പാർലമെന്റിന്റെ മൺസൂൺ സമ്മേളനത്തിൽ ഇത്തവണ ശ്രദ്ധ നേടിയത് ചർച്ചയായ വിഷയങ്ങൾ മാത്രമല്ല, എംപിമാർ ഉപയോഗിച്ച ഭാഷയും. സോഷ്യൽ മീഡിയയിൽ ജെൻ-ഇസഡ് തലമുറ വ്യാപകമായി ഉപയോഗിക്കുന്ന ‘ഡെലുലു’, ‘ഫോമോ’, ‘ക്ലോക്ക് ഇറ്റ്’ തുടങ്ങിയ പ്രയോഗങ്ങൾ ലോക്സഭയിലെ ചർച്ചകളിലും ഇടംപിടിച്ചു. യുവാക്കളുമായി കൂടുതൽ അടുപ്പം സ്ഥാപിക്കാനുള്ള രാഷ്ട്രീയ പാർട്ടികളുടെ ശ്രമത്തിന്റെ ഭാഗമായാണ് ഈ ഭാഷാമാറ്റമെന്നാണ് വിലയിരുത്തൽ.
നീറ്റ് ചോദ്യപേപ്പർ ചോർച്ചയടക്കമുള്ള വിഷയങ്ങളിൽ യുവജനങ്ങളുടെ പ്രതിഷേധങ്ങൾക്ക് നേതൃത്വം നൽകിയ കോക്രോച്ച് ജനതാ പാർട്ടി (CJP) എന്ന പ്രസ്ഥാനത്തിന്റെ ഉയർച്ചയാണ് ഈ മാറ്റത്തിന് പിന്നിലെ പ്രധാന കാരണമായി ചൂണ്ടിക്കാണിക്കപ്പെടുന്നത്. രാജ്യവ്യാപകമായി നടന്ന പ്രതിഷേധങ്ങൾ സർക്കാരിനും രാഷ്ട്രീയ പാർട്ടികൾക്കും യുവജനങ്ങളുടെ സ്വാധീനം തിരിച്ചറിയാൻ ഇടയാക്കിയെന്നാണ് വിലയിരുത്തൽ.
പ്രതിഷേധങ്ങൾക്ക് പിന്നാലെ പ്രധാനമന്ത്രി നരേന്ദ്ര മോദി യുവാക്കളെ ലക്ഷ്യമിട്ട് സോഷ്യൽ മീഡിയയിൽ കൂടുതൽ സജീവമാകുകയും, പാർട്ടി നേതാക്കളോടും യുവാക്കളുമായി ഡിജിറ്റൽ വേദികളിലൂടെ ആശയവിനിമയം ശക്തമാക്കാൻ നിർദേശിക്കുകയും ചെയ്തിരുന്നു.
ലോക്സഭയിലെ ചർച്ചയ്ക്കിടെ ബിജെപി എംപി ബൻസുരി സ്വരാജ് പ്രധാനമന്ത്രി മോദിയെ പ്രശംസിക്കാൻ ജെൻ-ഇസഡ് പ്രയോഗങ്ങൾ ഉപയോഗിച്ചു. ബിജെപി എംപി ശ്രീകാന്ത് ഷിൻഡെ, പ്രതിപക്ഷത്തിന്റെ നിലപാടിനെ ‘ഡെലുലു’ (ഭ്രമം) എന്നും, വിദ്യാർത്ഥി പ്രതിഷേധങ്ങളിൽ പങ്കാളിയാകാൻ കഴിയാത്തതിന്റെ ‘ഫോമോ’ (നഷ്ടപ്പെടുമോയെന്ന ഭയം) രാഹുൽ ഗാന്ധിക്കുണ്ടെന്നും വിമർശിച്ചു.
അതേസമയം, വിഷയത്തിന്റെ ഗൗരവം മറന്ന് ഇത്തരം പ്രയോഗങ്ങളിലേക്ക് ചർച്ച വഴിമാറരുതെന്ന് എൻസിപി (എസ്.പി.) എംപി സുപ്രിയ സുലെ പ്രതികരിച്ചു. യുവാക്കളുമായി ബന്ധം ശക്തിപ്പെടുത്തേണ്ടതിന്റെ ആവശ്യകത അംഗീകരിക്കുമ്പോഴും, പാർലമെന്റിലെ ചർച്ചകൾ ഗൗരവമുള്ള വിഷയങ്ങളിൽ കേന്ദ്രീകരിക്കണമെന്ന് അവർ ആവശ്യപ്പെട്ടു.
ജെൻ-ഇസഡ്, ജനറേഷൻ ആൽഫ വോട്ടർമാരെ സ്വാധീനിക്കാനുള്ള ശ്രമത്തിന്റെ ഭാഗമായാണ് രാഷ്ട്രീയ പാർട്ടികൾ പുതിയ ഭാഷാശൈലികൾ സ്വീകരിക്കുന്നതെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
