സിയാറ്റിൽ: ലോകമെമ്പാടും ദീപാവലി ആഘോഷങ്ങളുടെ ആവേശം അലയടിക്കുന്നതിനിടയില്‍, അമേരിക്കയില്‍ നിന്നും ഞെട്ടിക്കുന്ന വാര്‍ത്ത. വാഷിംഗ്ടണിലെ സിയാറ്റിലില്‍ നടന്ന ദീപാവലി ആഘോഷങ്ങള്‍ അട്ടിമറിക്കാന്‍ അമേരിക്കന്‍ തീവ്രവലതുപക്ഷ ആക്ടിവിസ്റ്റ് ജെയ്ക്ക് ലാങും കൂട്ടാളികളും നടത്തിയ ശ്രമം വലിയ വിവാദത്തിന് തിരികൊളുത്തി. ഹിന്ദു സമൂഹത്തിനെതിരെ പരസ്യമായി വംശീയ അധിക്ഷേപവും ഭീഷണിയുമായാണ് ഇയാള്‍ രംഗത്തെത്തിയത്.
വിവാദ ബാനറുകളുമായി പ്രതിഷേധം
റിപ്പോര്‍ട്ടുകള്‍ പ്രകാരം, ശനിയാഴ്ച സിയാറ്റിലില്‍ നടന്ന ദീപാവലി ആഘോഷ വേദിയിലേക്ക് അതിക്രമിച്ചുകയറാന്‍ ജെയ്ക്ക് ലാങ് ശ്രമിച്ചു. “എല്ലാ ഇന്ത്യക്കാരെയും രാജ്യത്ത് നിന്ന് നാടുകടത്തുക” എന്ന അര്‍ത്ഥം വരുന്ന “എല്ലാ ഡോട്ട് ഹെഡ്‌സിനെയും നാടുകടത്തുക” (Deport all dotheads) എന്നെഴുതിയ വിദ്വേഷ ബാനറുകളുമായാണ് സംഘം എത്തിയത്. എന്നാല്‍, ആഘോഷത്തില്‍ പങ്കെടുക്കാനെത്തിയവരുടെ സമയോചിതമായ ഇടപെടല്‍ വലിയൊരു സംഘര്‍ഷം ഒഴിവാക്കി. തുടര്‍ന്ന് ഇവര്‍ക്ക് തടസ്സങ്ങള്‍ നേരിടേണ്ടിവന്നു.
ഹിന്ദുക്കള്‍ക്കെതിരെ അധിക്ഷേപം
ആക്രമണശ്രമത്തിന് ശേഷം ജെയ്ക്ക് ലാങ് തന്നെ സംഭവത്തിന്റെ ചിത്രങ്ങളും വിദ്വേഷ പരാമര്‍ശങ്ങളും സോഷ്യല്‍ മീഡിയയില്‍ പങ്കുവെച്ചു. യുഎസിലെ ഇടക്കാല തിരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടിക്കുണ്ടായ തിരിച്ചടിക്ക് കാരണം ഹിന്ദുക്കളാണെന്ന അസംബന്ധമായ ആരോപണമാണ് ഇയാള്‍ ഉന്നയിച്ചത്. ടെക്‌സസിനെ ‘നീലയാക്കിയത്’ (ഡെമോക്രാറ്റുകളെ വിജയിപ്പിച്ചത്) ഹിന്ദുക്കളാണെന്നും അവര്‍ നരകത്തിലേക്ക് പോകണമെന്നും ഇയാള്‍ സമൂഹമാധ്യമങ്ങളില്‍ കുറിച്ചു.
തിരഞ്ഞെടുപ്പ് ഫലങ്ങള്‍ കൃത്രിമമാണെന്ന് അവകാശപ്പെട്ട ലാങ്, 2027 ജനുവരി 3-ന് വാഷിംഗ്ടണ്‍ ഡിസിയിലെ യുഎസ് കാപ്പിറ്റോളിലേക്ക് ‘ക്രിസ്ത്യന്‍ ക്രൂസേഡര്‍മാര്‍’ മാര്‍ച്ച് നടത്തുമെന്നും പ്രഖ്യാപിച്ചിട്ടുണ്ട്. ടെക്‌സസില്‍ ഡെമോക്രാറ്റുകള്‍ നേടിയ ചരിത്രപരമായ വിജയത്തിന്റെ പശ്ചാത്തലത്തിലാണ് ഈ തീവ്രവലതുപക്ഷ രോഷം.
കുറ്റകൃത്യങ്ങളുടെ പശ്ചാത്തലമുള്ള ആക്ടിവിസ്റ്റ്
വൈറ്റ് റീപ്ലേസ്‌മെന്റ് എന്ന സംഘടനയുടെ പ്രവര്‍ത്തകനായ ജെയ്ക്ക് ലാങ്ങിന് ക്രിമിനല്‍ പശ്ചാത്തലമുണ്ട്. 2021 ജനുവരി 6-ന് യുഎസ് കാപ്പിറ്റലില്‍ നടന്ന രക്തരൂക്ഷിതമായ ആക്രമണത്തില്‍ സജീവമായി പങ്കെടുത്ത ഇയാള്‍ നാല് വര്‍ഷത്തെ ജയില്‍ ശിക്ഷ അനുഭവിച്ചിട്ടുള്ളയാളാണ്. എന്നാല്‍, 2025-ല്‍ തന്റെ രണ്ടാം കാലാവധിയുടെ ആദ്യ ദിവസം തന്നെ യുഎസ് പ്രസിഡന്റ് ഡൊണാള്‍ഡ് ട്രംപ് ഇയാള്‍ക്ക് ഔദ്യോഗികമായി മാപ്പ് നല്‍കിയിരുന്നു. ഈ അനുകൂല സാഹചര്യം ഇയാളെ കൂടുതല്‍ അഹങ്കാരിയാക്കിയെന്നാണ് വിമര്‍ശകര്‍ ചൂണ്ടിക്കാണിക്കുന്നത്.
അമേരിക്കയില്‍ ന്യൂനപക്ഷങ്ങള്‍ക്കും ഹിന്ദു സമൂഹത്തിനുമെതിരെ വര്‍ദ്ധിച്ചുവരുന്ന വംശീയ ആക്രമണങ്ങളുടെയും ഭീഷണികളുടെയും ഒടുവിലത്തെ ഉദാഹരണമാണിത്. അടുത്തിടെ ഷിക്കാഗോയ്ക്ക് സമീപമുള്ള ഒരു ഹിന്ദു ക്ഷേത്രത്തില്‍ കൂട്ടവെടിവെപ്പ് നടത്താന്‍ പദ്ധതിയിട്ട 19 കാരനായ അലക്‌സാണ്ട്രോസ് പപ്പൗരാക്കിസ് എന്ന നാസി പ്രത്യയശാസ്ത്ര അനുകൂലിയെ യുഎസ് അന്വേഷണ ഏജന്‍സികള്‍ അറസ്റ്റ് ചെയ്തിരുന്നു. അമേരിക്കയില്‍ വര്‍ദ്ധിച്ചുവരുന്ന ഈ ഇസ്ലാമോഫോബിയയും ഹിന്ദുവിരുദ്ധ വിദ്വേഷവും പ്രവാസികളില്‍ വലിയ ആശങ്കയാണ് സൃഷ്ടിക്കുന്നത്.
