കൊച്ചി: റിപ്പോര്ട്ടര് ബ്രോഡ്കാസ്റ്റിംഗ് കമ്പനിയുടെ കൊച്ചി ഹെഡ് ഓഫീസില് പോലീസ് അതിക്രമം. പരിശോധനയെന്ന പേരില് പുലര്ച്ചെ ഓഫീസില് എത്തിയ പോലീസ് സംഘം മാധ്യമപ്രവര്ത്തകരുടെ മൊബൈല് ഫോണുകള് പിടിച്ചെടുക്കുകയും ചാനലിന്റെ തത്സമയ സംപ്രേഷണം തടസ്സപ്പെടുത്തുകയും ചെയ്തു. തൃക്കാക്കര എസിപി ബിനോയ് ചന്ദ്രന്റെ നേതൃത്വത്തിലുള്ള സംഘമാണ് മാധ്യമസ്ഥാപനത്തില് സമാനതകളില്ലാത്ത നടപടികള് നടത്തിയത്.
സംപ്രേഷണം അലങ്കോലമാക്കി
- തടസ്സപ്പെട്ട സംപ്രേഷണം: പുലര്ച്ചെ 5:50-ഓടെ ഓഫീസിലെത്തിയ പോലീസ് സംഘം വനിതാ മാധ്യമപ്രവര്ത്തകരുടെ ഉള്പ്പെടെ മൊബൈല് ഫോണുകള് കാരണം വ്യക്തമാക്കാതെ പിടിച്ചുവാങ്ങി. വാര്ത്തകള് നല്കാന് ഉപയോഗിച്ചിരുന്ന ന്യൂസ് ഡെസ്കിലെ ഫോണും പിടിച്ചെടുത്തതോടെ മോണിങ് ബുള്ളറ്റിനില് രണ്ട് വാര്ത്തകള് മാത്രമാണ് സംപ്രേഷണം ചെയ്യാന് കഴിഞ്ഞത്. ഏകദേശം അമ്പത് മിനുറ്റോളം വാര്ത്താ സംപ്രേക്ഷണം പൂർണ്ണമായും അലങ്കോലപ്പെട്ടു.
- രേഖകൾ നൽകാതെ ഭീഷണി: പരിശോധനയുടെ കാരണം വ്യക്തമാക്കാനോ എഫ്ഐആര് (FIR) അടക്കമുള്ള രേഖകൾ നൽകാനോ ഉദ്യോഗസ്ഥർ തയ്യാറായില്ല. ഓഫീസിൽ പരിശോധന തുടങ്ങി നാല് മണിക്കൂറിന് ശേഷമാണ് എഫ്ഐആര് ഓൺലൈനിൽ അപ്ലോഡ് ചെയ്തതെന്നതും ശ്രദ്ധേയമാണ്.
ഡിജിറ്റല് ഡെസ്കിലും ജീവനക്കാരുടെ വീടുകളിലും റെയ്ഡ്
റിപ്പോര്ട്ടറിന്റെ ഡിജിറ്റല് ഡെസ്കിലും പോലീസ് കടന്നുകയറ്റം ഉണ്ടായി. ഡ്യൂട്ടിയിലുണ്ടായിരുന്ന മാധ്യമപ്രവര്ത്തകരെയും വീഡിയോ എഡിറ്റര്മാരെയും ബലമായി പുറത്താക്കിയ പോലീസ്, കസേരകളില് കയറിയിരുന്ന് പുസ്തകങ്ങളും രേഖകളും അനുമതിയില്ലാതെ പരിശോധിച്ചു. അഡ്മിന് വിഭാഗത്തിലെ മുറികള് തുറന്നുകൊടുക്കണമെന്ന് ആവശ്യപ്പെട്ട് ജീവനക്കാരെ ഭീഷണിപ്പെടുത്തുകയും ചെയ്തു. ലാത്തിയും ക്യാമറകളുമായെത്തിയ പോലീസ് സംഘം ഓഫീസിന് പുറമെ റിപ്പോര്ട്ടര് അഡ്മിന് വിഭാഗത്തിലെ ജീവനക്കാരിയുടെ വീട്ടില് അതിക്രമിച്ചുകയറി അമ്മയുടെ പക്കൽ നിന്നും ഫോണ് തട്ടിപ്പറിച്ചതായും വിവരങ്ങൾ പുറത്തുവന്നിട്ടുണ്ട്.
മാധ്യമ സ്വാതന്ത്ര്യത്തിനു നേരെയുള്ള ഈ കടന്നുകയറ്റത്തിനെതിരെ വ്യാപകമായ പ്രതിഷേധമാണ് വിവിധ കേന്ദ്രങ്ങളില് നിന്ന് ഉയരുന്നത്.
