ടെഹ്‌റാൻ: ഇറാനെതിരായ യുദ്ധം അവസാനിപ്പിക്കുന്നതിനായി ടെഹ്‌റാൻ മുന്നോട്ടുവെച്ച ഏഴ് നിബന്ധനകൾ അംഗീകരിക്കാൻ അമേരിക്ക തയ്യാറാകണമെന്ന് ഇറാന്റെ ഉന്നത സുരക്ഷാ ഉദ്യോഗസ്ഥൻ മൊഹ്‌സെൻ റെസായി. യുദ്ധം അവസാനിപ്പിക്കുന്നതുമായി ബന്ധപ്പെട്ട് അമേരിക്ക സാങ്കൽപ്പിക ചർച്ചകളെക്കുറിച്ചുള്ള വ്യാജവാർത്തകൾ പ്രചരിപ്പിക്കുകയാണെന്നും അദ്ദേഹം ആരോപിച്ചു. ഇറാന്റെ ആവശ്യങ്ങൾ അംഗീകരിക്കാതെ സമാധാന കരാറിലെത്താനാകില്ലെന്ന നിലപാടാണ് റെസായി മുന്നോട്ടുവെച്ചത്.
അതേസമയം, ഇറാനുമായുള്ള യുദ്ധം അവസാനിപ്പിക്കുന്നതിനുള്ള ചർച്ചകളിൽ അനുകൂല പുരോഗതിയുണ്ടെന്നാണ് അമേരിക്കൻ പ്രസിഡന്റ് ഡൊണാൾഡ് ട്രംപിന്റെ പ്രതികരണം. ഖത്തർ പ്രധാനമന്ത്രിയുമായുള്ള ചർച്ചകൾക്ക് പിന്നാലെയാണ് ട്രംപ് ഇക്കാര്യം വ്യക്തമാക്കിയത്. ഇറാനെതിരായ സൈനിക ആക്രമണം വീണ്ടും ആരംഭിക്കാനുള്ള സാധ്യത വളരെ കുറവാണെന്നും സംഘർഷം ഫലത്തിൽ അവസാനിച്ചുവെന്നും അദ്ദേഹം അവകാശപ്പെട്ടു.
ട്രംപുമായി ചർച്ച നടത്തി ഖത്തർ പ്രധാനമന്ത്രി
ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൾറഹ്മാൻ ബിൻ ജാസിം അൽതാനി വാഷിംഗ്ടൺ ഡിസിയിൽ അമേരിക്കൻ വൈസ് പ്രസിഡന്റ് ജെഡി വാൻസുമായി കൂടിക്കാഴ്ച നടത്തി.
ഇറാൻ സംഘർഷത്തിന് പരിഹാരം കാണുന്നതിനും മേഖലയിൽ സമാധാനം പുനഃസ്ഥാപിക്കുന്നതിനുമായി നടന്ന ചർച്ചകളെക്കുറിച്ചാണ് ഇരുവരും സംസാരിച്ചത്. ഒരു കരാറിലെത്തുന്നതിനും പശ്ചിമേഷ്യയിൽ സമാധാനം ഉറപ്പാക്കുന്നതിനും ലക്ഷ്യമിട്ടുള്ള ക്രിയാത്മക ചർച്ചകളാണ് നടന്നതെന്ന് ഖത്തർ പ്രധാനമന്ത്രി അറിയിച്ചു.
യുദ്ധം അവസാനിപ്പിക്കുന്നതിനുള്ള നയതന്ത്ര നീക്കങ്ങളിൽ ഖത്തറിന്റെ ഇടപെടൽ നിർണായകമാകുമെന്ന പ്രതീക്ഷയും ഇതോടെ ശക്തമായിട്ടുണ്ട്.
സൗദിയിൽ ഡ്രോൺ തടഞ്ഞു; റിയാദിലേക്ക് മിസൈൽ
അതിനിടെ, സൗദി അറേബ്യയുടെ കിഴക്കൻ പ്രവിശ്യയിൽ എത്തിയ ഡ്രോൺ പ്രതിരോധ സംവിധാനങ്ങൾ ഉപയോഗിച്ച് തകർത്തതായി സൗദി നേതൃത്വത്തിലുള്ള സഖ്യസേനയുടെ വക്താവ് മേജർ ജനറൽ തുർക്കി അൽ മാലികി അറിയിച്ചു.
ഇതിനുപുറമെ, സൗദി തലസ്ഥാനമായ റിയാദിനെ ലക്ഷ്യമിട്ട് രണ്ട് ഹൂത്തി ബാലിസ്റ്റിക് മിസൈലുകൾ വിക്ഷേപിച്ചതായും അദ്ദേഹം വ്യക്തമാക്കി.
പശ്ചിമേഷ്യയിൽ യുദ്ധം അവസാനിപ്പിക്കുന്നതിനുള്ള നയതന്ത്ര നീക്കങ്ങൾ പുരോഗമിക്കുമ്പോഴും മേഖലയിലെ സുരക്ഷാ സാഹചര്യം ആശങ്കാജനകമായി തുടരുകയാണ്. അമേരിക്കയുടെ സമാധാന പ്രഖ്യാപനങ്ങളും ഇറാന്റെ കടുത്ത നിലപാടും തമ്മിലുള്ള അന്തരം വരും ദിവസങ്ങളിലെ ചർച്ചകളിൽ നിർണായകമാകും.
