മുംബൈ: ഇമിഗ്രേഷൻ ആൻഡ് ഫോറിനേഴ്‌സ് ആക്ടിലെ വ്യവസ്ഥകൾ ലംഘിച്ചെന്നാരോപിച്ച് ബോളിവുഡ് നടനും യുഎസ് പൗരനുമായ ഇമ്രാൻ ഖാനോട് ഒക്ടോബർ 28നകം ഇന്ത്യ വിടാൻ നിർദേശിച്ച് മുംബൈ പോലീസ് നോട്ടീസ് നൽകി. ഒക്ടോബർ 10ന് മുംബൈയിലെ ഓഗസ്റ്റ് ക്രാന്തി മൈതാനിയിൽ നടന്ന രാഷ്ട്രീയ പ്രതിഷേധത്തിൽ പങ്കെടുത്തതുമായി ബന്ധപ്പെട്ടാണ് നടപടി.
മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് നടന്ന പ്രതിഷേധത്തിനിടെയാണ് പോലീസ് ഇമ്രാൻ ഖാനെ കസ്റ്റഡിയിലെടുത്തത്. സംഭവത്തിൽ തുടർനടപടികളുടെ ഭാഗമായാണ് രാജ്യം വിടാൻ നിർദേശിച്ചുള്ള ഔദ്യോഗിക നോട്ടീസ് നൽകിയതെന്ന് പോലീസ് അറിയിച്ചു.
വിദേശ പൗരത്വവും നിയമലംഘനവും
അമേരിക്കൻ പൗരനായ ഇമ്രാൻ ഖാൻ ഇന്ത്യയിൽ രാഷ്ട്രീയ പ്രതിഷേധങ്ങളിലും രാഷ്ട്രീയ പ്രവർത്തനങ്ങളിലും പങ്കെടുത്തത് നിയമവിരുദ്ധമാണെന്നാണ് പോലീസ് ഉദ്യോഗസ്ഥർ ചൂണ്ടിക്കാട്ടുന്നത്. വിദേശ പൗരന്മാർക്ക് ഇന്ത്യയിൽ ഇത്തരം പ്രവർത്തനങ്ങളിൽ ഏർപ്പെടുന്നതിന് നിയന്ത്രണങ്ങളുണ്ടെന്നും ബന്ധപ്പെട്ട നിയമവ്യവസ്ഥകൾ പ്രകാരമാണ് നടപടിയെന്നും അധികൃതർ വ്യക്തമാക്കി.
ഒക്ടോബർ 28നകം രാജ്യം വിടണമെന്ന് നിർദേശിക്കുന്ന നോട്ടീസിന്റെ പകർപ്പ് നടന് കൈമാറിയിട്ടുണ്ട്. വിഷയത്തിൽ കൂടുതൽ ഭരണപരമായ നടപടികൾ പുരോഗമിക്കുകയാണെന്നും പോലീസ് അറിയിച്ചു. അതേസമയം, സംഭവത്തിൽ പ്രതികരിക്കാൻ ഇമ്രാൻ ഖാൻ തയ്യാറായിട്ടില്ല.
43കാരനായ ഇമ്രാൻ ഖാൻ ബോളിവുഡിലെ നിരവധി ചിത്രങ്ങളിൽ അഭിനയിച്ചിട്ടുണ്ട്. സൂപ്പർതാരം ആമിർ ഖാന്റെ അനന്തരവനായ അദ്ദേഹം ഐ ഹേറ്റ് ലവ് സ്റ്റോറീസ് (2010), മേരെ ബ്രദർ കി ദുൽഹാൻ (2011) തുടങ്ങിയ ചിത്രങ്ങളിലൂടെ ശ്രദ്ധേയനായി. ആമിർ ഖാൻ അഭിനയിച്ച ഹാപ്പി പട്ടേൽ: ഖതർനാക് ജാസൂസ് എന്ന ചിത്രത്തിലും അദ്ദേഹം അതിഥി വേഷത്തിലെത്തിയിരുന്നു.
പ്രതിഷേധത്തിൽ പങ്കെടുത്തത് വിവാദമായി
പ്രതിഷേധത്തിനുശേഷം പോലീസ് വാഹനത്തിലേക്ക് കൊണ്ടുപോകുന്നതിനിടെ ഇമ്രാൻ ഖാൻ മാധ്യമപ്രവർത്തകരോട് സംസാരിക്കുന്ന വീഡിയോ പുറത്തുവന്നിരുന്നു. പ്രതിഷേധത്തിൽ പങ്കെടുത്തതിന്റെ കാരണം സംബന്ധിച്ച ചോദ്യത്തിന്, തനിക്ക് പ്രത്യേക ആവശ്യങ്ങളൊന്നുമില്ലെന്നും താൻ ഒരു സംഘടനയുടെയും ഭാഗമല്ലെന്നുമാണ് അദ്ദേഹം മറുപടി നൽകിയത്.
വിദേശ പൗരനായിരിക്കെ രാഷ്ട്രീയ പ്രതിഷേധത്തിൽ പങ്കെടുത്ത ഇമ്രാൻ ഖാനെതിരെ നടപടി സ്വീകരിക്കണമെന്ന് ആവശ്യപ്പെട്ട് മുൻ ബിജെപി എംപി കിരിത് സോമയ്യ മുംബൈ പോലീസിന് പരാതി നൽകിയിരുന്നു. വിദേശ പൗരന്മാർക്ക് ഇത്തരം പ്രതിഷേധങ്ങളിൽ പങ്കെടുക്കാൻ നിയമപരമായി അനുമതിയുണ്ടോയെന്ന് വ്യക്തമാക്കണമെന്നും അദ്ദേഹം ആവശ്യപ്പെട്ടു.
നടനെതിരെ പോലീസ് സ്വീകരിച്ച നടപടിയെ സോമയ്യ സ്വാഗതം ചെയ്തു. സമാനമായ പ്രവർത്തനങ്ങളിൽ ഏർപ്പെടുന്ന മറ്റ് വിദേശ പൗരന്മാരെയും കണ്ടെത്തി നിയമനടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
കിരിത് സോമയ്യയുടെ പരാതി
ഇമ്രാൻ ഖാൻ യുഎസ് പൗരനായിരിക്കെ ഇന്ത്യൻ സർക്കാരിനെതിരായ രാഷ്ട്രീയ പ്രവർത്തനങ്ങളിൽ പങ്കെടുത്തുവെന്നാണ് സോമയ്യയുടെ ആരോപണം. നടന്റെ പൗരത്വവുമായി ബന്ധപ്പെട്ട വിശദാംശങ്ങൾ ഉൾപ്പെടെ പരിശോധിക്കണമെന്നും അദ്ദേഹം ആവശ്യപ്പെട്ടിരുന്നു.
ഇമ്രാൻ ഖാനെതിരായ പരാതിയുടെ ഭാഗമായി കേന്ദ്ര സർക്കാരിന്റെ ഇമിഗ്രേഷൻ അധികൃതർ, എയർപോർട്ട് അതോറിറ്റി, മുംബൈ പോലീസ് എന്നിവരെ സമീപിച്ചതായും മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസിനോട് വിഷയത്തിൽ ഇടപെടാൻ അഭ്യർഥിച്ചതായും സോമയ്യ പറഞ്ഞു.
പരാതി നൽകിയതിന് പിന്നാലെ അധികൃതരിൽനിന്ന് നടപടിയുണ്ടായതിൽ നന്ദിയുണ്ടെന്നും നടൻ എത്രകാലമായി യുഎസ് പൗരനാണെന്നത് സംബന്ധിച്ച് റിപ്പോർട്ട് തേടിയിരുന്നുവെന്നും അദ്ദേഹം വ്യക്തമാക്കി.
ഇമ്രാൻ ഖാൻ അമേരിക്കയിൽ ജനിച്ച് വളർന്നയാളാണെന്നും ഇന്ത്യയിൽ താമസിച്ച് ഉപജീവനം നടത്തുന്നതിനിടെ സർക്കാരിനെതിരായ രാഷ്ട്രീയ, നയതന്ത്ര പ്രവർത്തനങ്ങളിൽ ഏർപ്പെട്ടുവെന്നുമാണ് സോമയ്യ ഉന്നയിക്കുന്ന ആരോപണം. സമാനമായ പ്രവർത്തനങ്ങളിൽ ഏർപ്പെടുന്നവരെ തിരിച്ചറിഞ്ഞ് നടപടിയെടുക്കണമെന്നും അദ്ദേഹം ആവശ്യപ്പെട്ടു.
എന്നാൽ, നടനെതിരായ ആരോപണങ്ങളിൽ അദ്ദേഹത്തിന്റെ പ്രതികരണം ഇതുവരെ പുറത്തുവന്നിട്ടില്ല. പോലീസ് നടപടിയുടെ തുടർവിവരങ്ങളും ലഭ്യമായിട്ടില്ല.
