ഫിലിപ്പീൻസ് എന്തുകൊണ്ടാണ് രാജ്യാന്തര മയക്കുമരുന്ന് സംഘങ്ങളുടെ ഒരു കേന്ദ്രമായി തുടരുന്നത്?

മനില: തെരുവുതല മയക്കുമരുന്ന് വിൽപ്പനക്കാർക്കെതിരെ പതിറ്റാണ്ടുകളായി കർശന നടപടികൾ തുടരുമ്പോഴും ഫിലിപ്പീൻസിൽ രാജ്യാന്തര മയക്കുമരുന്ന് മാഫിയകളുടെ സ്വാധീനം വർധിക്കുന്നതായി റിപ്പോർട്ട്. ചെറുകിട വിതരണക്കാരെ ലക്ഷ്യമിട്ടുള്ള പോലീസ് നടപടികൾ വ്യാപകമാകുമ്പോഴും മയക്കുമരുന്ന് കടത്തിന് പിന്നിൽ പ്രവർത്തിക്കുന്ന വൻകിട ക്രിമിനൽ ശൃംഖലകളും സാമ്പത്തിക ഇടനിലക്കാരും കടത്ത് സംഘങ്ങളും പലപ്പോഴും നിയമനടപടികളിൽ നിന്ന് രക്ഷപ്പെടുകയാണെന്നാണ് വിദഗ്ധരുടെ മുന്നറിയിപ്പ്.

തെക്കുകിഴക്കൻ ഏഷ്യയിലുടനീളം വ്യാപിച്ചുകിടക്കുന്ന മയക്കുമരുന്ന് വിതരണ ശൃംഖലയുടെ പ്രധാന കണ്ണിയായി ഫിലിപ്പീൻസ് മാറിയിട്ടുണ്ടെന്നാണ് മുൻ മയക്കുമരുന്ന് ഉദ്യോഗസ്ഥരും സുരക്ഷാ വിദഗ്ധരും ചൂണ്ടിക്കാട്ടുന്നത്. പ്രാദേശിക വിതരണക്കാരുമായുള്ള ബന്ധം, സമുദ്രഗതാഗത മാർഗങ്ങൾ, സാമ്പത്തിക ഇടപാടുകൾ, സ്ഥാപിതമായ ക്രിമിനൽ ശൃംഖലകൾ എന്നിവ ഉപയോഗിച്ചാണ് ഈ സംഘങ്ങൾ പ്രവർത്തിക്കുന്നത്.

ഫിലിപ്പീൻസിലേക്ക് കടത്തുകയായിരുന്നുവെന്ന് സംശയിക്കുന്ന 55 ദശലക്ഷം ഡോളർ വിലമതിക്കുന്ന മെത്താംഫെറ്റാമൈൻ ലാവോസിൽ നിന്ന് പിടികൂടിയതോടെയാണ് വിഷയം വീണ്ടും അന്താരാഷ്ട്ര ശ്രദ്ധ നേടിയത്. ലുവാങ് പ്രബാങ് അന്താരാഷ്ട്ര വിമാനത്താവളത്തിൽ സ്വകാര്യ ജെറ്റിൽ നടത്തിയ പരിശോധനയിൽ 521 കിലോഗ്രാം മെത്താംഫെറ്റാമൈനാണ് പോലീസ് പിടിച്ചെടുത്തത്. സംഭവത്തിൽ ഫിലിപ്പീൻസിനുള്ള ബന്ധം അന്വേഷിച്ച് രാജ്യത്ത് പാർലമെന്ററി അന്വേഷണവും ആരംഭിച്ചിട്ടുണ്ട്.

ഫിലിപ്പീൻസിൽ കുറഞ്ഞത് അഞ്ച് രാജ്യാന്തര മയക്കുമരുന്ന് ശൃംഖലകളെങ്കിലും പ്രവർത്തിക്കുന്നുണ്ടെന്നാണ് അപകടകരമായ മയക്കുമരുന്നുകളെക്കുറിച്ചുള്ള ഹൗസ് കമ്മിറ്റി ചെയർമാൻ മാർക്ക് ആന്റണി സാന്റോസ് വെളിപ്പെടുത്തിയത്. മുതിർന്ന പോലീസ് ഉദ്യോഗസ്ഥനിൽ നിന്ന് ലഭിച്ച വിവരങ്ങളുടെ അടിസ്ഥാനത്തിലായിരുന്നു അദ്ദേഹത്തിന്റെ പ്രസ്താവന.

ചൈനീസ്, ചൈനീസ്-ഫിലിപ്പിനോ കടത്ത് സംഘങ്ങൾക്കൊപ്പം മെക്സിക്കൻ, പശ്ചിമാഫ്രിക്കൻ മയക്കുമരുന്ന് കാർട്ടലുകളും രാജ്യത്തെ കരിഞ്ചന്തയിൽ സജീവമാണെന്നാണ് സാന്റോസിന്റെ ആരോപണം. മെക്സിക്കോയിലെ കുപ്രസിദ്ധമായ സിനലോവ കാർട്ടലും ഇതിൽ ഉൾപ്പെടുന്നു.

മയക്കുമരുന്ന് സംഘങ്ങളുടെ പ്രവർത്തനം തെരുവുകളിലെ വിൽപ്പനയിൽ മാത്രം ഒതുങ്ങുന്നതല്ലെന്ന് സാന്റോസ് ചൂണ്ടിക്കാട്ടി. സ്വകാര്യ വിമാനങ്ങൾ, സമുദ്രപാതകൾ, സാമ്പത്തിക ഇടനിലക്കാർ, രാജ്യങ്ങൾ തമ്മിലുള്ള നിയമനിർവഹണത്തിലെ ഏകോപനക്കുറവ് എന്നിവയാണ് ഇത്തരം സംഘങ്ങൾ പ്രയോജനപ്പെടുത്തുന്നത്. ഒരു മയക്കുമരുന്ന് കയറ്റുമതി പിടികൂടിയാലും അതിന് പണം കണ്ടെത്തുകയും പ്രവർത്തനങ്ങൾ നിയന്ത്രിക്കുകയും ചെയ്യുന്ന പ്രധാനികൾ അന്വേഷണ പരിധിക്ക് പുറത്തായിരിക്കാമെന്നും അദ്ദേഹം മുന്നറിയിപ്പ് നൽകി.

മയക്കുമരുന്ന് പിടിച്ചെടുക്കുന്നതിൽ മാത്രം നടപടികൾ ഒതുക്കാതെ സാമ്പത്തിക ഇടപാടുകൾ അന്വേഷിക്കുകയും വിദേശ അന്വേഷണ ഏജൻസികളുമായി സഹകരിച്ച് മാഫിയകളുടെ സാമ്പത്തിക അടിത്തറ തകർക്കുകയും വേണമെന്നാണ് അദ്ദേഹത്തിന്റെ ആവശ്യം.

സാം ഗോർ; പിടിമുറുക്കി ചൈനീസ് ക്രിമിനൽ സഖ്യം

തെക്കുകിഴക്കൻ ഏഷ്യയിലെ മെത്താംഫെറ്റാമൈൻ വ്യാപാരവുമായി ബന്ധപ്പെട്ട പ്രധാന ക്രിമിനൽ ശൃംഖലകളിലൊന്നാണ് സാം ഗോർ. ചൈനീസ് ക്രിമിനൽ സംഘടനകളുടെ കൂട്ടായ്മയായ ഈ ശൃംഖല പ്രാദേശിക മയക്കുമരുന്ന് വിപണിയുടെ 40 മുതൽ 70 ശതമാനം വരെ നിയന്ത്രിക്കുന്നതായാണ് കണക്കാക്കപ്പെടുന്നത്.

ഫിലിപ്പൈൻ ഡ്രഗ് എൻഫോഴ്‌സ്‌മെന്റ് ഏജൻസി ഡയറക്ടർ ജനറൽ ഇസഗാനി നെറെസിന്റെ വിശദീകരണമനുസരിച്ച് അഞ്ച് പ്രധാന ചൈനീസ് ട്രയാഡ് സംഘടനകളുടെ കൂട്ടായ്മയാണ് സാം ഗോർ. 14 കെ ട്രയാഡ്, ബാംബൂ യൂണിയൻ, ബിഗ് സർക്കിൾ ഗാംഗ്, സൺ യീ ഓൺ, വോ ഷിംഗ് വോ എന്നിവയാണ് ഈ സംഘടനകൾ. ഇവയുടെ നേതാക്കൾ ഹോങ്കോങ്ങിലും തായ്‌വാനിലുമാണ് പ്രവർത്തിക്കുന്നതെന്നാണ് കരുതപ്പെടുന്നത്.

വിയറ്റ്നാം, കംബോഡിയ, ലാവോസ്, മ്യാൻമർ, തായ്‌ലൻഡ് തുടങ്ങിയ രാജ്യങ്ങൾക്കു പുറമെ ന്യൂസിലാൻഡ്, ഓസ്‌ട്രേലിയ, ദക്ഷിണ കൊറിയ, ജപ്പാൻ, ചൈന, തായ്‌വാൻ എന്നിവിടങ്ങളിലും സാം ഗോറിന് സാന്നിധ്യമുള്ളതായി റിപ്പോർട്ടുകളുണ്ട്.

പതിറ്റാണ്ടുകൾ പഴക്കമുള്ള മയക്കുമരുന്ന് ശൃംഖല

ലാവോസിലെ മയക്കുമരുന്ന് വേട്ടയും ഫിലിപ്പീൻസിലെ രാജ്യാന്തര മാഫിയ സാന്നിധ്യവും പുതിയ പ്രതിഭാസമല്ലെന്നാണ് മുൻ ഉദ്യോഗസ്ഥരുടെ വിലയിരുത്തൽ. വർഷങ്ങളായി നിലനിൽക്കുന്ന വിതരണ ബന്ധങ്ങളുടെ തുടർച്ച മാത്രമാണ് ഇപ്പോൾ പുറത്തുവരുന്നതെന്ന് ഒരു മുൻ ഫിലിപ്പൈൻ മയക്കുമരുന്ന് ഉദ്യോഗസ്ഥൻ പറഞ്ഞു.

മെത്താംഫെറ്റാമൈൻ വ്യാപാരത്തിൽ പ്രാദേശിക വിതരണക്കാർ ചൈനീസ്, ഫിലിപ്പിനോ-ചൈനീസ് ക്രിമിനൽ സംഘങ്ങളെ ആശ്രയിച്ചാണ് പ്രവർത്തിച്ചിരുന്നതെന്നും അദ്ദേഹം വ്യക്തമാക്കി.

വിശാലമായ തീരപ്രദേശവും ആയിരക്കണക്കിന് ദ്വീപുകളും ആഭ്യന്തര വിപണിയിലെ ഉയർന്ന ആവശ്യകതയും ഫിലിപ്പീൻസിനെ മയക്കുമരുന്ന് കടത്ത് സംഘങ്ങൾക്ക് ആകർഷകമാക്കുന്ന ഘടകങ്ങളാണ്.

നന്യാങ് ടെക്നോളജിക്കൽ യൂണിവേഴ്സിറ്റിയിലെ എസ്. രാജരത്നം സ്കൂൾ ഓഫ് ഇന്റർനാഷണൽ സ്റ്റഡീസിലെ സുരക്ഷാ പഠന വിഭാഗം പ്രൊഫസർ ഡോ. രോഹൻ ഗുണരത്നയുടെ അഭിപ്രായത്തിൽ, കഴിഞ്ഞ 10 മുതൽ 20 വർഷമായി ഫിലിപ്പീൻസിൽ രാജ്യാന്തര സംഘടിത കുറ്റകൃത്യ സംഘങ്ങളുടെ സാന്നിധ്യം നിരീക്ഷിക്കപ്പെടുന്നുണ്ട്.

തെക്കുകിഴക്കൻ ഏഷ്യയിലെ മയക്കുമരുന്ന് വ്യാപാരം പരസ്പരം ബന്ധിപ്പിക്കപ്പെട്ടതും സാഹചര്യങ്ങൾക്കനുസരിച്ച് രൂപം മാറുന്നതുമായ വലിയൊരു ശൃംഖലയാണെന്ന് അദ്ദേഹം വിശദീകരിച്ചു. ഉൽപ്പാദനം, രാസവസ്തുക്കളുടെ ലഭ്യത, ഗതാഗതം, മൊത്തവിതരണം, ഉപഭോഗം തുടങ്ങി വിവിധ ഘട്ടങ്ങളിൽ വിവിധ രാജ്യങ്ങൾ പങ്കാളികളാകുന്ന രീതിയിലാണ് ഈ ശൃംഖല പ്രവർത്തിക്കുന്നത്.

ചൈനീസ് ക്രിമിനൽ സംഘടനകളുടെ സ്വാധീനം മയക്കുമരുന്ന് കടത്തിൽ മാത്രം ഒതുങ്ങുന്നില്ല. ഉൽപ്പാദന കേന്ദ്രങ്ങളെയും മൊത്തവിതരണക്കാരെയും ലക്ഷ്യവിപണികളിലെ പ്രാദേശിക ക്രിമിനൽ സംഘങ്ങളെയും തമ്മിൽ ബന്ധിപ്പിക്കുന്ന സാമ്പത്തിക-വാണിജ്യ ബന്ധങ്ങളും ഇവർക്കുണ്ടെന്ന് ഗുണരത്ന ചൂണ്ടിക്കാട്ടി.

തായ്‌ലൻഡ്, ഫിലിപ്പീൻസ്, ഇന്തോനേഷ്യ, മലേഷ്യ, വിയറ്റ്നാം എന്നിവയാണ് മേഖലയിലെ പ്രധാന മയക്കുമരുന്ന് വിപണികൾ. ഓസ്‌ട്രേലിയ ഉൾപ്പെടെയുള്ള ഏഷ്യ-പസഫിക് രാജ്യങ്ങളും കടത്തിന്റെ പ്രധാന ലക്ഷ്യസ്ഥാനങ്ങളായി തുടരുന്നു.

1990-കളിൽ തുടങ്ങിയ മെത്ത് വ്യാപാരം

ഫിലിപ്പീൻസിലെ മെത്താംഫെറ്റാമൈൻ വ്യാപാരം ശക്തിപ്പെടുത്തുന്നതിൽ ചൈനീസ് അന്തർദേശീയ ക്രിമിനൽ സംഘടനകൾക്ക് നിർണായക പങ്കുണ്ടായിരുന്നുവെന്നാണ് വിലയിരുത്തൽ. 1990-കളിൽ തന്നെ രാജ്യത്ത് മെത്ത് വ്യാപാരം സ്ഥാപിക്കുന്നതിൽ ഈ സംഘങ്ങൾ സജീവമായിരുന്നു.

കാലക്രമേണ മെത്താംഫെറ്റാമൈൻ രാജ്യത്തെ പ്രധാന നിയമവിരുദ്ധ മയക്കുമരുന്നായി മാറി. ഉയർന്ന തലത്തിൽ പ്രവർത്തിക്കുന്ന രാജ്യാന്തര സംഘങ്ങൾ മയക്കുമരുന്ന് ശേഖരിക്കുകയും കടത്തുകയും ചെയ്യുമ്പോൾ പ്രാദേശിക ചൈനീസ്, ഫിലിപ്പിനോ-ചൈനീസ് ക്രിമിനൽ സംഘങ്ങളാണ് ആഭ്യന്തര മൊത്ത-ചില്ലറ വിതരണ ശൃംഖലകൾ കൈകാര്യം ചെയ്തിരുന്നതെന്ന് ഗുണരത്ന വ്യക്തമാക്കി.

ഈ സംഘങ്ങളെല്ലാം ഒരൊറ്റ സംഘടനയുടെ ഭാഗമായല്ല പ്രവർത്തിക്കുന്നത്. പരസ്പര ബന്ധങ്ങളും വിതരണ കരാറുകളും അടിസ്ഥാനമാക്കിയുള്ള കൂട്ടായ പ്രവർത്തനമാണ് ഇവരുടെ പ്രത്യേകത.

അനുകൂല ഭൂമിശാസ്ത്രവും ഭരണവീഴ്ചകളും

ഫിലിപ്പീൻസിന്റെ വിശാലമായ തീരപ്രദേശങ്ങൾ മാത്രമല്ല, ദുർബലമായ ഭരണസംവിധാനവും നിയമപാലന മേഖലയിലെ അഴിമതിയും സംഘടിത കുറ്റകൃത്യ സംഘങ്ങൾക്ക് അനുകൂല സാഹചര്യം സൃഷ്ടിക്കുന്നതായി ഗുണരത്ന വിലയിരുത്തുന്നു.

പ്രത്യേകിച്ച് സാംബോവങ്ക, ബസിലാൻ, സുലു, താവി-താവി എന്നിവ ഉൾപ്പെടുന്ന തെക്കൻ സമുദ്രമേഖല ആശങ്കാജനകമാണ്. മലേഷ്യയുമായും ഇന്തോനേഷ്യയുമായും ബന്ധപ്പെടുന്ന ഈ പ്രദേശങ്ങളിൽ അനൗദ്യോഗിക സമുദ്രപാതകളും പരിമിതമായ നിരീക്ഷണ സംവിധാനങ്ങളും കടത്തുസംഘങ്ങൾക്ക് അവസരമൊരുക്കുന്നു.

ഫിലിപ്പീൻസ് പ്രധാനമായും മയക്കുമരുന്നിന്റെ ലക്ഷ്യസ്ഥാനവും വിതരണ വിപണിയുമാണെങ്കിലും ചില ഘട്ടങ്ങളിൽ ഓസ്‌ട്രേലിയ പോലുള്ള രാജ്യങ്ങളിലേക്കുള്ള കടത്തിന് ഇടത്താവളമായും പ്രവർത്തിക്കുന്നുണ്ടെന്ന് അദ്ദേഹം പറഞ്ഞു.

ഡുട്ടെർട്ടെയുടെ മയക്കുമരുന്ന് യുദ്ധം ലക്ഷ്യം കണ്ടോ?

2016 മുതൽ 2022 വരെ മുൻ പ്രസിഡന്റ് റോഡ്രിഗോ ഡുട്ടെർട്ടെയുടെ നേതൃത്വത്തിൽ ഫിലിപ്പീൻസിൽ മയക്കുമരുന്നിനെതിരായ കടുത്ത നടപടി നടപ്പാക്കിയിരുന്നു. ആയിരക്കണക്കിന് ആളുകളുടെ മരണത്തിനിടയാക്കിയ ഈ വിവാദ നടപടികൾ പ്രധാനമായും തെരുവുതല വിതരണക്കാരെയും ചെറുകിട മയക്കുമരുന്ന് വിൽപ്പനക്കാരെയുമാണ് ലക്ഷ്യമിട്ടത്.

എന്നാൽ ഇത്തരം നടപടികൾക്ക് രാജ്യാന്തര തലത്തിൽ പ്രവർത്തിക്കുന്ന വൻകിട വിതരണ ശൃംഖലകളെ തകർക്കാൻ കഴിഞ്ഞില്ലെന്നാണ് മുൻ മയക്കുമരുന്ന് ഉദ്യോഗസ്ഥന്റെ വിലയിരുത്തൽ.

മയക്കുമരുന്ന് വ്യാപാരത്തിന്റെ അടിസ്ഥാന ഘടകങ്ങളായ ആവശ്യകത, ഉപഭോഗം, വിതരണം എന്നിവ ഇപ്പോഴും ഫിലിപ്പീൻസും അയൽരാജ്യങ്ങളും നേരിടുന്ന വലിയ വെല്ലുവിളികളാണെന്ന് യുഎൻ മയക്കുമരുന്ന്-കുറ്റകൃത്യ കാര്യാലയത്തിലെ ഓപ്പറേഷൻസ് ഡെപ്യൂട്ടി ഡയറക്ടർ ജെറമി ഡഗ്ലസ് ചൂണ്ടിക്കാട്ടി.

ചെറുകിട വിൽപ്പനക്കാരെ പിടികൂടുന്നതിലൂടെ മാത്രം മയക്കുമരുന്ന് മാഫിയകളെ ഇല്ലാതാക്കാനാകില്ലെന്നും സാമ്പത്തിക ഇടപാടുകൾ മുതൽ രാജ്യാന്തര വിതരണ ശൃംഖലകൾ വരെ ലക്ഷ്യമിട്ടുള്ള ഏകോപിത നടപടികളാണ് ആവശ്യമെന്നും ഈ സംഭവങ്ങൾ വീണ്ടും വ്യക്തമാക്കുന്നു.