സി.എം.ആര്‍.എല്‍ മാസപ്പടി ഇടപാടുമായി ബന്ധപ്പെട്ട് എന്‍ഫോഴ്സ്മെന്റ് ഡയറക്ടറേറ്റ് (ഇ.ഡി) അയച്ച കത്ത് ലഭിച്ചതായി ആഭ്യന്തര മന്ത്രി രമേശ് ചെന്നിത്തല. ഡി.ജി.പിക്ക് ലഭിച്ച കത്ത് അദ്ദേഹം പരിശോധിച്ച ശേഷം ഹോം സെക്രട്ടറിക്ക് കൈമാറിയിട്ടുണ്ട്. ഹോം സെക്രട്ടറിയുടെ പരിശോധനയ്ക്കു ശേഷം തുടര്‍നടപടികള്‍ സംബന്ധിച്ച റിപ്പോര്‍ട്ട് സമര്‍പ്പിക്കും.
നിയമപരമായി ചെയ്യേണ്ട കാര്യങ്ങള്‍ ചെയ്യാന്‍ സര്‍ക്കാര്‍ ബാധ്യസ്ഥമാണെന്നും ഇ.ഡി അന്വേഷണത്തിനുശേഷം ലഭിച്ച കത്ത് തള്ളിക്കളയാനാകില്ലെന്നും മന്ത്രി വ്യക്തമാക്കി. ഹോം സെക്രട്ടറിയുടെ ശുപാര്‍ശയുടെ അടിസ്ഥാനത്തില്‍ മുഖ്യമന്ത്രിയുമായി ചര്‍ച്ച നടത്തിയ ശേഷമായിരിക്കും തുടര്‍നടപടികള്‍ സ്വീകരിക്കുക. കത്ത് ലഭിച്ച വിവരം സംസ്ഥാന പൊലീസ് മേധാവിയും സ്ഥിരീകരിച്ചിട്ടുണ്ട്.
ഇ.ഡിയുടെ കത്ത് വിശദമായി പരിശോധിച്ച് നിയമപരമായ നടപടികളിലേക്ക് കടക്കാനാണ് സര്‍ക്കാര്‍ തീരുമാനം. ഇതോടെ മാസപ്പടി ഇടപാടുമായി ബന്ധപ്പെട്ട അന്വേഷണത്തില്‍ സംസ്ഥാനതലത്തില്‍ നിര്‍ണായകമായ തുടര്‍ നിയമനടപടികള്‍ക്ക് സാധ്യതയൊരുങ്ങുകയാണ്. അന്വേഷണത്തില്‍ കണ്ടെത്തിയ തെളിവുകളുടെ അടിസ്ഥാനത്തില്‍ കേസ് രജിസ്റ്റര്‍ ചെയ്യണമെന്നാണ് ഇ.ഡി ആവശ്യപ്പെട്ടിരിക്കുന്നത്. പിഎംഎല്‍എ (PMLA) സെക്ഷന്‍ 66(2) പ്രകാരമാണ് ഇഡി ഡിജിപിക്ക് റിപ്പോര്‍ട്ട് കൈമാറിയിട്ടുള്ളത്.