വളർത്തുമൃഗങ്ങളായ നായ്ക്കൾ നമ്മൾ കാണുന്ന അതേ നിറങ്ങളിലാണോ ചുറ്റുമുള്ള ലോകത്തെ കാണുന്നത് എന്ന സംശയം പല മൃഗസ്നേഹികൾക്കുമുണ്ട്. നായ്ക്കൾക്ക് നിറങ്ങൾ തിരിച്ചറിയാൻ കഴിയില്ലെന്നും അവയുടെ ലോകം പൂർണ്ണമായും കറുപ്പും വെളുപ്പും മാത്രമാണെന്നുമാണ് പൊതുവെയുള്ള ധാരണ. എന്നാൽ ഈ ധാരണ ശരിയല്ലെന്നും മനുഷ്യരെപ്പോലെ വിപുലമായ വർണവൈവിധ്യം കാണാൻ കഴിയില്ലെങ്കിലും നായ്ക്കൾക്കും നിറങ്ങൾ തിരിച്ചറിയാനാകുമെന്ന് വിദഗ്ദ്ധർ വ്യക്തമാക്കുന്നു. അമേരിക്കൻ വെറ്ററിനറി മെഡിക്കൽ അസോസിയേഷൻ അംഗമായ ഡോ. ക്രിസ്റ്റീന ഫെർണാണ്ടസിന്റെ അഭിപ്രായത്തിൽ നീലയും മഞ്ഞയും നിറങ്ങൾ തിരിച്ചറിയുന്നതിൽ നായ്ക്കൾ വളരെ മിടുക്കരാണ്.
നിറങ്ങൾ തിരിച്ചറിയുന്നതിൽ കണ്ണിന്റെ റെറ്റിനയിലുള്ള ‘കോൺസ്’ (Cones) എന്ന പ്രകാശസംവേദന കോശങ്ങളാണ് പ്രധാന പങ്ക് വഹിക്കുന്നത്. മനുഷ്യരുടെ കണ്ണുകളിൽ ചുവപ്പ്, പച്ച, നീല എന്നീ നിറങ്ങളോട് പ്രതികരിക്കുന്ന മൂന്ന് തരത്തിലുള്ള കോൺസ് ഉള്ളപ്പോൾ, നായ്ക്കളുടെ കണ്ണുകളിൽ രണ്ട് തരത്തിലുള്ള കോൺസ് മാത്രമേയുള്ളൂ. ഇതിനെ ‘ദ്വിവർണ കാഴ്ച’ (Dichromatic vision) എന്ന് വിളിക്കുന്നു. അതിനാൽ മനുഷ്യരെപ്പോലെ എല്ലാ വർണഭേദങ്ങളും തിരിച്ചറിയാൻ അവയ്ക്ക് സാധിക്കില്ല. കറുപ്പും വെളുപ്പും മാത്രമായി ലോകം കാണുന്ന അവസ്ഥയല്ല വർണാന്ധതയെന്നും, ചില പ്രത്യേക നിറങ്ങൾ തമ്മിൽ വേർതിരിച്ചറിയാൻ കഴിയാത്ത അവസ്ഥയാണതെന്നും ശാസ്ത്രം വ്യക്തമാക്കുന്നു.
നായ്ക്കൾക്ക് ഏറ്റവും വ്യക്തമായി കാണാൻ സാധിക്കുന്നത് നീല, മഞ്ഞ എന്നീ നിറങ്ങളും അവയുടെ വകഭേദങ്ങളുമാണ്. നീലകലർന്ന പച്ച, വയലറ്റ് തുടങ്ങിയ നിറങ്ങൾ നീലയുടെ വിവിധ രൂപങ്ങളായിട്ടാണ് നായ്ക്കൾക്ക് അനുഭവപ്പെടുന്നത്. എന്നാൽ ചുവപ്പും പച്ചയും നിറങ്ങൾ വേർതിരിച്ചറിയാൻ അവയ്ക്ക് സാധിക്കില്ല. ഈ നിറങ്ങൾ തവിട്ടുനിറത്തിന്റെയോ അല്ലെങ്കിൽ ചാരനിറത്തിന്റെയോ വിവിധ വകഭേദങ്ങളായാണ് നായ്ക്കളുടെ കണ്ണിൽ പ്രത്യക്ഷപ്പെടുന്നത്. മനുഷ്യരിൽ കാണപ്പെടുന്ന ചുവപ്പ്-പച്ച വർണാന്ധതയ്ക്ക് (Red-Green color blindness) സമാനമാണ് നായ്ക്കളുടെ കാഴ്ചയെന്ന് പറയാം.
പച്ചപ്പുല്ലിൽ ചുവന്ന പന്ത് എറിഞ്ഞു നൽകിയാൽ മനുഷ്യർക്ക് അത് പെട്ടെന്ന് കണ്ടെത്താൻ സാധിക്കുമെങ്കിലും, നായ്ക്കൾക്ക് പന്തും പുല്ലും തമ്മിലുള്ള വർണവ്യത്യാസം തിരിച്ചറിയാൻ പ്രയാസമായിരിക്കും. ചുവപ്പും പച്ചയും തവിട്ടുനിറമായി തോന്നുന്നതിനാൽ കാഴ്ചയിൽ അവ തമ്മിൽ വലിയ വ്യത്യാസം അനുഭവപ്പെടില്ല. എന്നാൽ നീലയോ മഞ്ഞയോ നിറത്തിലുള്ള കളിപ്പാട്ടങ്ങളാണെങ്കിൽ നായ്ക്കൾക്ക് അവ വളരെ എളുപ്പത്തിൽ കണ്ടെത്താനാകും. അതുകൊണ്ടുതന്നെ വളർത്തുമൃഗങ്ങൾക്കായി കളിപ്പാട്ടങ്ങൾ തിരഞ്ഞെടുക്കുമ്പോൾ നീല, മഞ്ഞ നിറങ്ങൾക്ക് മുൻഗണന നൽകുന്നത് മികച്ച തീരുമാനമായിരിക്കും.
നിറങ്ങൾ തിരിച്ചറിയുന്നതിലും കാഴ്ചയുടെ സൂക്ഷ്മതയിലും മനുഷ്യരാണ് നായ്ക്കളേക്കാൾ മുന്നിലെങ്കിലും, മറ്റ് ചില കാര്യങ്ങളിൽ നായ്ക്കളുടെ കാഴ്ചശക്തി വളരെ മെച്ചപ്പെട്ടതാണ്. കുറഞ്ഞ വെളിച്ചത്തിൽ കാഴ്ച സാധ്യമാക്കാനും ചലിക്കുന്ന വസ്തുക്കളെ വേഗത്തിൽ നിരീക്ഷിക്കാനും സഹായിക്കുന്ന ‘റോഡ്സ്’ (Rods) കോശങ്ങൾ നായ്ക്കളുടെ കണ്ണുകളിൽ കൂടുതലായി കാണപ്പെടുന്നു. സന്ധ്യാസമയത്തും ഇരുട്ടുള്ള സാഹചര്യങ്ങളിലും ചലനങ്ങൾ വേഗത്തിൽ തിരിച്ചറിയാൻ നായ്ക്കൾക്ക് പ്രത്യേക കഴിവുണ്ട്. ഇരുട്ടിൽ വർണങ്ങളേക്കാൾ ചലനങ്ങൾ മനസ്സിലാക്കുന്നതാണ് അവയ്ക്ക് കൂടുതൽ പ്രയോജനപ്പെടുന്നത്.
കാഴ്ചയിലെ പരിമിതികളെ മറികടക്കാൻ നായ്ക്കളെ സഹായിക്കുന്നത് അവയുടെ അതിശക്തമായ ഘ്രാണശക്തിയാണ്. ലോകത്തെ മനസ്സിലാക്കാൻ മനുഷ്യർ കാഴ്ചയെ ആശ്രയിക്കുമ്പോൾ നായ്ക്കൾ കൂടുതൽ വിശ്വസിക്കുന്നത് തങ്ങളുടെ മൂക്കിനെയാണ്. മനുഷ്യരേക്കാൾ ആയിരം മുതൽ പതിനായിരം മടങ്ങുവരെ മികച്ച മണക്കാനുള്ള കഴിവ് നായ്ക്കൾക്കുണ്ട്. ചുറ്റുപാടുകളിലെ ജീവികളെക്കുറിച്ചും വസ്തുക്കളെക്കുറിച്ചുമുള്ള വിവരങ്ങൾ മണത്തിലൂടെ മാത്രമായി ശേഖരിക്കാൻ നായ്ക്കൾക്ക് സാധിക്കും. അതിശയകരമായ ഈ ഘ്രാണശക്തിയും ചലനങ്ങൾ തിരിച്ചറിയാനുള്ള കഴിവും വർണക്കാഴ്ചയിലെ കുറവുകളെ നികത്താൻ അവയെ സഹായിക്കുന്നു.