ഷില്ലോങ്: ശിക്ഷാ കാലാവധി പൂർത്തിയാക്കിയിട്ടും ബംഗ്ലാദേശി പൗരനെ ഒരു വർഷത്തിലേറെയായി ജയിലിൽ അടച്ചിരിക്കുന്നതിൽ അധികാരികളെ രൂക്ഷമായി വിമർശിച്ച് മേഘാലയ ഹൈക്കോടതി. തുടർച്ചയായ ഈ തടങ്കൽ നിയമവിരുദ്ധമായ തടങ്കലിന് തുല്യമാണെന്നും നഷ്ടപരിഹാരം നൽകേണ്ടി വരുമെന്നും കോടതി മുന്നറിയിപ്പ് നൽകി. ചീഫ് ജസ്റ്റിസ് രേവതി മൊഹിതെ ഡെറെ, ജസ്റ്റിസ് ഡബ്ല്യു ഡിയെങ്ദോ എന്നിവരടങ്ങിയ ഡിവിഷൻ ബെഞ്ചാണ് വിഷയം പരിഗണിച്ചത്.
കോടതിയുടെ ചോദ്യങ്ങളും നിരീക്ഷണങ്ങളും ആറ് മാസത്തെ തടവ് ഒരു വർഷം മുമ്പ് പൂർത്തിയാക്കിയ വ്യക്തിയെ എന്തിനാണ് ഇനിയും ജയിലിൽ അടച്ചിരിക്കുന്നതെന്ന് ബെഞ്ച് ചോദിച്ചു. ബംഗ്ലാദേശ് അസിസ്റ്റന്റ് ഹൈക്കമ്മീഷണറിൽ നിന്ന് പൗരത്വം സ്ഥിരീകരിക്കുന്നതിനുള്ള മറുപടി ലഭിക്കാൻ വൈകുന്നുവെന്ന അധികാരികളുടെ വിശദീകരണം കോടതി തള്ളി. മറുപടി ലഭിക്കാൻ മാസങ്ങളോ വർഷങ്ങളോ എടുത്തേക്കാമെന്നത് ശിക്ഷ കഴിഞ്ഞ ഒരാളെ ജയിലിൽ തുടരാൻ അനുവദിക്കുന്നതിനുള്ള ന്യായീകരണമല്ലെന്ന് കോടതി വ്യക്തമാക്കി.
നിയമവിരുദ്ധ തടങ്കലും നഷ്ടപരിഹാരവും ശിക്ഷാ കാലാവധി കഴിഞ്ഞ ശേഷം ആ വ്യക്തിയെ തടങ്കൽ കേന്ദ്രത്തിലേക്ക് മാറ്റുകയോ നാടുകടത്തുകയോ ചെയ്യേണ്ടതായിരുന്നുവെന്ന് കോടതി ചൂണ്ടിക്കാട്ടി. ബംഗ്ലാദേശ് പൗരനെ ഇനിയും ജയിലിൽ പാർപ്പിച്ചാൽ നഷ്ടപരിഹാരം നൽകാൻ കോടതി നിർബന്ധിതമാകുമെന്ന് സെപ്റ്റംബർ 8-ലെ ഉത്തരവിൽ ബെഞ്ച് നിരീക്ഷിച്ചു.
ജയിൽ മേധാവിക്ക് നേരിട്ട് ഹാജരാകാൻ നിർദ്ദേശം വിഷയത്തിന്റെ ഗൗരവം കണക്കിലെടുത്ത് ജയിൽ ഇൻസ്പെക്ടർ ജനറലിനോട് നേരിട്ട് ഹാജരാകാൻ കോടതി നിർദ്ദേശിച്ചു. തടവുകാരൻ മോചിതനായാൽ സ്വീകരിക്കേണ്ട ക്രമീകരണങ്ങളെക്കുറിച്ച് കോടതിയെ അറിയിക്കാനും ഉദ്യോഗസ്ഥനോട് ആവശ്യപ്പെട്ടിട്ടുണ്ട്.
