കഴിഞ്ഞ ഒരു പതിറ്റാണ്ടുകൊണ്ട് ഇന്ത്യയിലെ മുൻനിര വ്യവസായ ഭീമനായി മാറിയ അദാനി ഗ്രൂപ്പ്, വിമാനത്താവളങ്ങൾക്ക് പിന്നാലെ സ്വന്തമായി വിമാനക്കമ്പനി ആരംഭിക്കുന്നതിന്റെ സാധ്യതകൾ സജീവമായി പരിശോധിക്കുന്നു. വ്യോമയാന മേഖലയിലെ വലിയ മൂലധന ചെലവും ചുരുങ്ങിയ ലാഭവിഹിതവും പരിഗണിച്ച് ഇക്കാര്യത്തിൽ ഇതുവരെ അന്തിമ തീരുമാനമെടുത്തിട്ടില്ലെങ്കിലും, സ്വന്തം എയർലൈൻ എന്ന നീക്കം ഗ്രൂപ്പ് ഗൗരവമായി പരിഗണിക്കുന്നുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. പ്രമുഖ വാർത്താ ഏജൻസിയായ റോയിട്ടേഴ്സാണ് അദാനി ഗ്രൂപ്പുമായി ബന്ധപ്പെട്ട വൃത്തങ്ങളെ ഉദ്ധരിച്ച് ഈ വിവരം പുറത്തുവിട്ടത്.
നിലവിലെ നിയമപ്രകാരം മുംബൈ, ഡൽഹി തുടങ്ങിയ വിമാനത്താവളങ്ങളുടെ ഓപ്പറേറ്റർമാർക്ക് വിമാനക്കമ്പനികളിൽ 10 ശതമാനത്തിൽ കൂടുതൽ ഓഹരി പങ്കാളിത്തം പാടില്ല എന്ന കർശനമായ ചട്ടമുണ്ട്. വിമാനക്കമ്പനി തുടങ്ങുന്നതിന് തടസ്സമാകുന്ന ഈ നിയന്ത്രണത്തിൽ ഇളവ് വരുത്തണമെന്ന് അദാനി ഗ്രൂപ്പ് കേന്ദ്ര സർക്കാരിനോട് ആവശ്യപ്പെട്ടിട്ടുണ്ട്. മുൻപ് വിമാനക്കമ്പനികൾ നടത്താൻ താൽപ്പര്യമില്ലെന്ന് ആവർത്തിച്ച് വ്യക്തമാക്കിയിരുന്ന ഗ്രൂപ്പ്, വ്യോമയാന വിപണിയിലെ പുതിയ സാഹചര്യങ്ങൾ കണക്കിലെടുത്ത് തങ്ങളുടെ നിലപാട് മാറ്റുകയാണെന്നാണ് പുറത്തുവരുന്ന സൂചനകൾ.
നിലവിൽ ഇന്ത്യയിലെ ആഭ്യന്തര വ്യോമയാന മേഖല ഇൻഡിഗോയുടെയും എയർ ഇന്ത്യയുടെയും കുത്തകയായിട്ടാണ് തുടരുന്നത്. വിപണിയുടെ 65 ശതമാനത്തോളം ഇൻഡിഗോ കൈകാര്യം ചെയ്യുമ്പോൾ 25 ശതമാനമാണ് എയർ ഇന്ത്യയുടെ പക്കലുള്ളത്. അദാനി ഗ്രൂപ്പിനെപ്പോലുള്ള ഒരു കോർപ്പറേറ്റ് ഭീമൻ ഈ മേഖലയിലേക്ക് പ്രവേശിക്കുന്നതോടെ മത്സരക്ഷമത വർദ്ധിക്കുമെന്നും ഇത് യാത്രക്കാർക്ക് ഗുണകരമാകുമെന്നും കരുതപ്പെടുന്നു. കഴിഞ്ഞ വർഷം ഇൻഡിഗോയിലുണ്ടായ പ്രതിസന്ധി വിപണിയെ ബാധിച്ച പശ്ചാത്തലത്തിൽ, സർക്കാരിന്റെ കൂടി താൽപ്പര്യം മുൻനിർത്തിയാണ് അദാനി ഗ്രൂപ്പ് ഈ നീക്കം നടത്തുന്നതെന്ന് പറയപ്പെടുന്നു.
ലാഭമുണ്ടാക്കാൻ ബുദ്ധിമുട്ടുള്ളതും റിസ്ക് കൂടുതലുള്ളതുമായ ഒരു ബിസിനസ്സായതിനാൽ ഈ മേഖലയിൽ വലിയ വെല്ലുവിളികൾ അദാനി ഗ്രൂപ്പ് നേരിടുന്നുണ്ട്. എങ്കിലും ദേശീയ താത്പര്യം മുൻനിർത്തി ഇത്തരമൊരു സംരംഭത്തെക്കുറിച്ച് ആലോചിക്കാൻ ഗൗതം അദാനി ആഗ്രഹിക്കുന്നുവെന്ന് കമ്പനി ഉദ്യോഗസ്ഥർ വ്യക്തമാക്കുന്നു. നിലവിൽ മുംബൈ, തിരുവനന്തപുരം, ജയ്പുർ ഉൾപ്പെടെയുള്ള ഇന്ത്യയിലെ എട്ട് പ്രമുഖ വിമാനത്താവളങ്ങളുടെ പ്രവർത്തനം കൈകാര്യം ചെയ്യുന്ന അദാനി ഗ്രൂപ്പിന് വ്യോമയാന മേഖലയിൽ ഇതിനോടകം തന്നെ ശക്തമായ സാന്നിധ്യമുണ്ട്.
വിമാനക്കമ്പനി തുടങ്ങുന്നതിനുള്ള ആലോചനകൾക്ക് പുറമെ, വിമാനത്താവള മേഖലയിൽ വലിയ നിക്ഷേപ പദ്ധതികളും ഗ്രൂപ്പ് നടപ്പിലാക്കുന്നുണ്ട്. രാജ്യത്തെ ആറ് പ്രധാന സ്ഥലങ്ങളിലായി വിമാനത്താവളങ്ങളുമായി ബന്ധിപ്പിച്ചുള്ള വാണിജ്യ മേഖലകൾ വികസിപ്പിക്കാൻ 200 കോടി ഡോളറിലധികം നിക്ഷേപിക്കാനാണ് അദാനി എയർപോർട്ട്സിന്റെ തീരുമാനം. ഹോട്ടലുകൾ, റീട്ടെയിൽ കേന്ദ്രങ്ങൾ, ഓഫീസ് ഇടങ്ങൾ എന്നിവ ഉൾപ്പെടുന്ന ഈ പദ്ധതികൾക്കൊപ്പം സ്വന്തം വിമാനക്കമ്പനി കൂടി യാഥാർത്ഥ്യമായാൽ ഇന്ത്യൻ വ്യോമയാന മേഖലയിൽ അദാനി ഗ്രൂപ്പിന്റെ സ്വാധീനം വൻതോതിൽ വർദ്ധിക്കും.
