ലഡാക്കിലെ ആകാശത്ത് അപൂർവവും മനോഹരവുമായ പ്രകൃതി പ്രതിഭാസം ദൃശ്യമായി. പിങ്ക്, പച്ച, നീല, പർപ്പിൾ തുടങ്ങി മഴവില്ലിന്റെ വിവിധ നിറങ്ങളിൽ തിളങ്ങിയ മേഘങ്ങൾ പ്രദേശവാസികളെയും വിനോദസഞ്ചാരികളെയും ഒരുപോലെ അമ്പരപ്പിച്ചു.
പ്രദേശത്ത് സന്ദർശനത്തിനെത്തിയ യോഗ പരിശീലക പ്രേർണ ദലാലാണ് ഈ അപൂർവ കാഴ്ച ക്യാമറയിൽ പകർത്തി സമൂഹമാധ്യമങ്ങളിൽ പങ്കുവെച്ചത്. ഉയർന്ന പർവതനിരകളുടെ പശ്ചാത്തലത്തിൽ വർണാഭമായ മേഘങ്ങൾ വിരിഞ്ഞുനിൽക്കുന്ന ചിത്രങ്ങളും വീഡിയോകളും സോഷ്യൽ മീഡിയയിൽ വേഗത്തിൽ ശ്രദ്ധ നേടുകയാണ്.
“ലഡാക്കിലെ ഹിമാനികൾക്ക് മുകളിലൂടെ ഡ്രോൺ ദൃശ്യങ്ങൾ പകർത്തുന്നതിനിടെയാണ് ഈ കാഴ്ച ശ്രദ്ധയിൽപ്പെട്ടത്. മേഘങ്ങൾ മഴവില്ലിന്റെ നിറങ്ങളിൽ തിളങ്ങുകയായിരുന്നു. ആദ്യം ഞാൻ കണ്ടത് വിശ്വസിക്കാൻ പോലും കഴിഞ്ഞില്ല,” എന്ന് പ്രേർണ തന്റെ ഇൻസ്റ്റഗ്രാം പോസ്റ്റിൽ കുറിച്ചു. രണ്ട് മണിക്കൂറിലേറെ നേരം ഈ പ്രതിഭാസം ദൃശ്യമായിരുന്നുവെന്നും വിവിധ പർവത മേഖലകളിൽ നിന്ന് വ്യക്തമായി കാണാനായിരുന്നുവെന്നും അവർ വ്യക്തമാക്കി.
എന്താണ് ‘ക്ലൗഡ് ഇറിഡെസെൻസ്’?
ശാസ്ത്രീയമായി ഈ പ്രതിഭാസത്തെ ക്ലൗഡ് ഇറിഡെസെൻസ് അഥവാ റെയിൻബോ ക്ലൗഡ്സ് എന്നാണ് വിളിക്കുന്നത്. സൂര്യപ്രകാശം മേഘങ്ങളിലെ സൂക്ഷ്മ ജലത്തുള്ളികളിലൂടെയോ ഐസ് പരലുകളിലൂടെയോ കടന്നുപോകുമ്പോൾ പ്രകാശം വിവിധ നിറങ്ങളായി വിഭജിക്കപ്പെടുന്നതാണ് ഇതിന് കാരണം.
സാധാരണ മഴവില്ലിൽ നിന്ന് വ്യത്യസ്തമായി, ഈ നിറങ്ങൾ മേഘങ്ങളുടെ ഉള്ളിലോ അരികുകളിലോ പ്രത്യക്ഷപ്പെടുന്നതാണ് പ്രത്യേകത. ഉയർന്ന ഉയരവും ശുദ്ധമായ അന്തരീക്ഷവുമുള്ള ലഡാക്ക് പോലുള്ള പ്രദേശങ്ങൾ ഇത്തരം ദൃശ്യങ്ങൾക്ക് അനുയോജ്യമായ സാഹചര്യങ്ങൾ സൃഷ്ടിക്കുന്നതായി വിദഗ്ധർ പറയുന്നു.
സോഷ്യൽ മീഡിയയിൽ ചിത്രങ്ങൾ വൈറലായതോടെ അവ കൃത്രിമബുദ്ധി ഉപയോഗിച്ച് സൃഷ്ടിച്ചതാണോ എന്ന സംശയവും ചിലർ ഉന്നയിച്ചു. എന്നാൽ വസ്തുതാ പരിശോധന നടത്തിയവർ ചിത്രങ്ങളും വീഡിയോകളും യഥാർഥമാണെന്ന് സ്ഥിരീകരിച്ചു.
സാൻസ്കർ ഉൾപ്പെടെയുള്ള ലഡാക്കിലെ മറ്റ് മേഖലകളിലും മുമ്പ് സമാനമായ വർണാഭമായ മേഘങ്ങൾ കണ്ടിട്ടുണ്ടെന്ന് നിരവധി സോഷ്യൽ മീഡിയ ഉപയോക്താക്കൾ അഭിപ്രായപ്പെട്ടു. പ്രകൃതിയുടെ ഈ അപൂർവ വിസ്മയത്തിന്റെ ചിത്രങ്ങളും ദൃശ്യങ്ങളും ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.
