ഇന്ത്യയുടെ പ്രതിരോധ മേഖലയിൽ പുതിയൊരു ചരിത്രം കുറിച്ചുകൊണ്ട് ശത്രുരാജ്യങ്ങളുടെ ഭൂഖണ്ഡാന്തര ബാലിസ്റ്റിക് മിസൈലുകളെ (ICBM) ആകാശത്ത് തന്നെ തകർക്കാൻ ശേഷിയുള്ള അത്യാധുനിക ബാലിസ്റ്റിക് മിസൈൽ പ്രതിരോധ (BMD) കവചത്തിൻ്റെ രണ്ടാം ഘട്ട പരീക്ഷണങ്ങൾ രാജ്യം വിജയകരമായി പൂർത്തിയാക്കി. പ്രതിരോധ ഗവേഷണ സ്ഥാപനമായ ഡിആർഡിഒ ജൂൺ 10, 11 തീയതികളിലാണ് ഈ നിർണായകമായ പരീക്ഷണങ്ങൾ നടത്തിയത്.
ശത്രുവിൻ്റെ ഏത് മിസൈൽ ആക്രമണത്തെയും പ്രതിരോധിക്കാൻ കെൽപ്പുള്ള അത്യാധുനിക പ്രതിരോധ സംവിധാനമുള്ള ലോകത്തെ ചുരുക്കം ചില രാജ്യങ്ങളുടെ പട്ടികയിലേക്ക് ഇന്ത്യയും അഭിമാനപൂർവ്വം ഇടംപിടിച്ചിരിക്കുകയാണ്.
ഈ ചരിത്രപരമായ വിജയത്തിൽ ഡിആർഡിഒയെയും അതിന് പിന്നിൽ പ്രവർത്തിച്ച ശാസ്ത്രജ്ഞരെയും പ്രതിരോധ മന്ത്രി രാജ്നാഥ് സിംഗ് അഭിനന്ദിച്ചു. പരീക്ഷണത്തിൻ്റെ ചിത്രങ്ങൾ അദ്ദേഹം തൻ്റെ എക്സ് (X) പോസ്റ്റിലൂടെ പങ്കുവെക്കുകയും ചെയ്തു. അത്യാധുനികമായ ഈ പ്രതിരോധ സാങ്കേതികവിദ്യ സ്വന്തമാക്കിയതിലൂടെ ഇന്ത്യ ഈ സാങ്കേതികവിദ്യ കൈവശമുള്ള ചുരുക്കം രാജ്യങ്ങളുടെ പട്ടികയിലേക്ക് എത്തിയെന്നും അദ്ദേഹം വിശദീകരിച്ചു. ഇതിനോടൊപ്പം നാവികസേനയുടെ ഇടത്തരം ദൂരപരിധിയുള്ള കപ്പൽവേധ മിസൈലിൻ്റെ (Naval Anti-Ship Missile-Medium Range) ആദ്യ പരീക്ഷണവും വിജയകരമായി പൂർത്തിയാക്കാൻ സാധിച്ചു.
പരീക്ഷണത്തിൻ്റെ സാങ്കേതിക വശങ്ങൾ പരിശോധിക്കുമ്പോൾ, അന്തരീക്ഷത്തിന് ഉള്ളിലും (endo-atmosphere) പുറത്തും (exo-atmosphere) ശത്രു മിസൈലുകളെ തടയാൻ ശേഷിയുള്ള ഇൻ്റെർസെപ്റ്റർ മിസൈലുകളാണ് ഇന്ത്യ പരീക്ഷിച്ചത്. പരീക്ഷണ വേളയിൽ ഇൻ്റെർസെപ്റ്റർ മിസൈലുകൾ അവയുടെ ലക്ഷ്യങ്ങൾ വിജയകരമായി തകർത്തു. അത്യാധുനികമായ ഈ സംവിധാനം ശത്രുരാജ്യങ്ങൾ തൊടുത്തുവിടുന്ന ദീർഘദൂര ബാലിസ്റ്റിക് മിസൈലുകളെയും ഭൂഖണ്ഡാന്തര മിസൈലുകളെയും ഫലപ്രദമായി നേരിടാൻ ഇന്ത്യയെ പ്രാപ്തമാക്കുന്നു.
ഇന്ത്യയുടെ മിസൈൽ പ്രതിരോധ പദ്ധതി പ്രധാനമായും ഘട്ടങ്ങളിലായാണ് വികസിപ്പിച്ചിരിക്കുന്നത്. ആദ്യ ഘട്ടത്തിൽ അന്തരീക്ഷത്തിനുള്ളിൽ മിസൈലുകളെ തകർക്കുന്ന പൃഥ്വി ഡിഫൻസ് വെഹിക്കിൾ (PDV), അഡ്വാൻസ്ഡ് എയർ ഡിഫൻസ് (AAD) എന്നിവയാണ് ഉൾപ്പെട്ടിരുന്നത്. ഇപ്പോൾ വിജയകരമായി പൂർത്തിയാക്കിയ രണ്ടാം ഘട്ടത്തിൽ എഡി-1, എഡി-2 എന്നീ ഇൻ്റെർസെപ്റ്റർ മിസൈലുകൾ ഉപയോഗിച്ച് അന്തരീക്ഷത്തിന് പുറത്തുവെച്ച് മിസൈലുകളെ തകർക്കാനുള്ള ശേഷിയാണ് കൈവരിച്ചത്. ഇന്ത്യയുടെ പ്രതിരോധ മേഖലയിലെ സ്വയംപര്യാപ്തതയിലേക്കുള്ള പ്രധാന ചുവടുവെപ്പായാണ് ഈ നേട്ടം വിലയിരുത്തപ്പെടുന്നത്.
ഈ പ്രതിരോധ കവചത്തിൻ്റെ ഏറ്റവും നിർണായകമായ ഘടകങ്ങളിലൊന്ന് തദ്ദേശീയമായി വികസിപ്പിച്ചെടുത്ത സോർഡ് ഫിഷ് (Swordfish) റഡാർ സാങ്കേതിക വിദ്യയാണ്. ഇസ്രായേലിൻ്റെ ഗ്രീൻ പൈൻ റഡാർ സംവിധാനത്തെ അടിസ്ഥാനമാക്കി ഇന്ത്യയുടെ തദ്ദേശീയമായ നിരവധി സംവിധാനങ്ങൾ ഉൾപ്പെടുത്തി വികസിപ്പിച്ചെടുത്ത ആക്ടീവ് ഇലക്ട്രോണിക്കലി സ്കാൻഡ് അറേ (AESA) റഡാറുകൾ ദീർഘദൂരത്തിലുള്ള ലക്ഷ്യങ്ങളെ കൃത്യതയോടെ നിരീക്ഷിക്കാൻ പ്രാപ്തമാണ്. പുതിയ മിസൈൽ ഭീഷണികളെ ഫലപ്രദമായി നേരിടാൻ അത്യാധുനിക സാങ്കേതികവിദ്യ ഉപയോഗിച്ചാണ് ഈ സംവിധാനം രൂപകൽപ്പന ചെയ്തിരിക്കുന്നതെന്ന് ഡിആർഡിഒ അറിയിച്ചു.
1998ൽ പാക്കിസ്ഥാൻ ആണവ പരീക്ഷണം നടത്തിയതിനെ തുടർന്ന് 1999-ലാണ് ഇന്ത്യ ഇത്തരമൊരു ബാലിസ്റ്റിക് മിസൈൽ പ്രതിരോധ പദ്ധതിക്ക് തുടക്കം കുറിച്ചത്. അയൽരാജ്യമായ ചൈനയുടെ ഈ രംഗത്തെ മുന്നേറ്റങ്ങളും ഇന്ത്യയെ ഈ നീക്കത്തിന് പ്രേരിപ്പിച്ചിട്ടുണ്ട്. ശത്രുവിൻ്റെ മിസൈൽ ആക്രമണ സാധ്യത മുൻകൂട്ടി കണ്ട് ആധുനികമായ ഒരു പ്രതിരോധ കവചം ഒരുക്കുക എന്നത് രാജ്യസുരക്ഷക്ക് അനിവാര്യമായിരുന്നു. വിക്ഷേപണ വാഹനങ്ങൾക്ക് പുറമെ ഇസ്രായേൽ സാങ്കേതിക വിദ്യയുടെ സഹായത്തോടെ വികസിപ്പിച്ച തദ്ദേശീയ റഡാറുകൾ ഇതിൽ വലിയ പങ്കുവഹിക്കുന്നു.
ഭാവിയിലെ അത്യാധുനിക വെല്ലുവിളികൾ മുൻകൂട്ടി കണ്ട് മൂന്നാം ഘട്ട പരീക്ഷണങ്ങൾക്കും ഡിആർഡിഒ തുടക്കം കുറിച്ചു. ഹൈപ്പർസോണിക് ആയുധങ്ങളെയും ഒരേ സമയം ഒന്നിലധികം ലക്ഷ്യസ്ഥാനങ്ങളിലേക്ക് ആണവമുനകൾ തൊടുക്കാൻ കഴിയുന്ന എംഐആർവി (MIRV) മിസൈലുകളെയും നേരിടാനായി എഡി-എഎച്ച്, എഡി- എഎം എന്നീ പുതിയ മിസൈലുകൾ വികസിപ്പിക്കും. പൂർണമായി വിന്യസിക്കപ്പെടുമ്പോൾ, ഈ സംവിധാനം മിസൈൽ വിക്ഷേപണ വാഹനങ്ങൾ, പ്രത്യേക ദീർഘദൂര റഡാറുകൾ, കൺട്രോൾ സെൻ്റെറുകൾ എന്നിവയെ അതീവ സുരക്ഷിതമായ ഒരു ആശയവിനിമയ ശൃംഖല വഴി ബന്ധിപ്പിച്ച് ഇന്ത്യയെ സുരക്ഷിതമാക്കും.
