നിരവധി അന്താരാഷ്ട്ര – ദേശീയ പുരസ്കാരങ്ങൾ നേടിയ ബിരിയാണി എന്ന സിനിമയ്ക്ക് ശേഷം സംവിധായകൻ സജിൻ ബാബു തന്റെ പുതിയ സിനിമ പ്രഖ്യാപിച്ചു. കനി കുസൃതിയെ നായികയാക്കിയ ബിരിയാണിക്ക് ശേഷം റിമ കല്ലിങ്കലിനെ നായികയാക്കി ആണ് പുതിയ സിനിമ ‘തിയറ്റർ- ദി മിത്ത് ഓഫ് റിയാലിറ്റി’ പ്രഖ്യാപിച്ചിരിക്കുന്നത്.
അൻജന- വാർസിന്റെ ബാനറിൽ അൻജന ഫിലിപ്പും വി.എ ശ്രീകുമാറും ചേർന്നാണ് ചിത്രം നിർമ്മിക്കുന്നത്. വിനായകനും സുരാജ് വെഞ്ഞാറമ്മൂടും ആദ്യമായി നായകരായി ഒന്നിച്ച ‘തെക്ക് വടക്ക്’ സിനിമയ്ക്കു ശേഷം അൻജന- വാർസ് നിർമ്മിക്കുന്ന സിനിമയാണിത്. സിനിമയുടെ ചിത്രീകരണം വർക്കലയിലും പരിസരങ്ങളിലുമായി പൂർത്തിയായി.
“അത്രയധികം തൊട്ടടുത്ത് നടക്കുന്ന സംഭവങ്ങളെയാണ് തിയറ്റർ സിനിമ കണ്ടെത്തി അവതരിപ്പിക്കുന്നത്. നടന്ന സംഭവങ്ങളുമായി ഒട്ടേറെ സാമ്യം തോന്നുന്നതാണ് പ്രമേയം”, എന്നാണ് നിർമ്മാതാവ് വി.എ ശ്രീകുമാർ ചിത്രത്തെ കുറിച്ച് അഭിപ്രായപ്പെട്ടു. അതേ സമയം,
“ഇന്നത്തെ ലോകത്ത് മനുഷ്യർ സ്വന്തം വിശ്വാസങ്ങൾക്കും ആവശ്യങ്ങൾക്കും അനുസരിച്ചു യാഥാർത്ഥ്യങ്ങളെ സ്വയം വ്യാഖ്യാനിക്കുന്നതാണ് കഥയുടെ പ്രമേയം”, എന്നാണ് സിനിമയെ കുറിച്ച് സംവിധായകൻ സജിൻ ബാബു പറഞ്ഞത്.
“വൈറൽ യുഗത്തിന്റെ കഥയാണിത്. തിയറ്ററുകളിലൂടെ തിയറ്റർ സിനിമ ജനങ്ങളിൽ എത്തണം എന്നതാണ് ആഗ്രഹം. നല്ല മലയാളം സിനിമകൾ ലോകോത്തര ഫെസ്റ്റിവെൽ വേദികളിൽ മാത്രമേ കാണാനാകൂ എന്ന സ്ഥിതി മാറണം”, എന്ന് നിർമ്മാതാവ് അൻജന ഫിലിപ്പും പറഞ്ഞു.
കനി കുസൃതിക്ക് മികച്ച നടിക്കുള്ള മോസ്കോ ഫിലിം ഫെസ്റ്റിവൽ അവാർഡ്, സംസ്ഥാന പുരസ്കാരം, ഫിലിം ഫെയർ അവാർഡ് തുടങ്ങിയവ നേടിക്കൊടുത്ത സജിൻ ബാബുവിന്റെ ബിരിയാണി സിനിമ ലോക ശ്രദ്ധ ഏറെ നേടിയിരുന്നു. ലോകത്തെമ്പാടുമായി നൂറ്റിയൻപതലധികം ഫിലിം ഫെസ്റ്റിവലുകളിൽ പ്രദർശിപ്പിച്ച സിനിമ സംവിധാനത്തിന് ദേശീയ പുരസ്കാരം ഉൾപ്പെടെ നാൽപ്പത്തഞ്ചിലേറെ പുരസ്ക്കാരങ്ങൾ നേടിയിരുന്നു. നിരവധി അന്താരാഷ്ട്ര ദേശീയ പുരസ്കാരങ്ങൾ നേടിയ അസ്തമയം വരെ (Unto the Dusk), അയാൾ ശശി തുടങ്ങിയ സിനിമകളും സജിൻ ബാബു രചിച്ച് സംവിധാനം ചെയ്തവയാണ്.
സരസ ബാലുശ്ശേരി, ഡൈൻ ഡേവിഡ്, പ്രമോദ് വെളിയനാട്, കൃഷ്ണൻ ബാലകൃഷ്ണൻ, മേഘ രാജൻ, ആൻ സലിം, ബാലാജി ശർമ, ഡി. രഘൂത്തമൻ, അഖിൽ കവലയൂർ, അപർണ സെൻ, ലക്ഷ്മി പത്മ, മീന രാജൻ, ആർജെ അഞ്ജലി, മീനാക്ഷി രവീന്ദ്രൻ, അശ്വതി, അരുൺ സോൾ, രതീഷ് രോഹിണി തുടങ്ങിവരാണ് മറ്റ് അഭിനേതാക്കൾ. ക്യാമറ: ശ്യാമപ്രകാശ് എം എസ്, എഡിറ്റിങ്: അപ്പു എൻ ഭട്ടതിരി, സിങ്ക് സൗണ്ട്: ഹരികുമാർ മാധവൻ നായർ, മ്യൂസിക്: സയീദ് അബ്ബാസ്, ആർട്ട്: സജി ജോസഫ്, കോസ്റ്റ്യും: ഗായത്രി കിഷോർ, വിഎഫ്എക്സ്: പ്രശാന്ത് കെ നായർ, പ്രോസ്തെറ്റിക് & മേക്കപ്പ്: സേതു ശിവാനന്ദൻ- ആശ് അഷ്റഫ്, ലൈൻ പ്രൊഡ്യൂസർ: സുഭാഷ് ഉണ്ണി, എക്സിക്യൂട്ടീവ് പ്രൊഡ്യൂസർ: അജിത്ത് സാഗർ, ഡിസൈൻ: പുഷ്360 എന്നിവരാണ് മറ്റ് അണിയറ പ്രവർത്തകർ.
സിനിമയുടെ ഫസ്റ്റ് ലുക്ക് പോസ്റ്റർ സംവിധായകനും നിർമ്മാതാക്കളും പുറത്തു വിട്ടു. സജിൻ ബാബു തന്നെയാണ് രചനയും നിർവ്വഹിച്ചിരിക്കുന്നത്.
