രാജ്യത്തുടനീളം 1,265 സ്റ്റേഷൻ മാസ്റ്റർ തസ്തികകളിലേക്ക് നിയമനം നടത്തുന്നതിനായി റെയിൽവേ റിക്രൂട്ട്‌മെന്റ് ബോർഡുകൾ വിജ്ഞാപനം പുറപ്പെടുവിച്ചതായി റിപ്പോർട്ട്. കേന്ദ്രീകൃത തൊഴിൽ വിജ്ഞാപനമായ CEN നമ്പർ 08/2026 പ്രകാരമാണ് നിയമന നടപടികൾ നടത്തുന്നതെന്നാണ് റെയിൽവേ മന്ത്രാലയത്തിന്റെ അറിയിപ്പ്.
തസ്തികകളിലേക്ക് ഓൺലൈൻ അപേക്ഷ സമർപ്പിക്കുന്നതിനുള്ള നടപടികൾ ആരംഭിച്ചതായും 2026 നവംബർ 25 വരെ അപേക്ഷിക്കാമെന്നും അറിയിപ്പിൽ പറയുന്നു. രാജ്യത്തെ വിവിധ റെയിൽവേ റിക്രൂട്ട്‌മെന്റ് ബോർഡുകൾക്ക് കീഴിലാണ് ഒഴിവുകൾ റിപ്പോർട്ട് ചെയ്തിരിക്കുന്നത്.
ഒഴിവുകളിൽ ഏറ്റവും കൂടുതൽ മുംബൈ റെയിൽവേ റിക്രൂട്ട്‌മെന്റ് ബോർഡിന് കീഴിലാണ്. ഇവിടെ 177 ഒഴിവുകളാണുള്ളത്. ജമ്മു–ശ്രീനഗർ മേഖലയിൽ 122 ഒഴിവുകളും ചെന്നൈയിൽ 119 ഒഴിവുകളുമുണ്ട്.
അപേക്ഷിക്കുന്നതിന് മുമ്പ് വിദ്യാഭ്യാസ യോഗ്യത, പ്രായപരിധി, തിരഞ്ഞെടുപ്പ് നടപടികൾ, പരീക്ഷാരീതി, സിലബസ്, റീജിയൺ തിരിച്ചുള്ള ഒഴിവുകൾ എന്നിവ ഔദ്യോഗിക വിജ്ഞാപനത്തിൽ പരിശോധിക്കണം. അപേക്ഷാ നടപടികളും മറ്റ് നിർദേശങ്ങളും ബന്ധപ്പെട്ട ഔദ്യോഗിക റെയിൽവേ റിക്രൂട്ട്‌മെന്റ് ബോർഡ് വെബ്‌സൈറ്റുകളിൽ ലഭ്യമാകും.
സെൻട്രൽ റെയിൽവേയിൽ ടിക്കറ്റ് പരിശോധന ശക്തമാക്കുന്നു
അതേസമയം, സെൻട്രൽ റെയിൽവേ ശൃംഖലയിൽ ഒക്ടോബർ 31 വരെ പ്രത്യേക ടിക്കറ്റ് പരിശോധനാ ഡ്രൈവ് നടത്തുന്നതായി റെയിൽവേ അറിയിച്ചു. ഇളവുകളോടെയുള്ള ടിക്കറ്റുകൾ, റിസർവേഷൻ ക്വാട്ടകൾ, റെയിൽവേ പാസുകൾ, ഗ്രൂപ്പ് ബുക്കിങ്ങുകൾ എന്നിവ കേന്ദ്രീകരിച്ചാണ് പരിശോധന.
ഇളവുകളോ പ്രത്യേക ക്വാട്ടകളോ ഉപയോഗിച്ച് യാത്ര ചെയ്യുന്നവർക്ക് അതിനുള്ള അർഹത തെളിയിക്കുന്ന യഥാർഥ തിരിച്ചറിയൽ രേഖകൾ കൈവശം ഉണ്ടായിരിക്കണം. ആധാർ കാർഡ്, പാസ്‌പോർട്ട്, പാൻ കാർഡ്, ഡ്രൈവിങ് ലൈസൻസ്, വോട്ടർ ഐഡി, സർക്കാർ തിരിച്ചറിയൽ കാർഡ്, വിദ്യാർഥി തിരിച്ചറിയൽ കാർഡ് തുടങ്ങിയ രേഖകൾ പരിശോധനയ്ക്കിടെ ആവശ്യപ്പെടാം.
മൊബൈൽ ഫോണിൽ സൂക്ഷിച്ചിരിക്കുന്ന രേഖകളുടെ ഫോട്ടോകളും ഫോട്ടോസ്റ്റാറ്റ് പകർപ്പുകളും സ്വീകരിക്കില്ലെന്നാണ് ഉദ്യോഗസ്ഥർ അറിയിച്ചിരിക്കുന്നത്. റെയിൽവേ സ്റ്റേഷനുകളിലും ലോക്കൽ ട്രെയിനുകളിലും പരിശോധന നടത്തും. യാത്രക്കാർ ടിക്കറ്റ് പരിശോധനാ ജീവനക്കാരുമായി സഹകരിക്കണമെന്നും റെയിൽവേ നിർദേശിക്കുന്നു.
