കൊച്ചി: സംസ്ഥാന സർക്കാരിന്റെ വഖഫ് ബോർഡ് പുനഃസംഘടനാ നടപടികൾക്ക് സ്റ്റേ അനുവദിക്കാതെ ഹൈക്കോടതി. പുനഃസംഘടന ചോദ്യം ചെയ്ത് വഖഫ് ബോർഡ് മുൻ ചെയർമാൻ കെ.എസ്. ഹംസ നൽകിയ ഹർജി പ്രത്യേക സിംഗിൾ ബെഞ്ച് ഡിവിഷൻ ബെഞ്ചിന്റെ പരിഗണനയ്ക്ക് വിട്ടു. പുനഃസംഘടനയുമായി ബന്ധപ്പെട്ട പൊതുതാൽപര്യ ഹർജികൾ ഡിവിഷൻ ബെഞ്ചിന്റെ പരിഗണനയിലുള്ള സാഹചര്യത്തിലാണ് നടപടി.
നിയമ വിരുദ്ധമെന്ന് ഹർജിക്കാരൻ
വഖഫ് ബോർഡ് പുനഃസംഘടിപ്പിച്ച സർക്കാർ നടപടി നിയമപരമല്ലെന്നാണ് കെ.എസ്. ഹംസയുടെ വാദം. വഖഫ് നിയമത്തിലെ 14-ാം വകുപ്പ് പാലിക്കാതെയാണ് പുനഃസംഘടന നടത്തിയതെന്നും ഹൈക്കോടതി നിർദേശം തെറ്റായി വ്യാഖ്യാനിച്ചാണ് സർക്കാർ നടപടിയെടുത്തതെന്നും ഹർജിയിൽ ചൂണ്ടിക്കാട്ടി.
ബോർഡിലെ ഒഴിവുകൾ നികത്താനാണ് ഹൈക്കോടതി നിർദേശിച്ചതെന്നും എന്നാൽ അത് സമ്പൂർണ പുനഃസംഘടനയ്ക്കുള്ള അനുമതിയായി സർക്കാർ വ്യാഖ്യാനിച്ചെന്നുമാണ് ഹർജിയിലെ പ്രധാന ആരോപണം.
സർക്കാരിന്റെ വാദം
വഖഫ് ബോർഡ് പുനഃസംഘടിപ്പിക്കാൻ ഹൈക്കോടതി രണ്ടാഴ്ചത്തെ സാവകാശം അനുവദിച്ചിരുന്നുവെന്നാണ് സർക്കാരിന്റെ വിശദീകരണം. ബോർഡിലേക്ക് അംഗങ്ങളെ നിയമിക്കാൻ സർക്കാരിന് അധികാരമുണ്ടെന്നും പുനഃസംഘടന നടത്തുമെന്ന് അഡ്വക്കറ്റ് ജനറൽ ഡിവിഷൻ ബെഞ്ചിനെ അറിയിച്ചിരുന്നുവെന്നും സർക്കാർ കോടതിയിൽ വ്യക്തമാക്കി.
മുൻ സർക്കാരിന്റെ കാലത്ത് രൂപീകരിച്ച ബോർഡിൽ ഷിയ, ബോറ വിഭാഗങ്ങൾക്ക് പ്രാതിനിധ്യം നൽകിയിരുന്നില്ലെന്നും സർക്കാർ ചൂണ്ടിക്കാട്ടി. ഈ സാഹചര്യത്തിൽ നിലവിലെ ബോർഡിന്റെ പുനഃസംഘടന തെറ്റല്ലെന്നാണ് സർക്കാരിന്റെ നിലപാട്.
എംസി മായിൻ ഹാജി ചെയർമാൻ
വഖഫ് ബോർഡ് പൂർണമായി പുനഃസംഘടിപ്പിച്ച് സർക്കാർ ഉത്തരവിറക്കിയിരുന്നു. എം.സി. മായിൻ ഹാജിയാണ് പുതിയ ബോർഡിന്റെ ചെയർമാൻ. എം.ബി. മുസ്തഫൽ ഫൈസി, ഷിറാസ് ബി. കപ്പാസി, കുറുക്കോളി മൊയ്തീൻ, അബ്ദുൽ മജീദ് സലാഹി എന്നിവരും ബോർഡിലുണ്ട്.
സർക്കാർ അമുസ്‌ലിം അംഗങ്ങളെ നാമനിർദേശം ചെയ്തിട്ടില്ല. സമസ്തയുടെ പ്രതിനിധിയായി എം.ബി. മുസ്തഫൽ ഫൈസിയെ ഉൾപ്പെടുത്തിയതും വിവാദമായിട്ടുണ്ട്. അച്ചടക്കലംഘനത്തെ തുടർന്ന് സമസ്ത നേരത്തേ പുറത്താക്കിയ മുശാവറ അംഗമാണ് മുസ്തഫൽ ഫൈസിയെന്നാണ് റിപ്പോർട്ട്.
ഇരു സമസ്ത വിഭാഗങ്ങൾക്കും പ്രാതിനിധ്യം നൽകാത്ത സർക്കാർ തീരുമാനം അനീതിയാണെന്ന് എ.പി. വിഭാഗം നേതാവ് റഹ്‌മത്തുള്ള സഖാഫി എളമരം പ്രതികരിച്ചിരുന്നു.
സമസ്തയുമായി അകൽച്ചയില്ല
ചുമതലയേറ്റതിന് പിന്നാലെ സമസ്തയുമായി തനിക്ക് അകൽച്ചയില്ലെന്ന് എം.സി. മായിൻ ഹാജി വ്യക്തമാക്കിയിരുന്നു. സമസ്തയുമായി അകൽച്ച ഉണ്ടാകരുതെന്നാണ് തന്റെ ആഗ്രഹമെന്നും സമസ്ത തനിക്കെതിരെ പരാതി ഉന്നയിക്കില്ലെന്നാണ് പ്രതീക്ഷയെന്നും അദ്ദേഹം പറഞ്ഞു.
മുസ്‌ലിം ഇതര അംഗങ്ങളെ നിയമിക്കുന്നതുമായി ബന്ധപ്പെട്ട സർക്കാർ നിലപാട് കോടതിയെ അറിയിക്കുമെന്നും അദ്ദേഹം വ്യക്തമാക്കിയിരുന്നു.
പ്രതിഷേധവുമായി കാന്തപുരം വിഭാഗം
വഖഫ് ബോർഡ് പുനഃസംഘടനയിൽ പ്രതിഷേധവുമായി കാന്തപുരം വിഭാഗവും രംഗത്തെത്തി. വഖഫ് സ്വത്തുക്കളുടെയും സ്ഥാപനങ്ങളുടെയും സംരക്ഷണത്തിനായി സജീവമായി ഇടപെടുന്ന കേരള മുസ്‌ലിം ജമാഅത്തിന് അർഹമായ പ്രാതിനിധ്യം ലഭിച്ചില്ലെന്നും നീതി നിഷേധിക്കപ്പെട്ടെന്നും സയ്യിദ് ഇബ്രാഹിം ഖലീൽ ബുഖാരിയുടെ അധ്യക്ഷതയിൽ ചേർന്ന യോഗം വിലയിരുത്തി.
പുനഃസംഘടനയിൽ പ്രതിഷേധിച്ച് സംസ്ഥാനത്തെ എല്ലാ ജില്ലാ ആസ്ഥാനങ്ങളിലും ബഹുജന പ്രതിഷേധ സംഗമങ്ങൾ സംഘടിപ്പിക്കുമെന്ന് കേരള മുസ്‌ലിം ജമാഅത്ത് അറിയിച്ചു. ഈ മാസം 22-ന് രാവിലെ 11 മണിക്ക് പ്രതിഷേധ പരിപാടികൾ നടത്താനാണ് തീരുമാനം.
വഖഫ് ബോർഡ് പുനഃസംഘടനയെച്ചൊല്ലിയുള്ള നിയമപോരാട്ടവും രാഷ്ട്രീയ- സംഘടനാ പ്രതിഷേധങ്ങളും തുടരുന്നതിനിടെ, വിഷയത്തിൽ ഡിവിഷൻ ബെഞ്ചിന്റെ തുടർനടപടികൾ നിർണായകമാകും.
