രണ്ട് വ്യത്യസ്ത ഐഫോണുകളിൽ ഒരേ ഫോൺ നമ്പർ ഒരേസമയം ഉപയോഗിക്കാൻ സാധിക്കുന്ന ഫീച്ചർ ആപ്പിൾ അവതരിപ്പിച്ചു. ആപ്പിളിന്റെ ഏറ്റവും പുതിയ ഐഒഎസ് 27 (iOS 27) പതിപ്പിലാണ് ഈ പുതിയ ഫീച്ചർ ഉൾപ്പെടുത്തിയിരിക്കുന്നത്. ഈ വർഷത്തെ വേൾഡ് വൈഡ് ഡെവലപ്പർ കോൺഫറൻസിൽ ആപ്പിൾ ഈ സൗകര്യം പരിചയപ്പെടുത്തിയിരുന്നെങ്കിലും, പ്രമുഖ ആപ്പിൾ കമ്മ്യൂണിറ്റിയായ ‘മാക് റൂമേഴ്സിലെ’ (MacRumors) അംഗമായ ‘pdfu’ ആണ് ഇപ്പോൾ ഈ ഫീച്ചറിന്റെ പ്രവർത്തന വീഡിയോയും വിവരങ്ങളും പുറത്തുവിട്ടിരിക്കുന്നത്.
‘ഐഫോൺ ഹാൻഡ്ഓഫ്’ എന്ന് വിളിക്കപ്പെടുന്ന ഈ ഫീച്ചറിന്റെ സഹായത്തോടെ ഒരേ ഫോൺ നമ്പർ രണ്ട് ഫോണുകളിലായി ഉപയോഗിക്കാൻ സാധിക്കും. ഐഫോണിലെ ‘Settings’ ആപ്പിലെ ‘Cellular’ എന്ന ഓപ്ഷൻ വഴിയാണ് ഈ സേവനം ക്രമീകരിക്കേണ്ടത്. നിങ്ങളുടെ കയ്യിലെ രണ്ട് ഫോണുകളിൽ ഒന്നിനെ പ്രധാന ഉപകരണമായി (Primary iPhone) തിരഞ്ഞെടുക്കേണ്ടതുണ്ട്. ഈ ഫോണിലാണ് പ്രധാന ഇസിം (eSIM) സജ്ജീകരിക്കുക. രണ്ടാമത്തെ ഫോണിൽ കമ്പാനിയൻ ഇസിം (companion eSIM) ആണ് ഉണ്ടാവുക. പ്രൈമറി ഐഫോണിലൂടെയാവും ഈ ഫീച്ചറിന്റെ തുടർന്നുളള സെറ്റിങ്സ് പൂർണ്ണമായും നിയന്ത്രിക്കേണ്ടത്.
ഈ ക്രമീകരണങ്ങൾ പൂർത്തിയായാൽ, നിങ്ങൾ ഏത് ഫോൺ ആണോ കയ്യിലെടുത്ത് അൺലോക്ക് ചെയ്യുന്നത് ആ ഫോണിലേക്ക് നമ്പർ ഓട്ടോമാറ്റിക് ആയി മാറും. തുടർന്ന് ആ ഫോണിലേക്കായിരിക്കും ഫോൺ വിളികളും സന്ദേശങ്ങളും എത്തിച്ചേരുക. ഇങ്ങനെ നമ്പർ മാറുമ്പോൾ അതിന്റെ വ്യക്തമായ അറിയിപ്പ് ഫോണിലെ ഡൈനാമിക് ഐലന്റിൽ (Dynamic Island) തെളിയും. കൂടാതെ, ഈ സമയത്ത് നിങ്ങൾ ഉപയോഗിച്ചുകൊണ്ടിരിക്കുന്ന ഉപകരണത്തെ അടിസ്ഥാനമാക്കിയായിരിക്കും നിങ്ങളുടെ ലൊക്കേഷൻ ഷെയറിങ് (Location Sharing) സംവിധാനം പ്രവർത്തിക്കുക.
എന്നാൽ ഈ ഫീച്ചർ പൂർണ്ണതോതിൽ ആസ്വദിക്കുന്നതിന് ടെലികോം സേവനദാതാക്കളുടെ പിന്തുണ അത്യാവശ്യമാണ്. നിലവിൽ യു.എസിലെ ടെലികോം സേവനദാതാവായ ടി-മൊബൈൽ (T-Mobile) മാത്രമാണ് ഈ ഫീച്ചർ സജീവമായി പരീക്ഷിച്ചുകൊണ്ടിരിക്കുന്നത്. എങ്കിലും വരുംദിവസങ്ങളിൽ ഇത് എടി ആൻഡ് ടി (AT&T), വെറൈസൺ (Verizon) എന്നീ നെറ്റ്വർക്കുകളിലേക്കും വ്യാപിപ്പിക്കാൻ സാധ്യതയുണ്ട്. ടെലികോം സേവനദാതാക്കളുടെ പിന്തുണയോടെ മാത്രമേ ഈ ഫീച്ചർ ഉപയോക്താക്കളിലേക്ക് പൂർണ്ണമായി എത്തിക്കാനാവൂ.
