വാഷിംഗ്ടൺ ഡിസി: യുഎസ് തലസ്ഥാനമായ വാഷിംഗ്ടൺ ഡിസിയിൽ പ്രസിഡന്റ് ഡൊണാൾഡ് ട്രംപിനെ വധിക്കാൻ പദ്ധതിയിട്ട വെനിസ്വേലൻ പൗരൻ അറസ്റ്റിൽ. വൈറ്റ് ഹൗസിന് സമീപം സംശയാസ്പദമായ സാഹചര്യത്തിൽ കണ്ടെത്തിയ കാറിൽ നിന്നാണ് ഇയാളെ സീക്രട്ട് സർവീസ് ഉദ്യോഗസ്ഥർ പിടികൂടിയത്. വ്യാഴാഴ്ച രാത്രിയായിരുന്നു നാടകീയ സംഭവങ്ങൾ അരങ്ങേറിയത്.
വാഹനത്തിൽ നടത്തിയ പരിശോധനയിൽ മൂന്ന് മാരകമായ തോക്കുകളും ഡസൻ കണക്കിന് വെടിയുണ്ടകളും കണ്ടെടുത്തു. ഇയാൾ സഞ്ചരിച്ചിരുന്ന കാർ മോഷ്ടിക്കപ്പെട്ടതാണെന്നും അന്വേഷണത്തിൽ വ്യക്തമായിട്ടുണ്ട്.
ഞെട്ടിക്കുന്ന വെളിപ്പെടുത്തലുകൾ
യുഎസ് ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റി (ഡിഎച്ച്എസ്) നൽകുന്ന വിവരമനുസരിച്ച്, വ്യാഴാഴ്ച രാത്രി വൈറ്റ് ഹൗസിന് ചുറ്റും പട്രോളിംഗ് നടത്തുകയായിരുന്ന സീക്രട്ട് സർവീസ് ഉദ്യോഗസ്ഥരാണ് കാറിൽ ഇരുന്നയാളെ സംശയാസ്പദമായ സാഹചര്യത്തിൽ കണ്ടെത്തിയത്. ചോദ്യം ചെയ്യലിൽ റോണി യോർഡ്രിക്സ് ഗുവാനിപ ക്രിനോസ് എന്ന വെനിസ്വേലൻ പൗരനാണ് ഇതെന്ന് തിരിച്ചറിഞ്ഞു.
തന്റെ തലയിൽ തുടർച്ചയായി ശബ്ദങ്ങൾ കേൾക്കുന്നുണ്ടെന്നും, വാഷിംഗ്ടണിലേക്ക് പോയി പ്രസിഡന്റ് ഡൊണാൾഡ് ട്രംപിനെ വധിക്കാൻ ആ ശബ്ദങ്ങൾ പ്രത്യേകമായി നിർദ്ദേശിച്ചിരുന്നു എന്നുമാണ് പ്രതി ഉദ്യോഗസ്ഥരോട് പറഞ്ഞത്. ഈ വിചിത്രവും ആശങ്കാജനകമായ വെളിപ്പെടുത്തൽ സുരക്ഷാ സേനയെ അമ്പരപ്പിച്ചു. തുടർന്ന് നടത്തിയ വിശദമായ പരിശോധനയിലാണ് കാറിൽ നിന്ന് ആയുധശേഖരം കണ്ടെത്തിയത്.
അനധികൃത കുടിയേറ്റക്കാരൻ
അറസ്റ്റിലായ റോണി യോർഡ്രിക്സ് ഗുവാനിപ ക്രിനോസ് അമേരിക്കയിൽ അനധികൃതമായി താമസിക്കുകയായിരുന്നുവെന്ന് ഡിഎച്ച്എസ് സ്ഥിരീകരിച്ചു. 2024 മാർച്ചിൽ ടെക്സസ് വഴി യാതൊരുവിധ സാധുവായ രേഖകളുമില്ലാതെയാണ് ഇയാൾ രാജ്യത്തേക്ക് കടന്നത്. നിയമവിരുദ്ധ കുടിയേറ്റത്തിനും പ്രസിഡന്റിനെ വധിക്കാൻ ശ്രമിച്ചതിനും ഇയാൾക്കെതിരെ ഔദ്യോഗികമായി കേസെടുത്തിട്ടുണ്ട്. നിലവിൽ യുഎസ് മാർഷൽസ് സർവീസിന്റെ കസ്റ്റഡിയിലാണ് പ്രതി. സംഭവത്തിൽ വൈറ്റ് ഹൗസ് ഔദ്യോഗികമായി പ്രതികരിച്ചിട്ടില്ല.
ഡൊണാൾഡ് ട്രംപ് വീണ്ടും അധികാരമേറ്റതിനുശേഷം അദ്ദേഹത്തിനും കുടുംബത്തിനും നേരെ ഉണ്ടാകുന്ന സുരക്ഷാ ഭീഷണികളുടെ പരമ്പരയിലെ ഒടുവിലത്തെ സംഭവമാണിത്. വൈറ്റ് ഹൗസിന് തൊട്ടടുത്ത് ആയുധങ്ങളുമായി ഒരു വിദേശി എത്തിയത് യുഎസിലെ സുരക്ഷാ ക്രമീകരണങ്ങളെക്കുറിച്ചുള്ള ഗൗരവമായ ചോദ്യങ്ങളാണ് വീണ്ടും ഉയർത്തുന്നത്.
