ഗ്യാനേഷിന്റെ രാജിക്കായി സുപ്രീം കോടതിയിലേക്ക് ശക്തമായ ‘ഇൻഡ്യ’ മാർച്ച്

ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഇൻഡ്യ സഖ്യത്തിന്റെ നേതൃത്വത്തിൽ ഡൽഹിയിൽ ശക്തമായ പ്രതിഷേധ മാർച്ച്. ലോക്‌സഭയിലെ പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിൽ കൊണാട്ട് പ്ലേസിൽ നിന്ന് സുപ്രീം കോടതിയിലേക്കാണ് മാർച്ച് നടത്തുന്നത്. പ്രതിപക്ഷ നേതാക്കളും വിവിധ സംഘടനകളുടെ പ്രവർത്തകരും പ്രതിഷേധത്തിൽ പങ്കെടുക്കുന്നുണ്ട്.

ഗ്യാനേഷ് കുമാറിനെതിരെ ഉന്നയിച്ച ആരോപണങ്ങളും തിരഞ്ഞെടുപ്പ് പ്രക്രിയയുമായി ബന്ധപ്പെട്ട പരാതികളും ചീഫ് ജസ്റ്റിസിന് മുന്നിൽ അവതരിപ്പിക്കാനാണ് പ്രതിപക്ഷത്തിന്റെ നീക്കം. എന്നാൽ, സംയുക്ത നിവേദനം സമർപ്പിക്കുന്നതിനായി രാഹുൽ ഗാന്ധിയും രാജ്യസഭയിലെ പ്രതിപക്ഷ നേതാവ് മല്ലികാർജുൻ ഖാർഗെയും ആവശ്യപ്പെട്ട കൂടിക്കാഴ്ചയ്ക്ക് അനുമതി ലഭിച്ചിരുന്നില്ല. വിഷയം കോടതിയുടെ പരിഗണനയിലായതിനാൽ നിയമപരമായ മാർഗത്തിലൂടെ ഹർജി നൽകാനാണ് നിർദേശമെന്നാണ് റിപ്പോർട്ടുകൾ.

ഡൽഹിയിൽ കനത്ത സുരക്ഷ

പ്രതിഷേധ മാർച്ചിന്റെ പശ്ചാത്തലത്തിൽ ഡൽഹിയിൽ സുരക്ഷ ശക്തമാക്കി. സുരക്ഷാ പ്രശ്നങ്ങൾ കണക്കിലെടുത്ത് ആറ് മെട്രോ സ്റ്റേഷനുകൾ അടച്ചിടുമെന്ന് ഡൽഹി മെട്രോ റെയിൽ കോർപറേഷൻ അറിയിച്ചു.

സുപ്രീം കോടതി പരിസരത്തും ജന്തർ മന്തറിലേക്കുള്ള വഴികളിലുമായി വൻതോതിൽ സുരക്ഷാ ഉദ്യോഗസ്ഥരെയും അർധസൈനിക വിഭാഗങ്ങളെയും വിന്യസിച്ചിട്ടുണ്ട്. ഏകദേശം 35,000 സുരക്ഷാ ഉദ്യോഗസ്ഥരെ വിന്യസിച്ചതായാണ് റിപ്പോർട്ടുകൾ. നിരോധനാജ്ഞ തുടരുന്ന സാഹചര്യത്തിൽ 37 പ്രധാന കേന്ദ്രങ്ങളിൽ ബാരിക്കേഡുകൾ സ്ഥാപിച്ചും ഗതാഗതം നിയന്ത്രിച്ചും പോലീസ് സുരക്ഷാ ക്രമീകരണങ്ങൾ ഏർപ്പെടുത്തി.

പ്രതിഷേധക്കാരുടെ നീക്കങ്ങൾ നിയന്ത്രിക്കുന്നതിനായി ബസുകളും കലാപവിരുദ്ധ വാഹനങ്ങളും ജലപീരങ്കികളും വിവിധ ഭാഗങ്ങളിൽ സജ്ജമാക്കിയിട്ടുണ്ട്.

‘ഡൽഹിയെ ജയിലാക്കി മാറ്റുന്നതെന്തിന്?’

ഇൻഡ്യ സഖ്യത്തിന്റെ മാർച്ചിന് മുന്നോടിയായി നടത്തിയ വാർത്താസമ്മേളനത്തിൽ സുരക്ഷാ ക്രമീകരണങ്ങളെ രാഹുൽ ഗാന്ധി ചോദ്യം ചെയ്തു.

പ്രതിപക്ഷം സുപ്രീം കോടതിയിലേക്ക് മാർച്ച് നടത്തുമ്പോൾ ഇത്രയധികം സുരക്ഷാ ഉദ്യോഗസ്ഥരെ വിന്യസിക്കേണ്ടതിന്റെ ആവശ്യമെന്താണെന്ന് അദ്ദേഹം ചോദിച്ചു. മോദിക്കും അമിത് ഷായ്ക്കും ഗ്യാനേഷ് കുമാറിനുമെതിരായ പൊതുജനങ്ങളുടെ വികാരമാണ് പ്രതിഷേധത്തിലൂടെ ഉയരുന്നതെന്നും രാഹുൽ ഗാന്ധി ആരോപിച്ചു.

നഗരത്തിന്റെ വിവിധ ഭാഗങ്ങളിൽ സുരക്ഷാ ഉദ്യോഗസ്ഥരെയും ബസുകളെയും കലാപവിരുദ്ധ വാഹനങ്ങളെയും ജലപീരങ്കികളെയും വിന്യസിച്ചതിനെയും അദ്ദേഹം വിമർശിച്ചു. ബസുകളും ട്രെയിനുകളും തടസ്സപ്പെടുത്തി ജനങ്ങളുടെ സഞ്ചാരം നിയന്ത്രിക്കുന്നതിലൂടെ ഡൽഹിയെ കോട്ടയ്ക്ക് സമാനമായ അവസ്ഥയിലാക്കിയെന്നും തലസ്ഥാനത്തെ ജയിലാക്കി മാറ്റുകയാണെന്നും രാഹുൽ ഗാന്ധി കുറ്റപ്പെടുത്തി.

ജന്തർ മന്തറിലെ നിയന്ത്രണത്തിനെതിരെ സിജെപി

ജന്തർ മന്തറിനെ ഔദ്യോഗിക പ്രതിഷേധ വേദികളുടെ പട്ടികയിൽനിന്ന് ഒഴിവാക്കിയ നടപടിക്കെതിരെ കോക്രോച്ച് ജന്ത പാർട്ടി (സിജെപി) രംഗത്തെത്തി.

ജന്തർ മന്തറിനെ പ്രതിഷേധ വേദിയായി നിലനിർത്തണമെന്ന ആവശ്യം ഉന്നയിച്ച സിജെപി വക്താവ് സൗരവ് ദാസ്, കേന്ദ്ര സർക്കാരിന്റെ തീരുമാനത്തെ വിമർശിച്ചു.

ജന്തർ മന്തർ ജനങ്ങളുടേതാണെന്നും പ്രതിഷേധിക്കാനും സമാധാനപരമായി ഒത്തുചേരാനുമുള്ള മൗലികാവകാശത്തിനുമേലുള്ള കടന്നുകയറ്റമാണ് നടപടിയെന്നും അദ്ദേഹം എക്സിൽ പങ്കുവെച്ച കുറിപ്പിൽ ആരോപിച്ചു. പുതിയ തീരുമാനമെടുക്കുന്നതിന് മുമ്പ് കേന്ദ്ര ആഭ്യന്തര മന്ത്രാലയം പൊതുജനങ്ങളുമായോ ബന്ധപ്പെട്ട സംഘടനകളുമായോ കൂടിയാലോചന നടത്തിയിരുന്നോയെന്നും അദ്ദേഹം ചോദിച്ചു.

പ്രതിഷേധ വേദി സംബന്ധിച്ച തീരുമാനം ഏകപക്ഷീയമാണെന്നും അത് അംഗീകരിക്കാനാവില്ലെന്നും സൗരവ് ദാസ് വ്യക്തമാക്കി. രാജ്യത്തുടനീളം പ്രതിഷേധങ്ങൾ ശക്തിപ്പെടുമെന്നും ജന്തർ മന്തർ ജനാധിപത്യപരമായ പ്രതിഷേധങ്ങളുടെ പ്രതീകമാണെന്നും അദ്ദേഹം കുറിച്ചു.

‘ജനാധിപത്യത്തിനായുള്ള പോരാട്ടം

ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധത്തിൽ പ്രതിപക്ഷം ഒറ്റക്കെട്ടാണെന്ന് ഇൻഡ്യ സഖ്യ നേതാക്കൾ വ്യക്തമാക്കി.

ജനാധിപത്യത്തെ അട്ടിമറിക്കാൻ അനുവദിക്കില്ലെന്നും വിഷയത്തിൽ എല്ലാവരും ഒരുമിച്ച് നിലകൊള്ളുമെന്നും ശശി തരൂർ എംപി പറഞ്ഞു. രാജ്യത്തെ ജനാധിപത്യവുമായി ബന്ധപ്പെട്ട നിർണായക പോരാട്ടമാണ് ഇതെന്നും വിജയം നേടേണ്ടതുണ്ടെന്നും അബി വർക്കി പ്രതികരിച്ചു.

ഇത് രാജ്യത്തിനുവേണ്ടിയുള്ള പോരാട്ടമാണെന്നായിരുന്നു ചാണ്ടി ഉമ്മന്റെ പ്രതികരണം. പ്രതിഷേധങ്ങളെ കേന്ദ്ര സർക്കാർ ഭയപ്പെടുകയാണെന്ന് മന്ത്രി ഒ. ജെ. ജനീഷും ആരോപിച്ചു. രാജ്യത്തിന്റെ താൽപര്യത്തിനായി രാഷ്ട്രീയ അഭിപ്രായവ്യത്യാസങ്ങൾ മാറ്റിവെച്ച് എല്ലാവരും ഒന്നിച്ചുനിൽക്കുകയാണെന്ന് എ. എ. റഹീം എംപിയും വ്യക്തമാക്കി.

പ്രതിഷേധക്കാരെ കസ്റ്റഡിയിലെടുത്തു

ഇൻഡ്യ സഖ്യത്തിന്റെ മാർച്ചിൽ പങ്കെടുക്കുന്നതിനായി കോൺസ്റ്റിറ്റ്യൂഷൻ ക്ലബിന് സമീപം പ്രവർത്തകരുടെ വലിയ നിരയാണ് എത്തിയത്. പ്രതിപക്ഷ നേതാവ് രാഹുൽ ഗാന്ധിയും സ്ഥലത്തെത്തി. എംപിമാരുമായി എത്തിയ ബസ് കോൺസ്റ്റിറ്റ്യൂഷൻ ക്ലബിൽനിന്ന് പുറത്തേക്ക് നീങ്ങിയതോടെയാണ് മാർച്ചിനുള്ള ഒരുക്കങ്ങൾ സജീവമായത്.

പ്രതിഷേധത്തിൽ പങ്കെടുക്കാനെത്തിയ ആം ആദ്മി പാർട്ടി പ്രവർത്തകരെ പോലീസ് കസ്റ്റഡിയിലെടുത്തതായും റിപ്പോർട്ടുകളുണ്ട്. മാർച്ചിന്റെ പശ്ചാത്തലത്തിൽ തലസ്ഥാനത്തെ പ്രധാന റോഡുകളിലും സുപ്രീം കോടതി പരിസരത്തും സുരക്ഷാ നിയന്ത്രണങ്ങൾ തുടർന്നു.

തിരഞ്ഞെടുപ്പ് പ്രക്രിയയെക്കുറിച്ചുള്ള പ്രതിപക്ഷത്തിന്റെ ആരോപണങ്ങളും ഗ്യാനേഷ് കുമാറിന്റെ രാജിയെന്ന ആവശ്യവും പ്രതിഷേധ വേദികളിലെ നിയന്ത്രണങ്ങളും ദേശീയ രാഷ്ട്രീയത്തിൽ വീണ്ടും ചർച്ചയാകുകയാണ്. അതേസമയം, ആരോപണങ്ങളുമായി ബന്ധപ്പെട്ട വിഷയങ്ങളിൽ നിയമപരമായ നടപടികളും ബന്ധപ്പെട്ട അധികാരികളുടെ പ്രതികരണങ്ങളും നിർണായകമാകും.