രാജ്യത്തെ എൽപിജി വിതരണ സംവിധാനത്തിൽ പുതിയ നിയന്ത്രണങ്ങൾ വരാൻ സാധ്യതയുണ്ടെന്ന് റിപ്പോർട്ടുകൾ. 2026 മെയ് മുതൽ ഗ്യാസ് സിലിണ്ടർ ബുക്കിംഗ് നിയമങ്ങളിൽ പ്രധാന മാറ്റങ്ങൾ നടപ്പാക്കാമെന്നാണ് സൂചന. ഇതിൽ രണ്ട് ബുക്കിംഗുകൾക്കിടയിൽ 25 ദിവസത്തെ നിർബന്ധിത ഇടവേള ഉൾപ്പെടെ കർശന വ്യവസ്ഥകൾ പരിഗണനയിലുണ്ട്.
കരിഞ്ചന്തയും പൂഴ്ത്തിവയ്പ്പും തടയുന്നതിനായി കേന്ദ്ര സർക്കാർ സ്വീകരിക്കുന്ന നടപടികളുടെ ഭാഗമായാണ് ഈ പരിഷ്കാരങ്ങൾ. വീടുകളിലേക്ക് എൽപിജി സിലിണ്ടറുകൾ തടസ്സമില്ലാതെ എത്തിക്കാനാണ് ലക്ഷ്യം.
കഴിഞ്ഞ ഏപ്രിലിൽ തന്നെ ബുക്കിംഗ് സംവിധാനത്തിൽ ചില മാറ്റങ്ങൾ കൊണ്ടുവന്നിരുന്നു. നഗരപ്രദേശങ്ങളിൽ 25 ദിവസവും ഗ്രാമപ്രദേശങ്ങളിൽ 45 ദിവസവും ഇടവേള നിർദേശിക്കുന്ന രീതിയും, ആധാർ അടിസ്ഥാനമാക്കിയ ഇ-കെവൈസി പരിശോധനയും അന്ന് ശക്തമാക്കിയിരുന്നു.
പുതിയ നിർദേശങ്ങളിൽ ഏറ്റവും ശ്രദ്ധേയമായത് ഒടിപി അടിസ്ഥാനമാക്കിയ ഡെലിവറി സംവിധാനമാണ്. സിലിണ്ടർ എത്തിക്കുമ്പോൾ രജിസ്റ്റർ ചെയ്ത മൊബൈൽ നമ്പറിലേക്ക് ഒടിപി ലഭിക്കുകയും, അത് സ്ഥിരീകരിച്ച ശേഷം മാത്രമേ ഡെലിവറി പൂർത്തിയാക്കുകയുള്ളൂ. ഇതിലൂടെ അനധികൃത ഉപയോഗം തടയാനാകുമെന്നാണ് വിലയിരുത്തൽ.
ഇന്ത്യൻ ഓയിൽ കോർപ്പറേഷന്റെ ഇൻഡെയ്ൻ, ഭാരത് ഗ്യാസ്, എച്ച്പി ഗ്യാസ് തുടങ്ങിയ കമ്പനികളുമായി ബന്ധപ്പെട്ട് ഈ മാറ്റങ്ങൾ ചർച്ചയിലാണെന്ന് സൂചനയുണ്ട്. മെയ് 1 മുതൽ വിലകളും ബുക്കിംഗ് നയങ്ങളും പുതുക്കപ്പെടാൻ സാധ്യതയുണ്ടെന്നും റിപ്പോർട്ടുകൾ പറയുന്നു.
അതേസമയം, ഡെലിവറി ഓതന്റിക്കേഷൻ കോഡ് (DAC) അടിസ്ഥാനമാക്കിയുള്ള സംവിധാനം ഇതിനകം തന്നെ രാജ്യത്ത് വ്യാപകമായി നടപ്പാക്കിയിട്ടുണ്ടെന്നും, ഓൺലൈൻ ബുക്കിംഗ് സംവിധാനങ്ങൾ 99 ശതമാനത്തോളം ഡിജിറ്റലൈസ് ചെയ്തിട്ടുണ്ടെന്നും സർക്കാർ വൃത്തങ്ങൾ വ്യക്തമാക്കുന്നു.
പുതിയ നിയന്ത്രണങ്ങൾ നടപ്പായാൽ എൽപിജി വിതരണ സംവിധാനം കൂടുതൽ സുരക്ഷിതവും സുതാര്യവുമാകുമെന്ന് വിലയിരുത്തപ്പെടുന്നു.
