...
Home News International ‘ക്രിമിയൻ പാലം ആക്രമിച്ചതിന് പിന്നാലെ റഷ്യയുടെ വൻ തിരിച്ചടി’; ഉക്രെയ്നിൽ 400ലധികം ഡ്രോണുകളും 110 മിസൈലുകളും...

‘ക്രിമിയൻ പാലം ആക്രമിച്ചതിന് പിന്നാലെ റഷ്യയുടെ വൻ തിരിച്ചടി’; ഉക്രെയ്നിൽ 400ലധികം ഡ്രോണുകളും 110 മിസൈലുകളും വർഷിച്ചു

ക്രിമിയൻ പാലത്തിന് നേരെയുണ്ടായ ആക്രമണവും റഷ്യയുടെ തിരിച്ചടിയും യുദ്ധം കൂടുതൽ രൂക്ഷമാകാനുള്ള സാധ്യതയാണ് ഉയർത്തുന്നത്

385

മോസ്കോ: ക്രിമിയൻ പാലത്തിന് നേരെയുണ്ടായ ആക്രമണത്തിന് പിന്നാലെ ഉക്രെയ്നെതിരെ ശക്തമായ തിരിച്ചടി നൽകി റഷ്യ. ഉക്രെയ്നിലെ വിവിധ നഗരങ്ങൾ ലക്ഷ്യമിട്ട് 400ലധികം ഡ്രോണുകളും 110 മിസൈലുകളുമാണ് റഷ്യ വിക്ഷേപിച്ചത്. ആക്രമണത്തിൽ എട്ട് സാധാരണക്കാർ കൊല്ലപ്പെടുകയും 20ലധികം പേർക്ക് പരിക്കേൽക്കുകയും ചെയ്തതായാണ് റിപ്പോർട്ടുകൾ. വ്യാപകമായ വ്യോമാക്രമണം ഉക്രെയ്നിലെ ജനജീവിതത്തെയും അടിസ്ഥാന സൗകര്യങ്ങളെയും സാരമായി ബാധിച്ചു.

ഉക്രെയ്ൻ പ്രസിഡന്റ് വോളോഡിമിർ സെലെൻസ്‌കി പുറത്തുവിട്ട വിവരങ്ങൾ പ്രകാരം, റഷ്യ നടത്തിയ ആക്രമണത്തിൽ 400ലധികം ഡ്രോണുകളും 110 മിസൈലുകളും ഉപയോഗിച്ചു. ഇതിൽ 27 എണ്ണം ബാലിസ്റ്റിക് മിസൈലുകളായിരുന്നു. ക്ലസ്റ്റർ ബോംബുകൾ ഘടിപ്പിച്ച മിസൈലുകളും ആക്രമണത്തിൽ ഉപയോഗിച്ചതായി ഉക്രെയ്ൻ ആരോപിച്ചു. വായുവിൽ പൊട്ടിത്തെറിച്ച് വിശാലമായ പ്രദേശങ്ങളിൽ ചെറിയ ബോംബുകൾ വിതറുന്ന ഇത്തരം ആയുധങ്ങൾ സാധാരണക്കാർക്ക് വലിയ ഭീഷണിയാണ് ഉയർത്തുന്നത്.

പുടിന്റെ മുന്നറിയിപ്പിന് പിന്നാലെ ആക്രമണം

ക്രിമിയയെ റഷ്യൻ വൻകരയുമായി ബന്ധിപ്പിക്കുന്ന തന്ത്രപ്രധാനമായ ക്രിമിയൻ പാലത്തിന് നേരെയുള്ള ഉക്രെയ്ൻ ആക്രമണത്തിനെതിരെ റഷ്യൻ പ്രസിഡന്റ് വ്ലാഡിമിർ പുടിൻ മുന്നറിയിപ്പ് നൽകിയതിന് പിന്നാലെയാണ് വൻ വ്യോമാക്രമണം ഉണ്ടായത്.

ഉക്രെയ്ൻ തലസ്ഥാനമായ കൈവിൽ ആറുപേരും പടിഞ്ഞാറൻ നഗരമായ ലിവിവിലെ സ്‌ക്‌നൈലിവ് റെയിൽവേ സ്റ്റേഷനിൽ രണ്ടുപേരും കൊല്ലപ്പെട്ടതായാണ് വിവരം. സൈനിക കേന്ദ്രങ്ങൾക്ക് പുറമെ പാർപ്പിട സമുച്ചയങ്ങൾ, ആശുപത്രികൾ, വെയർഹൗസുകൾ, റെയിൽവേ അടിസ്ഥാന സൗകര്യങ്ങൾ എന്നിവയും ആക്രമണത്തിൽ തകർന്നതായി റിപ്പോർട്ടുകളുണ്ട്.

കൈവിലെ ഡൈനിപ്പർ നദിക്ക് കുറുകെയുള്ള മൂന്ന് പ്രധാന പാലങ്ങൾക്കും കേടുപാടുകൾ സംഭവിച്ചതായി റിപ്പോർട്ടുകൾ സൂചിപ്പിക്കുന്നു. നഗരത്തിന്റെ ഇരുഭാഗങ്ങളെയും ബന്ധിപ്പിക്കുന്ന പാലങ്ങൾക്കുണ്ടായ നാശനഷ്ടം ഗതാഗതത്തെയും രക്ഷാപ്രവർത്തനങ്ങളെയും ബാധിച്ചു.

അതേസമയം, ഉക്രെയ്നിലെ സൈനിക കേന്ദ്രങ്ങളും ആയുധനിർമാണ സംവിധാനങ്ങളുമാണ് ലക്ഷ്യമിട്ടതെന്നാണ് റഷ്യൻ പ്രതിരോധ മന്ത്രാലയത്തിന്റെ വിശദീകരണം. ഫ്ലമിംഗോ മിസൈൽ നിർമാണ കേന്ദ്രം, റോക്കറ്റ് ഇന്ധന ഘടകങ്ങൾ നിർമിക്കുന്ന കേന്ദ്രം, ഡ്രോൺ നിർമാണ കേന്ദ്രം എന്നിവ ആക്രമിച്ചതായും റഷ്യ അവകാശപ്പെട്ടു.

ഉക്രെയ്നിന്റെ വൈദ്യുതി സംവിധാനം പ്രതിസന്ധിയിൽ

റഷ്യയുടെ തുടർച്ചയായ ആക്രമണത്തിൽ ഉക്രെയ്നിന്റെ ഊർജമേഖലയ്ക്കും കനത്ത ആഘാതമേറ്റു. വൈദ്യുത നിലയങ്ങൾ, സബ്‌സ്റ്റേഷനുകൾ, വൈദ്യുതി വിതരണ ലൈനുകൾ എന്നിവ ആക്രമിക്കപ്പെട്ടതായി ഉക്രെയ്ൻ ഡെപ്യൂട്ടി ഊർജമന്ത്രി ആർടെം നെക്രാസോവ് അറിയിച്ചു.

ആക്രമണങ്ങളുടെ പശ്ചാത്തലത്തിൽ രാജ്യത്തെ പ്രവർത്തനക്ഷമമായ മൂന്ന് ആണവനിലയങ്ങൾക്കും വൈദ്യുതി ഉൽപാദനം കുറയ്ക്കേണ്ടിവന്നതായാണ് റിപ്പോർട്ട്. വൈദ്യുതി ഉൽപാദനത്തിലുണ്ടായ കുറവ് രാജ്യത്തെ ഊർജവിതരണത്തെ കൂടുതൽ പ്രതിസന്ധിയിലാക്കി. സാധാരണ ജനജീവിതത്തെയും വ്യവസായ മേഖലയെയും ഇത് പ്രതികൂലമായി ബാധിക്കുമെന്ന ആശങ്കയും ശക്തമാണ്.

പോളണ്ടും ജാഗ്രതയിൽ

റഷ്യയുടെ ആക്രമണത്തിന് പിന്നാലെ അയൽരാജ്യമായ പോളണ്ടും സുരക്ഷാ മുൻകരുതലുകൾ ശക്തമാക്കി. വ്യോമാതിർത്തിയിൽ സംശയാസ്പദമായ കടന്നുകയറ്റം ഉണ്ടായെന്ന റിപ്പോർട്ടുകളെ തുടർന്ന് പോളിഷ് സൈന്യം അന്വേഷണം ആരംഭിച്ചു.

റഷ്യയുടെ ആക്രമണം ഉക്രെയ്നിൽ മാത്രം ഒതുങ്ങുന്ന സുരക്ഷാ ഭീഷണിയല്ലെന്നും യൂറോപ്പിന്റെ മൊത്തത്തിലുള്ള സുരക്ഷയെ ബാധിക്കുന്നതാണെന്നും ഉക്രെയ്ൻ വിദേശകാര്യ മന്ത്രി ആൻഡ്രി സിബിഹ പ്രതികരിച്ചു. അതിർത്തി രാജ്യങ്ങൾ കൂടുതൽ ജാഗ്രത പാലിക്കണമെന്നും അദ്ദേഹം ആവശ്യപ്പെട്ടു.

എന്താണ് ക്രിമിയൻ പാലത്തിന്റെ പ്രാധാന്യം?

റഷ്യൻ അധീനതയിലുള്ള ക്രിമിയൻ ഉപദ്വീപിനെ റഷ്യൻ വൻകരയുമായി ബന്ധിപ്പിക്കുന്ന പ്രധാന ഗതാഗത പാതയാണ് ക്രിമിയൻ പാലം. റഷ്യൻ സൈന്യത്തിന് യുദ്ധമേഖലയിലേക്ക് സൈനികർ, ആയുധങ്ങൾ, വെടിക്കോപ്പുകൾ, മറ്റ് സൈനിക സാമഗ്രികൾ എന്നിവ എത്തിക്കുന്നതിൽ പാലത്തിന് നിർണായക പങ്കുണ്ട്.

ഈ തന്ത്രപ്രധാന്യം കണക്കിലെടുത്താണ് ഉക്രെയ്ൻ പാലം ലക്ഷ്യമിട്ടതെന്നാണ് റിപ്പോർട്ടുകൾ. ആക്രമണത്തിന് സ്വന്തം രാജ്യത്ത് വികസിപ്പിച്ച ആധുനിക ഡ്രോണുകളും മിസൈലുകളും ഉപയോഗിച്ചതായി ഉക്രെയ്ൻ അധികൃതർ വ്യക്തമാക്കിയിട്ടുണ്ട്.

അമേരിക്കയുടെ മധ്യസ്ഥതയിൽ റഷ്യയും ഉക്രെയ്നും തമ്മിൽ യുദ്ധം അവസാനിപ്പിക്കുന്നതിനുള്ള നയതന്ത്ര ചർച്ചകൾ തുടരുന്നതിനിടെയാണ് പുതിയ സംഭവവികാസങ്ങൾ. എന്നാൽ സമാധാന കരാറിന്റെ അടിസ്ഥാന വ്യവസ്ഥകളിൽ ഇരു രാജ്യങ്ങൾക്കും ഇതുവരെ ധാരണയിലെത്താനായിട്ടില്ല. ക്രിമിയൻ പാലത്തിന് നേരെയുണ്ടായ ആക്രമണവും റഷ്യയുടെ തിരിച്ചടിയും യുദ്ധം കൂടുതൽ രൂക്ഷമാകാനുള്ള സാധ്യതയാണ് ഉയർത്തുന്നത്.

Seraphinite AcceleratorOptimized by Seraphinite Accelerator
Turns on site high speed to be attractive for people and search engines.