അമേരിക്കയുമായുള്ള സാധ്യമായ വെടിനിർത്തലിന് വേണ്ടിയുള്ള രണ്ട് ഇടനില രാജ്യങ്ങൾ ടെഹ്‌റാനെ അറിയിച്ച നിർദ്ദേശങ്ങൾ ഇറാൻ്റെ പരമോന്നത നേതാവ് മോജ്‌തബ ഖമേനി നിരസിച്ചതായി ഒരു മുതിർന്ന ഇറാനിയൻ ഉദ്യോഗസ്ഥൻ ചൊവ്വാഴ്‌ച വാർത്താ ഏജൻസിയായ റോയിട്ടേഴ്‌സ് റിപ്പോർട്ട് ചെയ്‌തു.
വിദേശനയ സമ്മേളനത്തിൽ അമേരിക്കക്കും ഇസ്രായേലിനും എതിരെ പ്രതികാരം ചെയ്യാനുള്ള മോജ്‌തബ ഖമേനിയുടെ നിലപാട് “വളരെ കഠിനവും ഗൗരവമുള്ളതും ആയിരുന്നു” എന്ന് ഉദ്യോഗസ്ഥൻ അവകാശപ്പെട്ടു. എന്നിരുന്നാലും, ഖമേനി നേരിട്ട് സെഷനുകളിൽ പങ്കെടുത്തോ എന്ന് അദ്ദേഹം വ്യക്തമാക്കിയില്ല.
നിയമനത്തിന് ശേഷമുള്ള തൻ്റെ ആദ്യ പ്രസ്‌താവനയിൽ, യുദ്ധത്തിൽ കൊല്ലപ്പെട്ടവരോട് പ്രതികാരം ചെയ്യുമെന്ന് ഖമേനി പ്രതിജ്ഞയെടുക്കുകയും ഇറാൻ ശത്രുവിൽ നിന്ന് “നഷ്‌ടപരിഹാരം” നേടുമെന്ന് അവകാശപ്പെടുകയും ചെയ്‌തു. അങ്ങനെ ചെയ്യാൻ വിസമ്മതിച്ചാൽ, ഇറാൻ “അവരുടെ സ്വത്തുക്കളിൽ നിന്ന് എടുക്കുകയോ” അതേ അളവിൽ അവയെ നശിപ്പിക്കുകയോ ചെയ്യുമെന്ന് അദ്ദേഹം പറഞ്ഞു.
“ഈ പ്രതികാരത്തിൻ്റെ ഒരു പരിമിതമായ അളവ് ഇതുവരെ വ്യക്തമായ രൂപം കൈവരിച്ചിട്ടുണ്ട്. പക്ഷേ അത് പൂർണമായി നേടുന്നതുവരെ, ഈ കേസ് ഞങ്ങളുടെ മുൻഗണനകളിൽ ഒന്നായി തുടരും,” -അദ്ദേഹം പറഞ്ഞു.
ഇറാൻ ഒരിക്കലും പിന്നോട്ട് പോകില്ലെന്നും “പൂർണ ശക്തിയോടെ” ചെറുക്കുമെന്നും പരേതനായ ആയത്തുള്ള അലി ഖമേനിക്ക് മാത്രമല്ല, യുദ്ധത്തിൽ ജീവൻ നഷ്‌ടപ്പെട്ട ഓരോ പൗരനും വേണ്ടി പ്രതികാരം ചെയ്യുമെന്നും അദ്ദേഹം പറഞ്ഞു.
മോജ്‌തബ വെടിനിർത്തൽ ആവശ്യം നിരസിച്ചു. യുഎസിനും ഇസ്രായേലിനുമുള്ള പ്രതികാരം ‘വളരെ ഗൗരവമുള്ളതാണ്’.
ഫെബ്രുവരി 28ന് യുഎസ്- ഇസ്രായേൽ വ്യോമാക്രമണത്തിൽ പിതാവിൻ്റെ ജീവൻ നഷ്‌ടപ്പെട്ടതിനെ തുടർന്ന് ഖമേനിയെ വൈദ്യചികിത്സക്കായി റഷ്യയിലേക്ക് മാറ്റിയിരിക്കാം. റഷ്യൻ പ്രസിഡന്റ് വ്‌ളാഡിമിർ പുടിൻ ഇറാൻ പ്രസിഡന്റ് മസൂദ് പെഷേഷ്‌കിയനുമായി നടത്തിയ ഫോൺ സംഭാഷണത്തിനിടെ ഖമേനിക്ക് “വ്യക്തിപരമായി വൈദ്യചികിത്സ വാഗ്ദാനം ചെയ്‌തതിന്” ശേഷമാണ് 56 -കാരനായ പുരോഹിതനെ മോസ്കോയിലേക്ക് മാറ്റിയതെന്ന് കുവൈറ്റ് പത്രമായ അൽ- ജസീറ റിപ്പോർട്ട് ചെയ്യുന്നു.
പുടിൻ്റെ കോളിന് ശേഷം വ്യാഴാഴ്‌ച റഷ്യൻ സൈനിക വിമാനത്തിൽ ഖമേനിയെ മോസ്കോയിലേക്ക് കൊണ്ടുപോയി എന്ന് റിപ്പോർട്ട് അവകാശപ്പെട്ടു.
അതേസമയം, റിപ്പോർട്ട് സ്ഥിരീകരിക്കാനോ നിഷേധിക്കാനോ റഷ്യ വിസമ്മതിച്ചു. ടാസ് വാർത്താ ഏജൻസിയോട് സംസാരിച്ച റഷ്യൻ പ്രസിഡന്റിൻ്റെ പ്രസ് സെക്രട്ടറി ദിമിത്രി പെസ്കോവ് പറഞ്ഞു, “ഇത്തരം റിപ്പോർട്ടുകളെ കുറിച്ച് ഞങ്ങൾ ഒരിക്കലും അഭിപ്രായം പറയാറില്ല.”
ഇറാനിലെ ഉന്നത സുരക്ഷാ ഉദ്യോഗസ്ഥനായ അലി ലാരിജാനിയെ രാത്രിയിലെ ആക്രമണത്തിൽ സൈന്യം കൊലപ്പെടുത്തിയതായി ഇസ്രായേൽ പ്രതിരോധ മന്ത്രി ചൊവ്വാഴ്‌ച പറഞ്ഞു. റെവല്യൂഷണറി ഗാർഡിൻ്റെ ഓൾ- വോളണ്ടിയർ ബാസിജ് സേനയുടെ തലവൻ ജനറൽ ഗോലം റെസ സുലൈമാനിയെയും കൊലപ്പെടുത്തിയതായി സൈന്യം പ്രഖ്യാപിച്ചു. ഇരുവരുടെയും മരണത്തിന് ഇറാൻ സ്ഥിരീകരണം നൽകിയിട്ടില്ല.