‘സ്വർണം, നിക്കൽ, റീനിയം ശേഖരത്തിൽ വൻ വർധന’; ചൈനയുടെ ധാതുസമ്പത്തിൽ നിർണായക മുന്നേറ്റം

ബെയ്ജിങ്: രാജ്യത്തെ ധാതു ശേഖരങ്ങളുടെ സമഗ്ര പുനഃപരിശോധനയ്ക്ക് പിന്നാലെ സ്വർണം, നിക്കൽ, റീനിയം ഉൾപ്പെടെയുള്ള തന്ത്രപ്രധാന ധാതുക്കളുടെ കരുതൽ ശേഖരത്തിൽ വൻ വർധന രേഖപ്പെടുത്തി ചൈന. ചൈനീസ് പ്രകൃതിവിഭവ മന്ത്രാലയമാണ് ഇക്കാര്യം സ്ഥിരീകരിച്ചത്. സർക്കാർ ഉടമസ്ഥതയിലുള്ള വാർത്താ ഏജൻസിയായ സിൻഹുവ ശനിയാഴ്ചയാണ് പുതിയ കണക്കുകൾ പുറത്തുവിട്ടത്.

പുനഃപരിശോധനയുടെ ഭാഗമായി രാജ്യത്തെ 27 പ്രവിശ്യകളിലും സ്വയംഭരണ പ്രദേശങ്ങളിലുമായി ഏകദേശം 2,000 സർവേ ഉദ്യോഗസ്ഥർ പ്രവർത്തിച്ചു. സ്വർണം, നിക്കൽ, റീനിയം തുടങ്ങിയ വിലപിടിപ്പുള്ള ലോഹങ്ങൾക്കു പുറമെ ഗാലിയം, ഇൻഡിയം, ടാന്റലം, വനേഡിയം തുടങ്ങിയ നിർണായക ധാതുക്കളുടെ ശേഖരത്തിലും വർധന കണ്ടെത്തിയിട്ടുണ്ട്. രാജ്യത്തിന്റെ തന്ത്രപ്രധാനമായ ധാതു വിഭവശേഷി വർധിപ്പിക്കുന്നതാണ് പുതിയ കണ്ടെത്തലുകൾ.

റീനിയം ശേഖരത്തിൽ വർധന

പ്രകൃതിവിഭവ മന്ത്രാലയത്തിന്റെ കണക്കുകൾ പ്രകാരം ചൈനയുടെ റീനിയം കരുതൽ ശേഖരത്തിൽ 200 ശതമാനത്തിലധികം വർധനയുണ്ടായി. ഉയർന്ന താപനിലയെ പ്രതിരോധിക്കുന്ന സൂപ്പർഅലോയ് നിർമാണത്തിൽ നിർണായകമായ ലോഹമാണ് റീനിയം. ജെറ്റ് എൻജിനുകളുടെ നിർമാണത്തിലും എയ്‌റോസ്പേസ് മേഖലയിലും ഇതിന് വലിയ പ്രാധാന്യമുണ്ട്.

സ്വർണത്തിന്റെ കരുതൽ ശേഖരത്തിൽ 50 പ്രധാന ഖനികൾക്ക് തുല്യമായ വർധനയാണ് രേഖപ്പെടുത്തിയിരിക്കുന്നത്. നിക്കലിന്റെ കാര്യത്തിൽ 30 പ്രധാന ഖനികൾക്ക് തുല്യമായ പുതിയ ശേഖരവും കണ്ടെത്തി.

ഗാലിയം, ഇൻഡിയം, ടാന്റലം, വനേഡിയം എന്നീ നാല് ധാതുക്കളുടെ ശേഖരത്തിലും പത്ത് പ്രധാന ഖനികൾക്ക് തുല്യമായ വർധനയുണ്ടായതായി റിപ്പോർട്ടിൽ പറയുന്നു. നേരത്തെ കുറഞ്ഞ ഗുണനിലവാരമുള്ളതോ ഖനനം ചെയ്യാൻ പ്രയാസമുള്ളതോ ആയി കണക്കാക്കിയിരുന്ന നിക്ഷേപങ്ങൾ വീണ്ടും പരിശോധിച്ചതിലൂടെയാണ് ഈ നേട്ടം കൈവരിച്ചത്.

1,800-ലധികം ഖനികളിൽ പരിശോധന

ഒരു വർഷത്തോളം നീണ്ടുനിന്ന വിപുലമായ പദ്ധതിയുടെ ഭാഗമായാണ് പുതിയ കണക്കുകൾ തയ്യാറാക്കിയത്. ചൈനയുടെ 17 തന്ത്രപ്രധാന ധാതുക്കളെ കേന്ദ്രീകരിച്ചായിരുന്നു പരിശോധന.

രാജ്യത്തുടനീളമുള്ള 1,800ലധികം പ്രവർത്തനക്ഷമമായ ഖനികളിലും വലുതും ഇടത്തരവുമായ ഖനന മേഖലകളിലും സർവേ നടത്തി. നൂറിലധികം സ്ഥാപനങ്ങൾ സംയുക്തമായാണ് പദ്ധതി നടപ്പാക്കിയത്. 27 പ്രവിശ്യകളിൽ നിന്നുള്ള ഏകദേശം 2,000 സർവേ ഉദ്യോഗസ്ഥർ വിവരശേഖരണത്തിൽ പങ്കെടുത്തു.

നിലവിലുള്ള ഖനികളിലെ ധാതു നിക്ഷേപങ്ങളും ഖനനത്തിന്റെ ഉപോൽപ്പന്നങ്ങളായി ലഭിക്കാവുന്ന മൂല്യമേറിയ ലോഹങ്ങളും വീണ്ടും വിലയിരുത്തിയതാണ് ശേഖരത്തിന്റെ കണക്കുകളിൽ വലിയ മാറ്റമുണ്ടാക്കിയത്.

സിൻജിയാങ്ങിൽ സിർക്കോൺ കണ്ടെത്തൽ

രാജ്യവ്യാപകമായ ധാതു സർവേയ്ക്ക് പുറമെ സിൻജിയാങ് മേഖലയിലും നിർണായക കണ്ടെത്തൽ നടത്തിയതായി സിൻഹുവ റിപ്പോർട്ട് ചെയ്തു. സിൻജിയാങ്ങിലെ ബൈചെങ് പ്രദേശത്താണ് ചൈനയിലെ ആദ്യത്തെ പാലിയോഫ്ലൂവിയൽ-ലാക്കുസ്ട്രിൻ സിർക്കോൺ പ്ലേസർ നിക്ഷേപം കണ്ടെത്തിയത്.

പുരാതന നദികളിലും തടാകങ്ങളിലും രൂപപ്പെട്ട അവശിഷ്ട നിക്ഷേപങ്ങളിലാണ് സിർക്കോൺ കണ്ടെത്തിയിരിക്കുന്നത്. ഈ കണ്ടെത്തൽ ചൈനയുടെ ആഭ്യന്തര സിർക്കോൺ ലഭ്യത വർധിപ്പിക്കുമെന്നാണ് വിലയിരുത്തൽ.

സിർക്കോണിയം ലഭിക്കുന്ന പ്രധാന ധാതുവാണ് സിർക്കോൺ. ആണവ റിയാക്ടറുകളിലെ ഇന്ധന ദണ്ഡുകളുടെ പുറം ആവരണ നിർമാണത്തിനും ഉയർന്ന താപനിലയെ പ്രതിരോധിക്കുന്ന എയ്‌റോസ്പേസ് അലോയികളുടെ നിർമാണത്തിനും സിർക്കോണിയം ഉപയോഗിക്കുന്നു.

നിലവിൽ സിർക്കോൺ വിതരണത്തിനായി വിദേശ രാജ്യങ്ങളെ ആശ്രയിക്കുന്ന ചൈനയ്ക്ക് പുതിയ കണ്ടെത്തൽ തന്ത്രപ്രധാനമായ നേട്ടമാകുമെന്നാണ് പ്രതീക്ഷ. വ്യവസായ, പ്രതിരോധ, ഊർജ മേഖലകളിൽ നിർണായകമായ ധാതുക്കളുടെ ആഭ്യന്തര ലഭ്യത വർധിപ്പിക്കാനുള്ള ചൈനയുടെ നീക്കത്തിന് പുതിയ സർവേ കൂടുതൽ കരുത്തുപകരും.