രാജസ്ഥാനിലെ ഗോശാലകൾക്ക് സർക്കാർ നൽകിയ ഗ്രാന്റുകളിൽ വ്യാപക ക്രമക്കേടുകൾ കണ്ടെത്തിയതിനെത്തുടർന്ന് മൃഗസംരക്ഷണ വകുപ്പ് കർശന നടപടികളിലേക്ക്. ജയ്പൂരിലെ പ്രമുഖ ഗോശാലകളായ ശ്രീ പിഞ്ച്രപോൾ ഗൗശാല (സംഗനേർ), ഹിംഗോണിയ പശു പുനരധിവാസ കേന്ദ്രം എന്നിവയിൽ നിന്ന് മാത്രം ആകെ 3,62,75,920 രൂപ ഈടാക്കാൻ നോട്ടീസ് നൽകി. സംസ്ഥാനത്തൊട്ടാകെ 38 ഗോശാലകളിൽ നിന്നായി 57.36 കോടി രൂപയാണ് അധികമായി നൽകിയതായി കണ്ടെത്തി തിരിച്ചുപിടിക്കുന്നത്.
അക്കൗണ്ടന്റ് ജനറൽ (ഓഡിറ്റ്-II) നടത്തിയ പരിശോധനയിലാണ് ഗ്രാന്റ് പേയ്മെന്റുകളിലെ ഗുരുതര ക്രമക്കേടുകൾ പുറത്തുവന്നത്.
സിഎജി അന്വേഷണത്തിൽ ക്രമക്കേടുകൾ:
- കന്നുകാലികളുടെ എണ്ണത്തിൽ കൃത്രിമം: സഹായം ആവശ്യപ്പെട്ട കന്നുകാലികളുടെ എണ്ണവും ഷെൽട്ടറിലെ യഥാർത്ഥ എണ്ണവും തമ്മിൽ വലിയ പൊരുത്തക്കേടുകൾ കണ്ടെത്തി. യഥാർത്ഥ കണക്കുകളേക്കാൾ ഏകദേശം 1.31 ലക്ഷം കന്നുകാലികളെ അധികമായി അപേക്ഷകളിൽ ഉൾപ്പെടുത്തിയതായി വ്യക്തമായി.
- ചത്ത പശുക്കളുടെ പേരിലും ഫണ്ട്: ചത്ത കന്നുകാലികളുടെ ടാഗുകൾ അടിസ്ഥാനമാക്കിയും ഗ്രാന്റുകൾ കൈപ്പറ്റി. പിഞ്ച്രപോൾ ഗൗശാലയിൽ മാത്രം 1,307 ചത്ത കന്നുകാലികളുടെ ടാഗുകൾ ഗ്രാന്റ് കണക്കുകൂട്ടലിൽ ഉൾപ്പെടുത്തിയതായി കണ്ടെത്തി.
- ഡ്യൂപ്ലിക്കേറ്റ് ടാഗുകളും രജിസ്ട്രാഷൻ ഇല്ലായ്മയും: ഒരേ ടാഗുകൾ വീണ്ടും ഉപയോഗിക്കുന്ന പ്രവണത വ്യാപകമാണ്. ‘ഭാരത് പശുധൻ’ ആപ്പിൽ രജിസ്റ്റർ ചെയ്യാത്ത ആയിരക്കണക്കിന് ടാഗുകൾ ഉപയോഗിച്ചും സബ്സിഡി തുക വാങ്ങിയിട്ടുണ്ട്. ഉദാഹരണത്തിന്, പിഞ്ച്രപോൾ ഗൗശാലയിൽ ആപ്പിൽ രജിസ്റ്റർ ചെയ്യാത്ത 4,858 ടാഗുകളാണ് കണ്ടെത്തിയത്.
പണം തിരിച്ചടയ്ക്കാൻ കർശന നിർദ്ദേശം
കണ്ടെത്തിയ അധിക തുക മൂന്ന് മാസത്തിനകം ട്രഷറിയിൽ നിക്ഷേപിക്കണമെന്നാണ് വകുപ്പിന്റെ ഉത്തരവ്. മുഴുവൻ തുകയും ഒറ്റത്തവണയായി അടയ്ക്കാൻ ബുദ്ധിമുട്ടുള്ളവയ്ക്ക് രണ്ടോ മൂന്നോ ഗഡുക്കളായി നൽകാനുള്ള ഇളവുണ്ട്. ഇതിനായി ഗോശാല മാനേജ്മെന്റുകൾ ഏഴ് ദിവസത്തിനകം സമ്മതപത്രം സമർപ്പിക്കണം.
നിശ്ചിത സമയത്തിനകം തുക തിരിച്ചടയ്ക്കാൻ തയ്യാറായില്ലെങ്കിൽ 2026-27 സാമ്പത്തിക വർഷത്തെ ആദ്യ ഘട്ട ഗ്രാന്റുകൾ പൂർണ്ണമായി തടയുമെന്നും വകുപ്പ് മുന്നറിയിപ്പ് നൽകിയിട്ടുണ്ട്.
പ്രമുഖ ഗോശാലകളും നിരീക്ഷണത്തിൽ
ജയ്പൂരിലെ സ്ഥാപനങ്ങൾക്ക് പുറമെ മറ്റ് വലിയ ഗോശാലകളും അന്വേഷണ പരിധിയിലുണ്ട്.
- ശ്രീ ബ്രജ് കാമദ് സുർഭി ഫോറസ്റ്റ് റിസർച്ച് ഇൻസ്റ്റിറ്റ്യൂട്ട് (ഡീഗ്): 16.36 കോടി രൂപ
- ശ്രീ ഗോപാൽ ഗോവർദ്ധൻ പശു സംരക്ഷണ കേന്ദ്രം (ജലോർ): 10.95 കോടി രൂപ
തുടക്കത്തിൽ കൃത്യമായ പരിശോധനകൾ നടക്കാത്തതാണ് ഇത്തരം വലിയ തട്ടിപ്പുകൾക്ക് വഴിവെച്ചതെന്നാണ് വിലയിരുത്തപ്പെടുന്നത്.
