിപത്യം കുറയ്ക്കാനാണ് ബ്രിക്‌സ് രാജ്യങ്ങൾ ശ്രമിക്കുന്നത്. പാശ്ചാത്യ രാജ്യങ്ങൾക്ക് മേധാവിത്വമുള്ള ഐഎംഎഫ്, ലോക ബാങ്ക് തുടങ്ങിയ സ്ഥാപനങ്ങളിൽ നിന്നുള്ള സ്വാതന്ത്ര്യമാണ് പ്രധാന കാരണം. റഷ്യ, ഇറാൻ, വെനിസ്വേല തുടങ്ങിയ രാജ്യങ്ങൾക്കെതിരായ അമേരിക്കൻ ഉപരോധങ്ങൾ ഡോളറിനെ ആശ്രയിക്കുന്നതിലെ അപകടസാധ്യതകൾ വെളിപ്പെടുത്തിയിട്ടുണ്ട്. സ്വിഫ്റ്റ്’ (SWIFT) പോലുള്ള ഡോളർ ആധിപത്യമുള്ള സംവിധാനങ്ങളെ ഒഴിവാക്കുന്നതിലൂടെ ഇടപാട് ചെലവും സമയവും കുറയ്ക്കാൻ സാധിക്കും.

വർദ്ധിച്ചുവരുന്ന അന്താരാഷ്ട്ര തർക്കങ്ങൾക്കിടയിൽ സ്വന്തം സമ്പദ്‌വ്യവസ്ഥയെ സംരക്ഷിക്കുക എന്നത് ബ്രിക്‌സ് രാജ്യങ്ങളുടെ മുൻഗണനയാണ്. അതേസമയം, പുതിയ സംവിധാനത്തിൽ ചൈനീസ് കറൻസിയായ യുവാന് (Yuan) അമിത പ്രാധാന്യം ലഭിക്കുമോ എന്ന ആശങ്ക മറ്റ് അംഗരാജ്യങ്ങൾക്കുണ്ട്. ഇന്ത്യയിൽ നിന്നുള്ള ഇറക്കുമതിക്ക് മാത്രം ഉപയോഗമുള്ള രൂപ റഷ്യയിൽ കുമിഞ്ഞുകൂടിയത് വലിയ വ്യാപാരപ്രശ്നങ്ങൾ സൃഷ്ടിച്ചിരുന്നുവെന്നതും മറ്റൊരു ആശങ്കയാണ്.

ഒരു പുതിയ ഡിജിറ്റൽ റിസർവ് കറൻസി ആഗോളതലത്തിൽ വിശ്വസനീയവും സ്ഥിരതയുള്ളതുമാകുമോ എന്നതിൽ സംശയവും നിലനിൽക്കുന്നു. ഡോളറിന് പകരമായി മറ്റൊരു കറൻസി കൊണ്ടുവരുന്ന രാജ്യങ്ങൾക്ക് മേൽ കടുത്ത തീരുവ ചുമത്തുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഭീഷണിയും വെല്ലുവിളി ഉയർത്തുന്നുണ്ട്.

ആഗോള ജിഡിപിയുടെ 46 ശതമാനവും ലോക ജനസംഖ്യയുടെ 55 ശതമാനവും പ്രതിനിധീകരിക്കുന്ന വലിയൊരു കൂട്ടായ്മയാണ് ബ്രിക്‌സ്. അതുകൊണ്ട് തന്നെ ഇവരുടെ ഓരോ നീക്കവും ലോക സാമ്പത്തിക ക്രമത്തിൽ വലിയ മാറ്റങ്ങൾ വരുത്തും. എന്നാൽ ഡോളറിനെ പൂർണ്ണമായും തകർക്കുകയല്ല, മറിച്ച് ഡോളറിനെ അമിതമായി ആശ്രയിക്കുന്നത് കുറയ്ക്കുക മാത്രമാണ് തങ്ങളുടെ ലക്ഷ്യമെന്ന് ബ്രിക്‌സ് രാജ്യങ്ങൾ ഇതിനകം വ്യക്തമാക്കിയിട്ടുണ്ട്.