വാഷിംഗ്ടൺ/ ടെഹ്‌റാൻ: യുഎസ് മിഡ്‌ടേം തിരഞ്ഞെടുപ്പ് ഫലം പുറത്തുവന്ന് മണിക്കൂറുകൾക്കകം വൈസ് പ്രസിഡന്റ് ജെ.ഡി. വാൻസ് നടത്തിയ പ്രസ്താവന അമേരിക്കൻ രാഷ്ട്രീയത്തിൽ വലിയ ചർച്ചയാകുന്നു. “നമ്മൾ തോറ്റതിന് കാരണം ഇറാൻ യുദ്ധമാണ്” എന്ന വാൻസിന്റെ പരസ്യമായ പ്രസ്താവന പ്രസിഡന്റ് ഡൊണാൾഡ് ട്രംപുമായുള്ള അദ്ദേഹത്തിന്റെ അകൽച്ചയായാണ് പാശ്ചാത്യ മാധ്യമങ്ങൾ വ്യാഖ്യാനിച്ചത്.
എന്നാൽ, ട്രംപിന്റെ അറിവോടെയാണ് ഈ പ്രസ്താവന പുറത്തുവന്നതെന്നതാണ് യാഥാർത്ഥ്യം. അമേരിക്കൻ വിദേശ ഇടപെടലുകളുടെ ദീർഘകാല വിമർശകനാണ് വാൻസ്. ഇറാനെതിരായ യുദ്ധ നീക്കങ്ങളോട് ആദ്യമേതന്നെ അദ്ദേഹത്തിന് വിയോജിപ്പുണ്ടായിരുന്നു. ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ സമ്മർദ്ദത്തിന് വഴങ്ങി ട്രംപ് യുദ്ധത്തിലേക്ക് നീങ്ങിയതിനെ തുടക്കം മുതലേ വാൻസ് അസ്വസ്ഥതയോടെയാണ് വീക്ഷിച്ചിരുന്നത്.
ട്രംപിന്റെ നിലപാടും അന്താരാഷ്ട്ര മാറ്റങ്ങളും
ഇറാനുമായി ഒരു സമ്പൂർണ്ണ യുദ്ധം ഉണ്ടാകുന്നത് അമേരിക്കയ്ക്കും ട്രംപിന്റെ ഭരണകൂടത്തിനും ദോഷം ചെയ്യുമെന്ന തിരിച്ചറിവാണ് ഇപ്പോൾ നയതന്ത്ര ചർച്ചകൾക്ക് വഴിതുറക്കുന്നത്. ഇറാനിൽ തങ്ങൾ നിയന്ത്രിക്കാൻ ആഗ്രഹിച്ചതെല്ലാം ഇതിനകം നിയന്ത്രിച്ചുകഴിഞ്ഞുവെന്നും, രാജ്യം വീണ്ടും നശിപ്പിക്കാൻ ആഗ്രഹിക്കുന്നില്ലെന്നും ട്രംപ് അടുത്തിടെ വ്യക്തമാക്കിയിരുന്നു. അധികാരത്തിൽ പിടിച്ചുനിൽക്കാൻ നെതന്യാഹു തന്നെ ഉപയോഗിക്കുകയാണെന്ന് ട്രംപ് തിരിച്ചറിയുന്നുണ്ടെന്നതിന്റെ സൂചനയാണിത്.
അതിനിടെ, ഇറാനുമായി നേരിട്ടുള്ള സമാധാന ചർച്ചകൾക്ക് തയ്യാറാകാൻ ആവശ്യപ്പെട്ട് ട്രംപിന്റെ നിർദ്ദേശപ്രകാരം വാൻസ്, ഇറാന്റെ സുപ്രീം നാഷണൽ സെക്യൂരിറ്റി കൗൺസിൽ തലവൻ മൊഹ്‌സെൻ റെസായിക്ക് കത്ത അയച്ചിരുന്നു. അമേരിക്കയുടെ സമീപനത്തിൽ മാറ്റമുണ്ടായിട്ടുണ്ടെന്ന് ഈ കത്ത് തെളിയിക്കുന്നതായി റെസായി പ്രതികരിക്കുകയും ചെയ്തു.
റഷ്യയുടെയും ചൈനയുടെയും ഇടപെടലുകൾ
- റഷ്യയുടെ മുന്നറിയിപ്പ്: ഇറാനിൽ വീണ്ടും യുദ്ധം അടിച്ചേൽപ്പിച്ചാൽ സ്ഥിതിഗതികൾ ഗുരുതരമാകുമെന്ന് റഷ്യ അമേരിക്കയ്ക്ക് ശക്തമായ മുന്നറിയിപ്പ് നൽകിയിട്ടുണ്ട്. ഇതിന്റെ ഭാഗമായി, രഹസ്യ സന്ദർശനത്തിനായി മോസ്കോയിലെത്തിയ ഇറാനിയൻ സുരക്ഷാ കൗൺസിൽ മേധാവി മൊഹ്‌സെൻ റെസായിയെ റഷ്യൻ പ്രസിഡന്റ് വ്‌ളാഡിമിർ പുടിൻ നേരിട്ട് സ്വീകരിച്ചു.
- ചൈനയുടെ വിലയിരുത്തൽ: സംഘർഷം ആർക്കും ഗുണം ചെയ്യില്ലെന്നും, നയതന്ത്ര ചർച്ചകളിലൂടെ പ്രശ്നം പരിഹരിക്കണമെന്നും ടെഹ്‌റാൻ നിലപാട് എടുത്തതായി ചൈനീസ് മാധ്യമങ്ങളും റിപ്പോർട്ട് ചെയ്യുന്നു.
ഖത്തറിന്റെ മാധ്യസ്ഥശ്രമങ്ങളുടെ ഫലമായി ഇറാൻ തങ്ങളുടെ ആണവ പദ്ധതിയുമായി ബന്ധപ്പെട്ട പുതിയ നിർദ്ദേശങ്ങൾ പുനഃപരിശോധിക്കാൻ തയ്യാറായിട്ടുണ്ട്. ഇത് അമേരിക്കയുമായുള്ള യുദ്ധം ഒഴിവാക്കുന്നതിൽ നിർണ്ണായക വഴിതിരിവാകുമെന്നാണ് വിലയിരുത്തപ്പെടുന്നത്. ചൈനയിലെ ഷെൻ‌ഷെനിൽ നടക്കാനിരിക്കുന്ന യുഎസ്- റഷ്യ- ചൈന ഉച്ചകോടിയിൽ പുതിയ ലോക ക്രമത്തെക്കുറിച്ചും പശ്ചിമേഷ്യൻ നയങ്ങളെക്കുറിച്ചും ട്രംപ് എന്ത് നിലപാട് സ്വീകരിക്കുമെന്നാണ് ലോകം ഉറ്റുനോക്കുന്നത്.
